Васіль Аляксандравіч Верамейчык — былы ваяр палка Каліноўскага, якога В'етнам выдаў Беларусі. 

Паведамлялася, што мужчына апынуўся ў Азіі, бо Літва прызнала яго пагрозай нацыянальнай бяспецы і забараніла ўезд у Еўрасаюз. "Каліноўца" даставілі ў Беларусь увечары 14 лістапада пад канвоем з трох чалавек. Паводле інфармацыі motolko.help, затрыманага даставілі ў Беларусь на рэйсе а/к Белавія (B2978) з Масквы ўвечары 14 лістапада. Гэты самалёт прызямліўся ў Нацыянальным аэрапорце "Мінск" у 23:48. 

Таксама вядома, што відэа з Верамейчыкам, якое апублікавалі прапагандысты, чакана, з’яўляецца пастановачным — яно знята ў іншым самалёце і ў іншы час.

За "ўдзел у пагромах і спробу падпалу аўтамабіля супрацоўнікаў пракуратуры" ў дачыненні да яго была ўзбуджаная крымінальная справа паводле ч.1 арт. 366 (гвалт альбо пагроза ў дачыненні да службовай асобы, якая выконвае службовыя абавязкі) Крымінальнага кодэкса.

Мужчына з'яўляўся сябрам Каардынацыйнай рады. Офіс Святланы Ціханоўскай выказаў рашучы пратэст у сувязі з гэтым.

"Гэты крок з'яўляецца часткай працяглай рэпрэсіўнай палітыкі рэжыму Лукашэнкі, які не спыняецца перад нічым, каб пераследаваць сваіх апанентаў, у тым ліку тых, хто змагаецца за свабоду і дэмакратыю, а таксама тых, хто абараняе Еўропу ад агрэсіі Расіі", — гаворыцца ў заяве.