Уладзіслаў Аляксандравіч Савіцкі — жыхар Баранавічаў. Быў затрыманы ў студзені 2023 года, першапачаткова па падазрэнні ў падпалах "Табакерак". Пасля яму паставілі у віну абразу Лукашэнкі (арт. 368 Крымінальнага кодэксу), садзейнічанне экстрэмісцкай дзейнасці (арт. 361-4 Крымінальнага кодэксу), а таксама па ч. 2 гэтага ж артыкула: "тыя ж дзеянні, здейсненыя паўторна, альбо групай асоб па папярэдняй змове, альбо службовай асобай з выкарыстаннем сваіх службовых паўнамоцтваў".

Справу Уладзіслава разглядаў Брэсцкі абласны суд 25 мая, затым 1 чэрвеня, 21 і 22 чэрвеня 2023 г.

Вядома, што мужчыну ставяць ў віну тое, што 8 сакавіка 2021 года ў Instagram ён выклаў сторыс "з тварам Лукашэнкі ў жаночым абліччы" і тэкстам: «C 8 сакавіка, Дарагія жэншчыны. Жэстачайшаго здароўя і толькі прыемных ашчушчаний». За гэта абвінавацілі ў публічнай абразе Лукашэнкі паводле ч.1 арт. 368 КК.

Таксама Уладзіслава абвінавацілі ў тым, што ён некалькі разоў адправіў у бот "Nexta" відэа і тэксты (напрыклад, відэа расійскі вайсковых самалётаў і цягнікі з расійскімі вайскоўцамі). Гэта кваліфікавалі як "іншае садзейнічанне экстрэмісцкай дзейнасці" па ч.1 арт. 361-4 КК.

15 верасня 2023 г. МУС дадала Уладзіслава ў спіс "экстрэмістаў". 

Да суда Уладзіслаў знаходзіўся ў СІЗА-7. 

22 чэрвеня 2023 г. асуджаны да 4 гадоў пазбаўлення волі ўзмоцненага рэжыму, утрымліваецца ў ПК-15.