Канстанцін Анатольевіч Рудніцкі — былы студэнт БрДТУ: адлічаны з ВНУ падчас знаходжання пад вартай. Ён быў затрыманы 2 снежня 2021 года за тое, што стварыў адну кнопку для сайту "Чорная мапа Беларусі". Яму было прад'яўлена абвінавачванне ажно па 5 артыкулах Крымінальнага кодэксу:

• ч. 6 арт. 16 арт. 365 — Саўдзел ва ўмяшанні ў дзейнасць супрацоўніка органаў унутраных спраў;
• ч. 6 арт. 16 арт. 364 — Саўдзел у гвалце альбо пагрозе ўжывання гвалту ў дачыненні да супрацоўніка органаў унутраных спраў;
• ч. 1 арт. 366 — Гвалт альбо пагроза ў дачыненні да службовай асобы, якая выконвае службовыя абавязкі, ці іншай асобы, якая выконвае грамадскі абавязак;
• ч. 3 арт. 203-1 — Незаконныя дзеянні ў дачыненні да інфармацыі аб прыватным жыцці і персанальных дадзеных;
• арт. 369 — Абраза прадстаўніка ўлады.

13 траўня 2022 г. у Маскоўскім судзе Брэста распачаўся разгляд справы Канстанціна. Падчас судовага разгляду артыкулы, якія ставіліся яму ў віну, былі змененыя: з ранейшых застаўся ч. 3 арт. 203-1 (незаконныя дзеянні ў дачыненні да інфармацыі аб прыватным жыцці і персанальных дадзеных) і быў дададзены ч. 3 арт. 130 (распальванне варожасці ці варажнечы). Далейшы разгляд справы працягнецца 28 чэрвеня 2022 г. у Брэсцкім абласным судзе.

Рудніцкага будуць судзіць нанова. Яму змянілі артыкулы

Чатыры прыбралі — але адзін вельмі сур'ёзны дадалі. 28 чэрвеня 2022 у Брэстаблсудзе нанова пачнуць судзіць 23-гадовага палітвязня. Нагадаем, у траўні 2022 ягоную справу разглядаў Маскоўскі суд Брэста, Канстанціна Рудніцкага судзілі за напісанне адной кнопкі для сайта "Чорная мапа Беларусі".