Дзмітрый Барысавіч Гулін — былы ваенны, тапограф. 15 снежня 2023 года Брэсцкае дзяржсмі апублікавала відэаролік пра яго затрыманне. Сілавікі называюць Дзмітрыя “агентам украінскіх спецслужбаў”. Былы вайсковец нібыта паведамляў украінскім вайскоўцам аб размяшчэнні расійскіх частак на тэрыторыі Беларусі. Як мяркуецца, затрыманы за ўдзел у пратэстных чатах. У фільме, знятым праўладным тэлеканалам, сцвярджаецца, што Зміцер нібыта ў 2020 зняў ролік-зварот да вайскоўцаў і сілавікоў, а яшчэ праз год звязаўся з арганізацыяй "Буслы ляцяць". Таксама, па версіі тэлеканала, Гулін маніторыў чаты "Брэст-97", "Гомель-97", "Калінкавічы", "Лунінец" і сам актыўна пакідаў там каментарыі.

Дзмітрыю былі прад'яўленыя абвінавачванні паводле артыкулаў Крымінальнага кодэкса:

• арт. 361 — заклікі да дзеянняў, скіраваных на прычыненне шкоды нацыянальнай бяспецы Рэспублікі Беларусь
• арт. 368 — абраза Лукашэнкі
• арт. 366 — гвалт альбо пагроза ў дачыненні да службовай асобы, якая выконвае службовыя абавязкі, ці іншай асобы, якая выконвае грамадскі абавязак
• арт. 130 — распальванне варожасці ці варажнечы
• арт. 356 — здрада дзяржаве
• арт. 367 — паклёп у дачыненні да Лукашэнкі

З 12 па 29 верасня 2023 года яго справу разглядала суддзя Бандарэнка Святлана. Рашэнне суда 29 верасня 2023 года: 14 гадоў пазбаўлення волі ў калоніі ўзмоцненага рэжыму.

Паколькі Дзмітрый 1 год і 3 месяцы правёў да суда ў СІЗА, тэрмін быў пералічаны з улікам адбытага, у выніку засталося 12 гадоў пазбаўлення.

Адбывае тэрмін у ПК-3. 

1 сакавіка 2024 унесены МУС у "спіс экстрэмістаў".

Былога вайскоўца судзяць за перадачу ўкраінцам інфармацыі пра расейскія войскі

Сёння ў Мінскім гарадскім судзе пачалі судзіць Дзмітрыя Гуліна — ваеннага ў адстаўцы, якога абвінавачваюць у дзейнасці на карысць украінскіх спецслужбаў. Працэс вядзе суддзя Святлана Бандарэнка.