Андрэй Мікалаевіч Лабада — колішні начальнік аддзела Банкаўскага працэсінгавага цэнтра. Яго затрымалі за данаты і каментары ў Telegram.

Ён мінчук, скончыў Беларускі дзяржаўны ўніверсітэт інфарматыкі і радыёэлектронікі ў 1993 годзе. Ад таго часу працаваў у банкаўскай сферы. Вядома, што першым месцам працы стаў Беларусбанк, пазней ён перайшоў у Банкаўскі працэсінгавы цэнтр. Там ён дарос да начальніка аднаго з аддзелаў, піша «Наша Ніва».

Андрэя затрымалі вясной. 12 красавіка 2024 году яму прысудзілі адміністрацыйны арышт за «распаўсюд экстрэмісцкіх матэрыялаў». Пасля гэтага супраць яго завялі крымінальную справу.

Суд над Лабадой пачаўся 31 кастрычніка  і працягнуўся 5 лістапада 2024 году ў Мінскім гарадскім судзе. Яго абвінавачваюць у «абразе прадстаўніка ўлады» (арт. 369 КК) і «фінансаванні экстрэмісцкай дзейнасці» (ч. 1 і 2 арт. 361-2 КК). Судзіць яго будзе суддзя Аляксандр Рудэнка.