Уладзімір Аляксандравіч Аўрамцаў — жыхар Бабруйска, затрыманы ў ноч на 30 сакавіка 2022 года. Паводле версіі следства, ён датычны да знішчэння двух рэлейных шаф сігнальнай ўсталёўкі пад Асіповічамі.

Падчас затрымання Аўрамцаў, а таксама Дзмітрый Клімаў і Яўген Мінкевіч аказалі актыўны супраціў і паспрабавалі схавацца. Сілавікі ўжылі зброю. Адзін з затрыманых паранены і знаходзіцца ў лячэбнай установе. Іншым аказалі меддапамогу на месцы. "Супольнасць чыгуначнікаў Беларусі" піша, што пасля затрымання людзі, якія не аказвалі супраціву, былі мэтанакіравана расстраляныя ў каленныя суставы.

Пра Уладзіміра вядома, што ён вучыўся ў Бабруйскім вучылішчы алімпійскага рэзерву і ў БДАТУ. Ён займаўся барацьбой і выступаў на спаборніцтвах па грэплінге. Уладзімір працаваў трэнерам у бабруйскім фітнес-цэнтры "Ева".

На пачатку траўня 2022 г. быў пераведзены з СІЗА-5 у Турму № 4.

Палітзняволеным "партызанам" інкрымінуюць адразу пяць артыкулаў Крымінальнага кодэкса: ч. 3 арт. 289 (акт тэрарызму арганізаванай групай); ч. 2 арт. 290-4 (удзел у арганізацыі для ажыццяўлення тэрарыстычнай дзейнасці); ч. 1 арт. 356 (здрада дзяржаве); ч. 4 арт. 309 (наўмыснае прывядзенне ў непрыдатнасць транспартнага сродку або шляхоў злучэння); ч. 2 арт. 406 (неданясенне аб злачынстве).

23 студзеня 2023 г. у Магілёўскім абласным судзе Ігар Шведаў пачаў разглядаць справу бабруйскіх "рэйкавых партызанаў" у закрытым рэжыме.

10 лютага 2023 г. ён прызначыў Дзмітрыю Клімаву і Уладзіміру Аўрамцаву па 22 гады зняволення, а Яўгену Мінкевічу — паўтара года калоніі (яго вызвалілі ад пакарання часткова тэрмінам на адзін год паводле Закона "Аб амністыі ў сувязі з Днём народнага адзінства").

Разгляд апеляцыйных скаргаў палітвязняў быў прызначаны на 26 красавіка 2023 г. у Вярхоўным судзе. Рашэнне прымаў суддзя Фёдар Чубкавец.

12 траўня 2023 г. КДБ унёс Уладзіміра ў спіс асобаў, "датычных да тэрарыстычнай дзейнасці".

12 траўня 2023 г. МУС уключыла палітзняволенага ў "Пералік грамадзян Беларусі замежных грамадзян і асоб без грамадзянства, якія маюць дачыненне да экстрэмісцкай дзейнасці".

У канцы траўня 2023 г. стала вядома, што палітвязень быў этапаваны ў ПК № 1.

У снежні 2023 г. стала вядома, што Уладзіміра перавялі ў ПК-22. 

25 верасня 2024 г. ва Уладзіміра адбыўся разгляд справы ў судзе Івацэвіцкага раёна "аб пераводзе ў папраўчую ўстанову іншага віду і зменаў умоваў утрымання". Суддзя Сяргей Кухацкаволец. Вынік праваабаронцам невядомы. 

Двух "рэйкавых партызанаў" асудзілі да 22 гадоў калоніі, яшчэ аднаго вызвалілі па амністыі

Падчас затрымання Дзмітрый Клімаў быў паранены сілавікамі. Дзмітрыя Клімава і Уладзіміра Аўрамцава судзілі па пяці цяжкіх артыкулах Крымінальнага кодэкса, у тым ліку за "акт тэрарызму", "здраду дзяржаве" і "ўдзел у тэрарыстычнай арганізацыі". Справу ў закрытым рэжыме два тыдні разглядаў суддзя Ігар Шведаў.

У закрытым рэжыме пачалі судзіць "рэйкавых партызанаў" з Бабруйску

Раней па артыкуле за "ўдзел у арганізацыі для ажыццяўлення тэрарыстычнай дзейнасці" судзілі толькі фігурантаў "справы АГСБ". Бабруйскіх партызанаў судзяць за сувязь з ByPOL і план "Перамога". Праз тое, што суд праходзіць у закрытым рэжыме, падрабязнасці справы невядомыя.

Былы міліцыянт, спартовец і кіроўца. Што вядома пра трох бабруйчан, якіх са стралянінай затрымалі за падрыхтоўку «дыверсіі» на чыгунцы

6 красавіка МУС распавяло, як у канцы сакавіка сілавікі са стралянінай затрымлівалі «дыверсантаў» на чыгунцы. Трое з іх дзейнічалі разам і, як сцвярджаецца, падпалілі дзве рэлейныя шафы ў раёне Асіповіч. На аператыўных здымках у аднаго з іх перабінтаваныя калены і ён ледзь адказвае на пытанні аператыўнікаў, у другога кроў на твары, а трэці моцна напалоханы. «Медыязона» паспрабавала дазнацца пра затрыманых як мага больш.