Аляксей Дзмітрыевіч Багдзей нарадзіўся і жыў у Гродне, скончыў музычную школу па класе домры, добра спяваў. Быў прызёрам музычных конкурсаў. Пасля хлопец паступіў у Гродзенскі дзяржаўны ўніверсітэт імя Янкі Купалы, на факультэт матэматыкі і інфарматыкі. У ягоных сацсетках пазначана, што ён пры гэтым працаваў барменам у забаўляльным цэнтры.

На пачатку ліпеня 2022 г. Аляксея прызналі вінаватым у арганізацыі масавых беспарадкаў, якія суправаджаліся гвалтам над асобай, пагромамі, падпаламі, знішчэннем маёмасці або узброеным супрацівам прадстаўнікам улады.

Справу разглядаў суддзя Максім Галубовіч. Суд пастанавіў прызнаць Багдзея вінаватым у падрыхтоўцы да арганізацыі масавых беспарадкаў паводле ч. 1 арт. 13  і ч. 1 арт. 293 Крымінальнага кодэкса і прызначыў яму пакаранне ў выглядзе пазбаўлення волі на тэрмін шэсць гадоў з адбываннем пакарання ў папраўчай калоніі ва ўмовах ўзмоцненага рэжыму.

14 чэрвеня 2022 г. Аляксея Багдзея КДБ ўнёс ў спіс асобаў, датычных да тэрарыстычнай дзейнасці.

4 жніўня 2022 года ў Гродзенскім абласным судзе адбыўся разгляд апеляцыйнай скаргі Багдзея: прысуд пакінуты без зменаў, а скарга — без задавальнення. Праз тры тыдні Аляксея перавялі з гродзенскага СІЗА ў папраўчую калонію № 1 у Наваполацку.

За заклікі да супраціву і гвалту гарадзенца асудзілі на шэсць гадоў калоніі ўзмоцненага рэжыму

На пачатку ліпеня суд Ленінскага раёна Гродна вынес суровы прысуд 21-гадоваму Аляксею Багдзею. Юнака прызналі вінаватым у арганізацыі масавых беспарадкаў, якія суправаджаліся гвалтам над асобай, пагромамі, падпаламі, знішчэннем маёмасці або узброеным супрацівам прадстаўнікам улады (арт. 293 Крымінальнага кодэкса).