Канстанцін Анатольевіч Рудніцкі — былы студэнт БрДТУ: адлічаны з ВНУ падчас знаходжання пад вартай. Ён быў затрыманы 2 снежня 2021 года за тое, што стварыў адну кнопку для сайту "Чорная мапа акупантаў". Змешчаны ў СІЗА-7.

Хлопцу першапачаткова выставілі абвінавачванне ажно паводле пяці артыкулаў Крымінальнага кодэксу: ч. 6 арт. 16 і арт. 364 (дапамаганне ў гвалце альбо пагрозе ўжывання гвалту ў дачыненні да супрацоўніка органаў унутраных спраў); ч. 6 арт. 16 і арт. 365 (дапамаганне ва ўмяшанні ў дзейнасць супрацоўніка органаў унутраных спраў); ч. 6 арт. 16 і ч. 1 арт. 366 (дапамаганне ў пагрозе гвалтам у дачыненні да службовай асобы, якая выконвае службовыя абавязкі); ч. 6 арт. 16 і арт. 369 (стварэнне ўмоваў для абразы прадстаўніка ўлады ў сувязі з выкананнем ім службовых абавязкаў); ч. 6 арт. 16 і ч. 3 арт. 203-1 (дапамаганне ў незаконным зборы, прадастаўленні і распаўсюдзе інфармацыі аб персанальных дадзеных іншай асобы без яго згоды, што пацягнула прычыненне істотнай шкоды правам, свабодам і законным інтарэсам грамадзяніна, учыненых у дачыненні да асобы ў сувязі з ажыццяўленнем ім службовай дзейнасці і выкананнем грамадскага абавязку).

13 траўня 2022 г. распачаўся працэс па справе Канстанціна. Падчас судовага разгляду яго дзеянні перакваліфікавалі на ч. 6 арт. 16 і ч. 3 арт. 203-1 (дапамаганне ў незаконных дзеяннях з персанальнымі звесткамі) і ч. 6 арт. 16 і ч. 3 арт. 130 (дапамаганне ў распальванні варожасці) Крымінальнага кодэкса. Адразу справу разглядалі ў судзе Маскоўскага раёна Брэста: суддзёй выступаў Яўген Брэган, а пракурорам — Вадзім Багатка, але потым справу перадалі ў Брэсцкі абласны суд і суддзёй прызначылі Кацярыну Груду, а пракурорам — Аляксандра Богуша.

У выніку 12 ліпеня 2022 г. суддзя Кацярына Груда прызначыла палітвязню шэсць гадоў калоніі ва ўмовах узмоцненага рэжыму і штраф у 100 базавых велічыняў (3 200 рублёў).

У кастрычніку 2022 г. КДБ уключыў Канстанціна ў спіс "асобаў, датычных да тэрарыстычнай дзейнасці".

Быў унесены ў пералік грамадзян Беларусі, замежных грамадзян і асоб без грамадзянства, якія маюць дачыненне да экстрэмісцкай дзейнасці.

Месца адбывання пакарання ўдакладняецца.

Экс-студэнта асудзілі да 6 гадоў калоніі за "стварэнне віртуальнай кнопкі" на сайце "Чорнай карты акупантаў"

"Мне было цікава атрымаць пэўны вопыт у праграмаванні. Ніякага ўзнагароджання ад заказчыка я не атрымліваў. Прызнаю, што паддаўся эмоцыям і хацеў дапамагчы апублікаваць інфармацыю пра людзей, якія незаконна затрымлівалі іншых людзей. Але ніякага злога намеру ў мяне не было. Так, мае дзеянні ў гэтай частцы былі неправамернымі. Гэта я таксама прызнаю".

Рудніцкага будуць судзіць нанова. Яму змянілі артыкулы

Чатыры прыбралі — але адзін вельмі сур'ёзны дадалі. 28 чэрвеня 2022 у Брэстаблсудзе нанова пачнуць судзіць 23-гадовага палітвязня. Нагадаем, у траўні 2022 ягоную справу разглядаў Маскоўскі суд Брэста, Канстанціна Рудніцкага судзілі за напісанне адной кнопкі для сайта "Чорная мапа Беларусі".