Вольга Маёрава

грамадская актывістка

Дата нараджэння: 22 жніўня 1966

Дата затрымання: 4 студзеня 2021

Прад'яўленыя абвінавачванні:

арт. 361 Крымінальнага кодэкса — Заклікі да дзеянняў, скіраваных на прычыненне шкоды нацыянальнай бяспецы Рэспублікі Беларусь
арт. 295 Крымінальнага кодэкса — Незаконныя дзеянні ў дачыненні да агнястрэльнай зброі, боепрыпасаў і выбуховых рэчываў
ч. 2 арт. 285 Крымінальнага кодэкса — Удзел у злачыннай арганізацыі ў любой іншай форме
арт. 130 Крымінальнага кодэкса — Распальванне варожасці ці варажнечы
арт. 411 Крымінальнага кодэкса — Злоснае непадпарадкаванне патрабаванням адміністрацыі папраўчай установы
ч. 1 арт. 14 і ч. 2 арт. 357 Крымінальнага кодэкса — Замах на змову з мэтай захопу дзяржаўнай улады неканстытуцыйным шляхам

Вынік суда: 20 гадоў

Від пакарання: пазбаўленне волі ў калоніі ва ўмовах агульнага рэжыму

Дата пачатку адбыцця пакарання: 31 сакавіка 2023

Суддзя: Філатаў Максім

Пракурор: Герасіменка Людміла, Рабаў Уладзімір

Месца зняволення: ПК № 4

Сімвалічны/ая хросны/ая: Прыска Зайлер Граф, дэпутатка Нацыянальнай рады Швейцарыі

У спісе «тэрарыстаў» (грашовыя пераводы забароненыя)
Вольга Маёрава. Фота з facebook.com

Вольга Уладзіміраўна Маёрава — грамадская актывістка, раней актыўная сяброўка Аб'яднанай грамадзянскай партыі.

Была затрыманая ўвечары 4 студзеня 2021 года ў сваім доме ў вёсцы Нача Крупскага раёна па так званай "справе Мікалая Аўтуховіча". У доме быў праведзены ператрус, у выніку якога супрацоўнікі КДБ забралі з дома тэхніку.

Яе абвінавачвалі ў акце тэрарызму (арт. 289 КК).

Спачатку ўтрымлівалася ў СІЗА КДБ, пазней была пераведзена ў Следчую турму ў г. Гродна.

У лютым 2021 года КДБ унёс палітзняволеную ў спіс "асобаў, датычных да тэрарыстычнай дзейнасці".

У студзені 2022 у лісце да сына Вольга Маёрава напісала, што чакае прысуд па ч. 3 арт. 289 Крымінальнага кодэкса (тэрарызм). Раней яе абвінавачвалі па ч. 2, якая прадугледжвала больш мяккае пакаранне. 

У канцы студзеня 2022 з'явілася інфармацыя, што Вользе інкрымінуецца шэсць артыкулаў КК: ч. 2 арт. 285 — Удзел у злачыннай арганізацыі ў любой іншай форме; ч. 3 арт. 130-1 — Дзеянні па рэабілітацыі нацызму, учыненыя групай асоб, або якія пацягнулі па неасцярожнасці смерць чалавека або іншыя цяжкія наступствы; ч. 4 арт. 295 — Незаконныя дзеянні ў адносінах да агнястрэльнай зброі, боепрыпасаў і выбуховых рэчываў, учыненыя арганізаванай групай; ч. 3 арт. 361 — Заклікі да мер абмежавальнага характару (санкцый), іншых дзеянняў, накіраваных на нанясенне шкоды нацыянальнай бяспецы Рэспублікі Беларусь; ч. 2 арт. 257 — Падман спажыўцоў, учынены групай асоб па папярэдняй змове, або асобай, раней судзімай за падман спажыўцоў, або ў буйным памеры; ч. 2 арт. 289 — Акт тэрарызму. Пазней Вольга напісала ў лісце свайму сыну, што абвінавачванне ў тэрарызме з яе было знятае.

Разгляд справы распачаўся 18 траўня 2022 года ў СІЗА гродзенскай Турмы № 1. Суддзя — Максім Філатаў. На судзе Вольга заявіла адвод дзяржабвінаваўцам. Палітзняволеную судзяць паводле ч. 2 арт. 285 — удзел у злачыннай арганізацыі ў любой іншай форме; ч. 1 арт. 14 і ч. 2 арт. 357 — замах на захоп дзяржаўнай улады неканстытуцыйным шляхам; ч. 3 арт. 130 — распальванне сацыяльнай варожасці ці варажнечы, здзейсненае групай асоб; ч. 3 арт. 361 — заклікі да мер абмежавальнага характару (санкцый), іншых дзеянняў, накіраваных на нанясенне шкоды нацыянальнай бяспецы Рэспублікі Беларусь; ч. 4 арт. 295 — незаконныя дзеянні ў адносінах да агнястрэльнай зброі, боепрыпасаў і выбуховых рэчываў, учыненыя арганізаванай групай.

Вядома, што 14 ліпеня Маёраву выдалілі з пасяджэння, а таксама змясцілі ў карцар за "парушэнне парадку". Дакладныя прычыны і тэрміны спагнанняў невядомы. У зняволенні ў Вольгі з'явілася падазрэнне на дыябет. Праваабаронцам вядома, што ў верасні Вольгу змяшчалі ў карцар.

17 кастрычніка 2022 г. Гродзенскі абласны суд агучыў прысуд фігурантам справы. Суддзя Максім Філатаў прызначыў Маёравай 20 гадоў калоніі ва ўмовах агульнага рэжыму і 800 базавых велічыняў штрафу (25 600 рублёў).

У Вярхоўным судзе 31 сакавіка 2023 г. разглядзелі апеляцыйныя скаргі фігурантаў "справы Аўтуховіча". Судовая калегія пад старшынствам суддзі Паўла Каршуновіча прыняла рашэнне вызваліць Мікалая Аўтуховіча ад прызначанага пакарання праз заканчэнне тэрмінаў даўніны ў частцы асуджэння паводле арт. 295-3 КК (Незаконныя дзеянні ў дачыненні да прадметаў, дзеянне якіх заснавана на выкарыстанні гаручых рэчываў), а Ірыну Гарачкіну — паводле ч. 1 арт. 405 КК (пакрыванне цяжкага злачынства). У выніку Гарачкінай скарацілі тэрмін на 1 месяц, а Аўтуховічу пакінулі без зменаў. Астатнім палітвязням судовая калегія пакінула апеляцыйныя скаргі без задавальнення, а прысуд — у сіле. 

12 траўня 2023 г. МУС уключыла палітзняволеную ў "Пералік грамадзян Беларусі замежных грамадзян і асоб без грамадзянства, якія маюць дачыненне да экстрэмісцкай дзейнасці".

У сярэдзіне траўня 2023 г. стала вядома, што палітзняволеная была этапавана ў ПК № 4.

5 сакавіка 2024 г. у судзе Чыгуначнага раёна г. Гомеля над Вольгай распачнецца суд паводле арт. 411 КК (злоснае непадпарадкаванне законным патрабаванням адміністрацыі турмы). Справу будзе разглядаць суддзя Ганна Сакалова. Вользе могуць дадаць яшчэ два гады зняволення.

Да 25 гадоў калоніі. Вынесены прысуды па "справе Аўтуховіча"

Гродзенскі абласны суд 17 кастрычніка 2022 года агучыў прысуды па рэзананснай "справе Аўтуховіча". Працэс доўжыўся пяць месяцаў. Суддзя Максім Філатаў прызначыў ім ад 2,5 да 25 гадоў калоніі.

"Я не здзяйсняў злачынства, я шукаў праўду": падрабязнасці суда па "справе Аўтуховіча"

Паводле паказанняў Вольгі Маёравай, падчас сустрэчы ў лістападзе 2020 года Аўтуховіч паказаў ёй кабуру з пісталетам, але яе гэта не здзівіла, бо «спакойна ставіцца да наяўнасці асабістай зброі ў грамадзян». Таксама вядома, што пасля прапановы Мікалая, яна паспрабавала з яго стрэліць. Але, па словах палітзняволенай, гэта было «дзеля забавы, а пісталет быў лёгкім, нібы цацачны». Вольга адмаўляе змову з Аўтуховічам.

Другі дзень суда па «справе Аўтуховіча»: што адбываецца на працэсе

Вядома, што Аўтуховіча і Маёраву абвінавачваюць у стварэнні і адміністраванні тэлеграм-канала «ДаВолі!», дзе, паводле следства, публікавалася «экстрэмісцкая» інфармацыя, заклікі да пратэстаў і да гвалтоўнага захопу ўлады.

У гродзенскай турме пачаўся суд па справе «групы Аўтуховіча»

Судовы працэс «групы Аўтуховіча» вядзе суддзя Гродзенскага абласнога суда Максім Філатаў. Менавіта ён прысудзіў пяць гадоў калоніі Вітольду Ашурку, які памёр у траўні 2021 года ў шклоўскай калоніі пры нявысветленых абставінах. На судовы працэс пусцілі толькі двух сваякоў абвінавачаных, але пры гэтым на судзе прысутнічаюць дзяржаўныя прапагандысты.

Адрас для лістоў: ПК № 4. 246035, г. Гомель, вул. Антошкіна, 3

Палітвязні знаходзяцца па адрасах:

Падтрымаць «Вясну»