У Брэсцкім абласным судзе 23 сакавіка 2023 года распачаўся суд над Андрэем Васільевічам Цыпаком. Былога супрацоўніка МТС з Брэста затрымалі напачатку лістапада 2022 года. У «пакаяльным» відэа ён казаў, што ў 2020-2021 гадах працаваў у МТС, меў доступ да дадзеных. Паводле сілавікоў, Андрэй перадаў у «Чорную кнігу Беларусі» дадзеныя некалькіх дзяржаўных службовых асоб і пракурораў.

Былы сукамернік Цыпака распавёў праваабаронцам, што падчас затрымання Андрэя моцна збілі. 

Мужчыну абвінавачвалі паводле трох артыкулаў КК: ч. 3 арт. 130 (распальванне іншай сацыяльнай варожасці), ч. 3 арт. 352 (неправамернае авалодванне камп’ютарнай інфармацыяй), ч. 3 арт. 203-1 (незаконныя дзеянні ў адносінах да асабістых дадзеных).

Справу Андрэя разглядалі ў закрытым рэжыме, таму вынік суда праваабаронцам невядомы.

Андрэй Цыпак раней гуляў у брэсцкім гандбольным клубе імя Мяшкова. З 2020 па 2021 год працаваў у МТС — і ў гэты час, згодна з версіяй сілавікоў, перадаў дадзеныя некалькіх пракурораў і дзяржаўных службовых асоб у пратэсную ініцыятыву.

26 траўня 2023 года быў унесены ў пералік грамадзян Беларусі, замежных грамадзян і асоб без грамадзянства, якія маюць дачыненне да экстрэмісцкай дзейнасці.

 Калонія, у якой палітвязень адбывае пакаранне пасля СІЗА-7, пакуль невядомая.