Сяргей Аляксандравіч Сакавец быў затрыманы 21 верасня 2021 года. Спачатку яго асудзілі на 10 сутак арышту па адміністрацыйнай справе за падпіску на тэлеграм-канал «Рэальная Беларусь», але затым не адпусцілі, а перавялі ў СІЗА па крымінальнай справе. 

Сяргею прад'яўлена абвінавачванне па арт. 342 Крымінальнага кодэксу (Арганізацыя альбо актыўны ўдзел у групавых дзеяннях, якія груба парушаюць грамадскі парадак). Пасля некалькіх месяцаў пад вартай у СІЗА-1 хлопцу выставілі абвінавачванне яшчэ паводле двух дыфамацыйных артыкулаў Крымінальнага кодэкса — паклёп і абраза Лукашэнкі (ч. 1 і 2 арт. 367 і ч. 1 і 2 арт. 368).

20 траўня 2022 г. у судзе Маскоўскага раёна Мінска распачаўся разгляд справы Сяргея. 24 траўня 2022 г. суддзя Таццяна Пірожнікава прызначыла яму чатыры гады калоніі ва ўмовах агульнага рэжыму. Палітвязень на судзе віну не прызнаў і заявіў пра збіццё пры затрыманні.

У сярэдзіне чэрвеня 2022 г. стала вядома, што Сяргея перавялі з СІЗА-1 у магілёўскую Турму № 4.

19 жніўня 2022 г. адбыўся разгляд апеляцыйнай скаргі: прысуд быў пакінуты без зменаў. Неўзабаве Сяргея этапавалі ў ПК № 15.

Instagram-блогера асудзілі да 4 гадоў калоніі. Пры затрыманні ў яго выбівалі логін і пароль

На судзе Сяргей Сакавец выступіў з апошнім словам: «Усё, што я рабіў, я лічу, гэта адміністрацыйныя артыкулы, а ўсе доказы былі атрыманыя незаконным шляхам і не могуць быць пакладзеныя ў аснову абвінавачвання. Так, я дзесьці здымаў, дзесьці фатаграфаваў, размяшчаў у сябе рэпосты з тэлеграма, але ўсё гэта я рабіў без злога намеру, без канкрэтнай мэты, без карысці. Я нічога нікому не навязваў, не заклікаў, і тым больш ніякай змовы і арганізацыі не было. Усё абвінавачванне пабудавана на здагадках, і канкрэтных доказаў няма, сведак таксама няма».

Пісаў вершы, вёў Instagram на 15 тысяч падпісчыкаў, а цяпер у СІЗА. Гісторыя палітвязня Сяргея Сакаўца

29-гадовага інжынера-энергетыка з Мінска з амаль 15 тысячамі падпісчыкамі ў Instagram Сяргея Сакаўца затрымалі 21 верасня мінулага года і арыштавалі на 10 сутак за падпіску на тэлеграм-канал "Рэальная Беларусь". З ЦІП на Акрэсціна хлопец так і не выйшаў — супраць яго распачалі крымінальную справу паводле "народнага" артыкулу 342 Крымінальнага кодэкса за ўдзел у акцыях пратэсту пасля выбараў. Падчас ператрусу ў Сяргея сілавікі забралі буйную суму грошай, якую ён збіраў на новую машыну. Цяпер маці палітвязня аддае амаль усю пенсію, каб аплаціць крэдыт за сына. Ужо чатыры месяцы Сяргея ўтрымліваюць у СІЗА-1, але ён імкнецца выкарыстоўваць гэты час прадуктыўна, нават знаходзячыся ў зняволенні: піша вершы, вучыць англійскую, малюе для сукамернікаў і іх сваякоў, чытае кнігі. Мама Сяргея Тамара распавяла "Вясне" гісторыю палітзняволенага сына.