Ірына Аляксандраўна Мельхер — індывідуальная прадпрымальніца і пенсіянерка, затрыманая разам з сынам Антонам Мельхерам. Ірыну абвінавацілі паводле ч. 1 арт. 13 і ч. 3 арт. 289 КК (падрыхтоўка да акту тэрарызму, зробленая групай асобаў), ч. 2 арт. 285 (удзел у злачыннай арганізацыі ў любой іншай форме), ч. 1 арт. 14 і ч. 2 арт. 357 (замах на захоп улады неканстытуцыйным шляхам). Таксама ёй выставілі абвінавачанне паводле ч. 1 арт. 342 КК за ўдзел 13 верасня 2020 года ў карагодзе на скрыжаванні бульвара Касманаўтаў і праспекта Машэрава ў Брэсце.

Ірыну і Антона затрымалі ў сваім доме. Спачатку забралі Антона, Ірына паехала высвятляць, дзе ён знаходзіцца, а вярнулася са следчымі. Так, з дому забралі абаіх, а таксама ўсю камп'ютарную тэхніку.  Муж Ірыны не мог нікому патэлефанаваць — ён застаўся са зламаным тэлефонам і хворымі нагамі (у той час ён перасоўваўся толькі з мыліцамі). Пра затрыманне даведаліся толькі дзякуючы суседзям, якія зайшлі праверыць, ці ўсё ў парадку.

Абедзве камеры, у якіх знаходзіліся Ірына і Антон, у поўным складзе перанеслі Covid-19. Ірына Мельхер у СІЗА КДБ амаль не спала, перанесла гіпертанічны крыз, яе самаадчуванне кожны дзень рабілася ўсё горшым.

У лютым 2021 года КДБ унёс палітзняволеную ў спіс "асобаў, датычных да тэрарыстычнай дзейнасці".

Утрымлівалася ў брэсцкім СІЗА-7, пасля была пераведзеная ў гродзенскую Турму № 1.

Разгляд справы распачаўся 18 траўня 2022 года ў СІЗА гродзенскай Турмы № 1.

17 кастрычніка 2022 г. Гродзенскі абласны суд агучыў прысуд фігурантам справы. Суддзя Максім Філатаў прызначыў Ірыне Мельхер 17 гадоў калоніі ва ўмовах агульнага рэжыму і 700 базавых велічыняў штрафу (22 400 рублёў).

У Вярхоўным судзе 31 сакавіка 2023 г. разглядзелі апеляцыйныя скаргі фігурантаў "справы Аўтуховіча". Судовая калегія пад старшынствам суддзі Паўла Каршуновіча прыняла рашэнне вызваліць Мікалая Аўтуховіча ад прызначанага пакарання праз заканчэнне тэрмінаў даўніны ў частцы асуджэння паводле арт. 295-3 КК (Незаконныя дзеянні ў дачыненні да прадметаў, дзеянне якіх заснавана на выкарыстанні гаручых рэчываў), а Ірыну Гарачкіну — паводле ч. 1 арт. 405 КК (пакрыванне цяжкага злачынства). У выніку Гарачкінай скарацілі тэрмін на 1 месяц, а Аўтуховічу пакінулі без зменаў. Астатнім палітвязням судовая калегія пакінула апеляцыйныя скаргі без задавальнення, а прысуд — у сіле. 

12 траўня 2023 г. МУС уключыла палітзняволеную ў "Пералік грамадзян Беларусі замежных грамадзян і асоб без грамадзянства, якія маюць дачыненне да экстрэмісцкай дзейнасці".

15 траўня 2023 г. Ірына Мельхер была этапавана ў жаночую ПК № 4 для адбыцця пакарання.

Да 25 гадоў калоніі. Вынесены прысуды па "справе Аўтуховіча"

Гродзенскі абласны суд 17 кастрычніка агучыў прысуды па рэзананснай "справе Аўтуховіча". Працэс доўжыўся пяць месяцаў. Суддзя Максім Філатаў прызначыў ім ад 2,5 да 25 гадоў калоніі.

"Я не здзяйсняў злачынства, я шукаў праўду": падрабязнасці суда па "справе Аўтуховіча"

Па паказаннях Ірыны Мельхер, з Мікалаем яны пазнаёміліся прыблізна 15 гадоў таму, дзякуючы сям’і Рэзановічаў. Звычайны яны сустракаліся дома ў Сяргея і Любові, але аднойчы Аўтуховіч прыехаў дадому да Мельхераў. Калі Мікалай сабраўся сыходзіць, Ірына папрасіла сына правесці яго. Антон тады вярнуўся толькі раніцай, але дзе ён быў усю ноч, жанчына не ведае. Таксама яна паведамілі, што летам 2020 года Мікалай папрасіў яе аформіць на сябе сім-карту.

Другі дзень суда па «справе Аўтуховіча»: што адбываецца на працэсе

Сцвярджаецца, што Аўтуховіч рыхтаваў тэракты і збіраў звесткі аб сілавіках па ўказанні ўкраінскіх спецслужбаў. Акрамя гэтага, група нібыта планавала збор дадзеных аб расійскіх вайскоўцах, каб іх выкрасці і атрымаць ад іх інфармацыю аб задачах, планах і размяшчэнні расійскіх войскаў у Беларусі. Гэтыя дадзеныя, па версіі следства, Аўтуховіч перадаваў прадстаўнікам украінскіх спецслужбаў.

У гродзенскай турме пачаўся суд па справе «групы Аўтуховіча»

Судовы працэс «групы Аўтуховіча» вядзе суддзя Гродзенскага абласнога суда Максім Філатаў. Менавіта ён прысудзіў пяць гадоў калоніі Вітольду Ашурку, які памёр у траўні 2021 года ў шклоўскай калоніі пры нявысветленых абставінах.На судовы працэс пусцілі толькі двух сваякоў абвінавачаных, але пры гэтым на судзе прысутнічаюць дзяржаўныя прапагандысты.