Яўген Анатольевіч Віславух працаваў майстрам у філіяле "Мазырскія электрычныя сеткі" РУП "Гомельэнерга" і быў затрыманы 12 лютага 2022 года ў межах крымінальнай справы, распачатай паводле арт. 130 Крымінальнага кодэксу (Распальванне сацыяльнай варожасці) за каментары ў дачыненні да сілавікоў, а таксама ч. 3 арт. 203-1 (Незаконныя дзеянні ў адносінах да інфармацыі аб прыватным жыцці і персанальных дадзеных) і арт. 369 (Абраза прадстаўніка ўлады).

Мае дваіх малых дзяцей.

19 верасня 2022 г. суддзя Гомельскага абласнога суда Анатоль Сотнікаў прызнаў Яўгена вінаватым і прысудзіў яму 3,5 гады пазбаўлення волі і 4,2 тыс. рублёў штрафу.

23 снежня 2022 г. КДБ уключыў палітвязня ў спіс "асоб, якія маюць дачыненне да тэрарыстычнай дзейнасці".

Быў унесены ў пералік грамадзян Беларусі, замежных грамадзян і асоб без грамадзянства, якія маюць дачыненне да экстрэмісцкай дзейнасці.

13 студзеня 2023 г. у Мазыры разглядалі яшчэ адну справу супраць Яўгена паводле арт. 369 КК. Працэс вяла суддзя Галіна Кніжонак у закрытым рэжыме. Паводле інфармацыі праваабаронцаў, палітвязню прызначылі 1 год і 8 месяцаў зняволення, але выніковы тэрмін пакарання застаўся ранейшы. Таксама суддзя пастанавіла спагнаць з мужчыны 4,2 тыс. рублёў  кампенсацыі маральнай шкоды. Апеляцыйную скаргу на гэты прысуд разглядалі 10 сакавіка 2023 г. у Гомельскім абласным судзе.

Яўгена этапавалі з СІЗА-3 у наваполацкую ПК № 1 у канцы сакавіка 2023 г.

За каментарыі ў інтэрнэце па "справе Зельцэра" асуджаны жыхар Мазыра

Судовыя пасяджэнні праводзіліся 26 і 31 жніўня, затым 8, 12 і 19 верасня.