Анатоль Уладзіміравіч Валадзько (1967 г.н.) быў затрыманы 15 студзеня 2024 года ў сябе дома з ужываннем гвалту, у тым ліку з электрашокерам. 17 студзеня яго асудзілі па арт. 19.1 КаАП, а пасля арышту перавялі ў СІЗА. 

У выніку яго абвінавачваюць паводле ч. 1 арт. 290-1 (фінансаванне тэрарыстычнай дзейнасці) і арт. 361-2 (фінансаванне дзейнасці экстрэмісцкага фармавання). Паводле сукамерніка Анатоля Валадзько, той адмовіўся выплачваць "ахвяраванні", якія супрацоўнікі КДБ пад пагрозамі прапаноўваюць выплаціць тым, хто рабіў данаты. Наогул мужчына не прызнаў сваёй віны. 

Утрымліваўся ў СІЗА № 1.

11 чэрвеня 2024 г. асуджаны на 8 год і 6 месяцаў пазбаўлення волі ў калоніі агульнага рэжыму. 

27 жніўня 2024 г. у Анатоля адбыўся разгляд апеляцыйнай скаргі. Старшыня судовай калегіі Мікалай Грынцэвіч. Прысуд набыў моц.

У верасні 2024 г. унесены КДБ у "спіс тэрарыстаў". 

13 верасня 2024 года быў унесены ў пералік грамадзян Беларусі, замежных грамадзян і асоб без грамадзянства, якія маюць дачыненне да экстрэмісцкай дзейнасці.

Адбывае тэрмін у ПК № 15. 

У Мінску за данаты судзяць айцішніка. Яго сукамернік распавёў падрабязнасці затрымання

У Мінскім гарадскім судзе 6 чэрвеня 2024 года распачаўся чарговы суд за данаты над 56-гадовым праграмістам Анатолем Валадзько. Яго абвінавачваюць паводле ч. 1 арт. 290-1 (фінансаванне тэрарыстычнай дзейнасці) і арт. 361-2 (фінансаванне дзейнасці экстрэмісцкага фармавання). Мужчыне пагражае да 12 гадоў зняволення. Справу разглядае Алена Ананіч. Яго сукамернік з Цэнтра ізаляцыі правапарушальнікаў на Акрэсціна распавёў "Вясне" падрабязнасці яго затрымання.