Мікалай Аляксандравіч Дзядок — блогер, які піша і здымае відэа на грамадска-палітычныя тэмы, журналіст, актывіст анархічнага руху.

Быў затрыманы позна ўвечары 11 лістапада супрацоўнікамі ГУБАЗіК і МУС у загарадным доме ў пасёлку Сасновы. Пры затрыманні ён быў моцна збіты, у вочы яму распылілі пярцовы газ. Гвалтам прымусілі зняцца ў на камеру для роліку МУС.

Пасля затрымання адвезлі ў Мінск ў ГУБАЗіК. Там ён чатыры гадзіны праляжаў тварам у падлогу. Яго катавалі – збівалі дубінкай, білі электрашокерам па пятках, пагражалі згвалтаваннем. У Дзядка патрабавалі назваць паролі і адміністратараў тэлеграм-каналаў. Затым яго адвезлі ў ізалятар на вул. Акрэсціна, пазней перавялі ў СІЗА на вул. Валадарскага. 

У Мінскім гарадскім судзе 10 лістапада вынеслі прысуд 33-гадоваму палітзняволенаму блогеру і актывісту анархічнага руху Мікалая Дзядка. Суддзя Анастасія Папко прызнала яго вінаватым па трох артыкулах Крымінальнага кодэкса: арт. 342,арт. 361,арт. 295-3і прызначыла пакаранне ў выглядзе пяці гадоў пазбаўлення волі ва ўмовах агульнага рэжыму. Менавіта такое пакаранне запрашваў пракурор Антон Цюменцаў. Мікалай не прызнаў віну ні па ніводным артыкуле. Год ён утрымліваецца пад вартай.

У канцы лістапада 2021 стала вядома аб пераводзе Мікалая з СІЗА-1 у магілёўскую Следчую турму №4. Пасля спаткання з сынам Аляксандр Дзядок распавёў аб ціску на Мікалая з боку адміністрацыі турмы.

16 снежня 2021 адміністрацыя магілёўскай турмы №4 паставіла Міколу на прафілактычны ўлік як "схільнага да суіцыду і членашкодніцтва". У лісце з турмы Мікола распавёў, што на Новы год яго змясцілі ў карцар, але прычына і тэрмін пакарання невядомыя.

25 студзеня 2022 года калегія Вярхоўнага суда ў складзе Уладзіміра Давыдава, Андрэя Кавальчука і Мікалая Грынцэвіча разглядзела апеляцыйную скаргу на прысуд Міколы Дзядка і пакінула яе без задавальнення, а прысуд — без зменаў.

12 лютага 2022 Мікола быў пераведзены з Турмы №4 у папраўчую калонію №9. Адразу пасля этапу адміністрацыя калоніі пачала ціснуць на палітвязня: прызначыла так званую нізкастатусную працу; пасля адмовы Міколы яе выконваць, бо гэта аўтаматычна пераводзіла б яго ў той самы нізкі статус, змясціла яго на 7 сутак у штрафны ізалятар; пазбавіла доўгатэрміновага спаткання і зменшыла атаварку да 2 базавых. Таксама ёсць праблемы з ліставаннем.

10 сакавіка 2022 Мікола адмовіўся ад працы на знак пратэсту супраць пазбаўлення яго ліставання і пераследу тых асуджаных, якія камунікуюць з палітвязнем. Адміністрацыя за гэта пакарала Дзядка чатырма месяцамі ў памяшканні камернага тыпу (ПКТ). А двух асуджаных, якія працягвалі з ім камунікаваць, змясцілі ў ШІЗА. 

У судзе Горацкага раёна 28 чэрвеня 2022 г. разглядзелі справу "аб пераводзе Мікалая Дзядка ў папраўчую ўстанову іншага тыпу і змене ўмоваў рэжыму". Суддзя Станіслаў Ляшэнка пастанавіў перавесці Мікалая на турэмны рэжым тэрмінам на 2 гады і 10 месяцаў. На пачатку ліпеня Міколу перавялі з ПК № 9 у гродзенскую Турму № 1.

Сваякі паведамілі, што 23 жніўня — у Дзень народзінаў — адміністрацыя гродзенскай турмы працягнула Мікалаю тэрмін у штрафным ізалятары, дзе ён знаходзіўся прынамсі паўтара месяца.

У студзені і лютым 2023 г. адміністрацыя Турмы № 1 з невядомых прычынаў змяшчала палітвязня на 7 сутак у ШІЗА.

24 красавіка 2023 г. ён выйшаў з ШІЗА, дзе правёў 10 сутак за тое, што лёг спаць на некалькі хвілін раней, чым дазволена.

Мікалай павінен быў выйсці з турмы 25 красавіка 2025 года, але супраць яго ўзбудзілі новую крымінальную справу паводле ч. 1 арт. 411 Крымінальнага кодэкса (злоснае непадпарадкаванне адміністрацыі турмы). 

У сярэдзіне кастрычніка 2024 г. стала вядома, што Мікола чацвёрты месяц знаходзіцца ў ШІЗА.

Супраць палітвязня Міколы Дзядка ў турме ўзбудзілі новую крымінальную справу

Палітзняволены Мікола Дзядок, асуджаны да пяці гадоў калоніі, павінен быў выйсці з турмы 25 красавіка 2025 года, але супраць яго ўзбудзілі новую крымінальную справу паводле ч. 1 арт. 411 Крымінальнага кодэкса (злоснае непадпарадкаванне адміністрацыі турмы). Цяпер яму пагражае ад аднаго да трох гадоў зняволення. Пра гэта "Новаму Часу" распавялі крыніцы.

"Гэта чалавек са стальным стрыжнем"

Гісторыю палітзняволенага журналіста Мікалая Дзядка распавядаюць ягоныя калегі.

Вярхоўны суд пакінуў у сіле прысуд палітвязню Міколу Дзядку

Апеляцыйную скаргу Міколы Дзядка разглядала судовая калегія Вярхоўнага суда, у якую ўваходзілі суддзі Уладзімір Давыдаў, Андрэй Кавальчук і Мікалай Грынцэвіч. У пасяджэнні прыняў удзел пракурор Генеральнай пракуратуры Андрэеў. Калегія пакінула скаргу без задавальнення, а прысуд — без зменаў.

У Мікалая Дзядка і Сцяпана Латыпава з’явіліся “хросныя” ў Швейцарыі і Вялікабрытаніі

У межах кампаніі салідарнасці #WeStandBYyou, арганізаванай праваабарончай арганізацыяй Libereco, дэпутатка швейцарскага парламента Тамара Фунічэла і лорд Фоўлкс з брытанскай Палаты лордаў сталі “хроснымі” беларускіх палітвязняў Мікалая Дзядка і Сцяпана Латыпава.

Бацька Мікалая Дзядка падаў заяву ў Следчы камітэт па факце збіцця і катаванняў над сынам

Бацька Мікалая падаў у Следчы камітэт заяву аб узбуджэнні крымінальнай справы па факце збіцця сына. Аляксандр Дзядок патрабуе прыцягнення да адказнасці ўсіх, хто "ажыццяўляў незаконнае затрыманне Мікалая, збіваючы яго і ужываючы да яго катаванні, як у кватэры, так і ў будынку ГУБАЗіКа, прымушаючы яго гаварыць на камеру прызнальныя паказанні пад сцягам".

"Пагражалі згвалтаваць, сказалі, што завязуць у гестапа ці ў лес". Аповед Мікалая Дзядка, перададзены на волю

Ад чалавека, з якім у Дзядка атрымалася пагаварыць у ізалятары на Акрэсціна, сталі вядомыя падрабязнасці затрымання Мікалая Дзядка.

Палітзняволенага Мікалая Дзядка асудзілі да пяці гадоў калоніі

У Мінскім гарадскім судзе 10 лістапада вынеслі прысуд 33-гадоваму палітзняволенаму блогеру і актывісту анархічнага руху Мікалая Дзядка.

Абарона Дзядка: Прыналежнасць да анархічнага руху не можа выкарыстоўвацца як дыскрымінацыйная падстава пры вынясенні прысуду

3 лістапада абаронца палітвязня Святлана Гарбаток выступіла ў судовых спрэчках з прамовай. "Вясна" публікуе выступ адвакаткі ў судзе.

Пяць гадоў калоніі — пракурор запрасіў пакаранне для палітвязня Мікалая Дзядка

У Мінскім гарадскім судзе 3 лістапада аднавіўся суд па крымінальнай справы супраць 33-гадовага палітзняволенага блогера і актывіста анархічнага руху Мікалая Дзядка.

Па справе Мікалая Дзядка прызначылі судовую псіха-лінгвістычную экспертызу. У судзе абвешчаны перапынак на час яе правядзення

У Мінскім гарадскім судзе 5 ліпеня працягваецца суд па крымінальнай справы супраць 32-гадовага палітзняволенага блогера і актывіста анархічнага руху Мікалая Дзядка.

Душылі падушкай, засоўвалі бутэльку ў рот. На судзе палітвязень Дзядок распавёў пра катаванні і збіццё

У Мінскім гарадскім судзе 1 ліпеня адбываецца другое пасяджэнне па крымінальнай справы супраць 32-гадовага палітзняволенага блогера і актывіста анархічнага руху Мікалая Дзядка.

У Мінгарсудзе пачалі судзіць палітзняволенага Мікалая Дзядка. Ён не прызнае віну

Мікола будзе дапытаны напрыканцы судовага следства пасля допыту сведак і даследавання ўсіх матэрыялаў справы.

Раней Мікалай Дзядок ужо быў палітычным зняволеным. 3 верасня 2010 года ён быў затрыманы ў справе аб «нападзе на амбасаду Расейскай Фэдэрацыі». Быў абвінавачаны таксама ва ўдзеле ў несанкцыянаванай акцыі каля Генеральнага штабу Узброеных сіл Беларусі. 27 траўня 2011 года яго асудзілі на 4,5 года пазбаўлення волі. Адбываў пакаранне ў магілёўскай турме № 4, шклоўскай і бабруйскай калоніях. У лістападзе 2014 года, за 3 месяцы да сканчэння тэрміну, на яго завялі новую крымінальную справу за «парушэнне рэжыму адбывання пакарання». 26 лютага 2015 года суд працягнуў зняволенне на 1 год і 3 дні. Перавялі ў папраўчую калонію № 9 у Горках. Вызвалены праз памілаванне.