Аніта Алегаўна Бакуновіч спярша была затрыманая 23 лютага 2022 года. Ёй прад'явілі абвінавачанні паводле арт. 342 Крымінальнага кодэкса і змясцілі ў СІЗА на Валадарскага.

У 2020 годзе дзяўчына заняла трэцяе месца ў рэспубліканскай алімпіядзе па геаграфіі.

У судзе Савецкага раёна Мінска 30 чэрвеня 2022 г. Аніце прысудзілі 2 гады абмежавання волі без накіравання ў папраўчую ўстанову. Дзяўчыну адпусцілі з-пад варты.

Аніту ізноў затрымалі 21 верасня 2022 г. на Гродзеншчыне падчас перасячення беларуска-літоўскай мяжы, з 24 верасня дзяўчына знаходзілася ў СІЗА КДБ. Пасля яе перавялі ў СІЗА-1 на Валадарскага.

Напрыканцы снежня яе змясцілі ў гродзенскую Турму № 1.

Палітзняволенай выставілі абвінавачванні паводле ч. 3 арт. 361-1 КК (удзел у экстрэмісцкім фармаванні), ч. 1 арт. 14 і ч. 3 арт. 371 КК (замах на незаконнае перасячэнне мяжы).

Справу пачалі разглядаць 13 сакавіка 2023 г. у Гродзенскім абласным судзе. Суддзя Віктар Сянько 5 красавіка 2023 г. прызначыў Мікалаю Куляшову пяць гадоў калоніі, Аніце Бакуновіч — тры з паловай гады зняволення і штраф у памеры 100 базавых велічынь, Ягору Курзіну — тры гады калоніі. 

21 ліпеня 2023 г. у Вярхоўным судзе адбудзецца разгляд апеляцыйнай скаргі. Суддзя Таццяна Васілевіч.

7 жніўня 2023 г. Аніту перавялі з Турмы № 1 у ПК № 4 для адбывання пакарання.

Да пяці гадоў калоніі. У Гродне асудзілі трох чалавек за эвакуацыю з Беларусі і супрацоўніцтва з "Дапамогай"

У Гродзенскім абласным судзе 5 красавіка вынеслі прысуд былому мытніку Мікалаю Куляшову, двойчы палітзняволенай Аніце Бакуновіч і студэнту Ягору Курзіну. Іх абвінавацілі ў "замаху на незаконнае перасячэнне мяжы", "удзеле ў "экстрэмісцкім фармаванні" — арганізацыі "Дапамога", а таксама па шэрагу іншых артыкулах Крымінальнага кодэкса. Суддзя Віктар Сянько прызначыў Мікалаю Куляшову пяць гадоў калоніі, Аніце Бакуновіч — тры з паловай гады зняволення, Ягору Курзіну — тры гады калоніі.

Былыя мытнік, палітзняволеная і студэнт. У Гродне распачаўся суд за спробу эвакуявацца з Беларусі

"Вясна" распавядае, што вядома пра справу і яе фігурантаў.

Як пераследуюць сям'ю палітзняволенай Аніты Бакуновіч

18-гадовую палітзняволеную Аніту Бакуновіч затрымалі 3 месяцы таму. Зранку дзверы ў кватэру, дзе яна жыла з маці і братам, выламалі невядомыя людзі. Яны не прадставіліся, правялі вобшук і забралі Аніту і яе брата Яна. Спачатку палітзняволеную асудзілі на 15 сутак, якія яна адбывала на Акрэсціна і ў Жодзіне, а ейны брат пасля допытаў у РУУС і ГУБАЗіК трапіў у лякарню ў перадінфарктным стане. Пазней у яго атрымалася сысці адтуль. Пра гісторыю пераследу сям'і «Вясне» распавяла жонка Яна — Хрысціна.