Вольга Юр'еўна Іванчанка — жыхарка Магілёва, якая мае хваробу аўтыстычнага спектру. Пасля затрымання яе каля месяца трымалі ў РНПЦ псіхічнага здароўя ў Навінках. Утрымлівалася ў Турме № 4.

Паводле матэрыялаў справы, Вольга Іванчанка размясціла на сваёй старонцы ў «Аднакласніках» у свабодным доступе «тэкст з выявай, які змяшчае загадзя ілжывыя выдумкі, якія ганьбяць Аляксандра Лукашэнку, прыніжаюць яго гонар і годнасць, накіраваныя на падрыў яго аўтарытэту і фарміраванне негатыўнага вобраза».

Акрамя гэтага, жанчына размясціла пад пастом з выявай Аляксандра Лукашэнкі «каментары з яго негатыўнай ацэнкай, якія змяшчаюць ненарматыўную лексіку».

21 сакавіка 2023 году яе асудзілі да двух гадоў пазбаўлення волі ў калоніі агульнага рэжыму паводле арт. 367 (паклёп на Лукашэнку) і арт. 368 (абраза Лукашэнкі) Крымінальнага кодэксу.

Адбывае пакаранне ў ПК № 4.