Сяргей Анатольевіч Кудрыцкі працаваў спецыялістам па продажам, быў затрыманы 24 чэрвеня 2022 года і змешчаны да суда пад варту. Разам з ім затрымалі і таксама асудзілі ягоную жонку Маргарыту.

У судзе стала вядома, што Сяргея затрымлівалі яшчэ і 9 чэрвеня 2020 года. Тады у яго рэчах знайшлі нібыта пакецік з марыхуанай. Так у следства з’явіўся яшчэ адзін артыкул – 328, абвінавачанне па якім разглядалася адначасова.

Суд Цэнтральнага раёна Мінска 19 верасня 2022 года пастанавіў: на падставе ч. 1 арт. 342 Крымінальнага кодэкса прызначыць яму пакаранне ў выглядзе абмежавання волі на тэрмін тры гады без накіравання ў выпраўленчую ўстанову адкрытага тыпу. А паводле ч.1 арт. 328 прызнаць вінаватым у незаконных без мэты збыту набыцці і захоўванні наркатычных сродкаў, і прызначыць яму пакаранне ў выглядзе пазбаўлення волі на тэрмін два гады. Па сукупнасці злачынстваў канчаткова прызначыць Сяргею пазбаўленне волі на тэрмін два гады з утрыманнем у калоніі агульнага рэжыму. Судовы працэс вяла суддзя Вікторыя Шабуня.

Яшчэ адна сямейная пара мінчукоў асуджаная па "народным" артыкуле

Суд Цэнтральнага раёна Мінска вынес прысуд Сяргею і Маргарыце Кудрыцкім за ўдзел у жнівеньскіх акцыях пратэсту 2020 года, абвінаваціўшы мужа і жонку па ч.1 арт 342 Крымінальнага кодэкса.