Акіхіра Святаслававіч Гаеўскі-Ханада — актывіст анархісцкага руху, сын супрацоўніцы японскага пасольства і беларуса. Скончыў мінскую гімназію №19. Лаўрэат спецыяльнага фонду па падтрымцы адораных навучэнцаў і студэнтаў. Вучыўся ў БДУ, але затым паступіў у ЕГУ.

Ягоны бацька — беларус Святаслаў Гаеўскі, трэнер па каратэ, родам са Слуцка. Мама — Тамока Ханада, працавала сакратаром па культуры японскай амбасады ў Беларусі.

Быў затрыманы 12 жніўня 2020 года каля 13-й гадзіны на аўтамабільнай паркоўцы.

Спярша яму прад'явілі абвінавачванне па ч. 2 арт. 293 Крымінальнага кодэксу — "Удзел у масавых беспарадках". 28 студзеня 2021 г. стала вядома, што супраць яго, а таксама супраць палітвязняў Аляксандра Францкевіч, Андрэя Чапюка і яшчэ некалькіх чалавек узбуджана крымінальная справа па ч. 1 арт. 285 Крымінальнага кодэкса — "Стварэнне злачыннай арганізацыі альбо кіраўніцтва ёй". У канцы лістапада 2021 г. з'явілася інфармацыя аб тым, што яму інкрымінуюць яшчэ шэраг артыкулаў, у выніку абвінавачванне складалася з наступных артыкулаў Крымінальнага кодэкса: ч. 1 арт. 293 (арганізацыя масавых беспарадкаў); ч. 1 арт. 13 ч. 2 арт. 293 (падрыхтоўка да ўдзелу ў масавых беспарадках); ч. 3 арт. 293 (навучанне асобаў да ўдзелу ў масавых беспарадкаў); ч. 1 арт. 285 (стварэнне і кіраванне злачыннай арганізацыі); ч. 3 арт. 361 (заклікі да дзеянняў, накіраваных на прычыненне шкоды нацыянальнай бяспецы Рэспублікі Беларусь з выкарыстаннем сродкаў масавай інфармацыі або глабальнай камп'ютарнай сеткі Інтэрнэт); ч. 1 арт. 361-1 (стварэнне экстрэмісцкага фарміравання і ўдзел у ім); ч. 1 арт. 342 (арганізацыя групавых дзеянняў, якія груба парушаюць грамадскі парадак, — за "Марш недармаедаў" 5 сакавіка 2017 года); ч. 1 арт. 342 (арганізацыя групавых дзеянняў, якія груба парушаюць грамадскі парадак — за перакрыццё трасы М1 на выездзе з Брэста ў 2018 годзе); ч. 3 арт. 130 (распальванне іншай сацыяльнай варожасці групай асобаў); ч. 2 арт. 339 (злоснае хуліганства — за дымавую шашку, кінутую ў будынак брэсцкага ГУБАЗіКа ў 2016 годзе); арт. 341 (апаганьванне збудаванняў і псаванне маёмасці — за першамайскае графіці ў Брэсце ў 2020 годзе); ч. 3 арт. 218, ч. 3 арт. 339, ч. 2. арт. 295-3 (незаконныя дзеянні ў дачыненні да прадметаў, дзеянне якіх заснаванае на выкарыстанні гаручых рэчываў, учыненыя групай асоб, — за падпал гомельскай падатковай інспекцыі і рэкламнага шчыта ўпраўлення прымусовага выканання пакарання ў Івацэвічах у 2017 годзе).

11 студзеня 2022 справу, матэрыялы якой складаюць 160 тамоў, перадалі ў пракуратуру.

25 красавіка 2022 года ў Мінскім гарадскім судзе пачаўся разгляд справы. Паводле хадайніцтва пракурора Рамана Бізюка суддзя Сяргей Хрыпач закрыў працэс. Прычына — "у матэрыялах крымінальнай справы ёсць матэрыялы экстрэмісцкай скіраванасці".

Праз 4,5 месяцы, 6 верасня 2022 г., быў вынесены прысуд Акіхіру: 16 гадоў калоніі ва ўмовах узмоцненага рэжыму і штраф у памеры 700 базавых велічыняў (22 400 беларускіх рублёў ці больш за 8 800 даляраў).

28 лютага 2023 г. у Вярхоўным судзе ў закрытым рэжыме адбыўся разгляд апеляцыйных скаргаў. Судовая калегія пад старшынствам суддзі Аляксея Рыбакова пакінула без задавальнення скаргі шасці фігурантаў, а тэрміны вясноўцаў Марфы Рабковай і Андрэя Чапюка, а таксама актывістаў анархісцкага руху Акіхіры Гаеўскага-Ханады і Аляксандра Францкевіча былі скарочаныя на тры месяцы. Такім чынам, канчатковы тэрмін зняволення Акіхіра — 15 гадоў і 9 месяцаў калоніі ва ўмовах узмоцненага рэжыму.

У сярэдзіне сакавіка 2023 г. стала вядома, што палітзняволенага этапавалі ў шклоўскую ПК № 17.

16 сакавіка КДБ уключыў палітзняволенага ў "тэрарыстычны спіс".

26 траўня 2023 года быў унесены ў пералік грамадзян Беларусі, замежных грамадзян і асоб без грамадзянства, якія маюць дачыненне да экстрэмісцкай дзейнасці.

У пачатку чэрвеня 2024 г. стала вядома, што палітвязня змясцілі ў ПКТ на 4 месяцы.

Як стала вядома ад зняволенага, які выйшаў з папраўчай калоніі №17, яшчэ летам Акіхіра перавялі на турэмны рэжым. Разгляд аб пераводзе ў папраўчую ўстанову адбыўся ў судзе Шклоўскага раёна 18 ліпеня 2024 г. Вырак агучыў Аляксандр Тараканаў. 

Акіхіра пераведзены ў турму № 4. 

"Такое прадстаўленне не вартае нават пухавіцкага палаца культуры", — Акіхіра Гаеўскі-Ханада ў апошнім слове

Праваабаронцам перадалі прамову, якую 22-гадовы палітвязень Акіхіра Гаеўскі-Ханада падрыхтаваў да апошняга слова.

Вясноўцам Марфе — 15 гадоў калоніі, Андрэю — 6: агучаны прысуды адразу дзесяці палітзняволеным

Суд у закрытым рэжыме цягнуўся чатыры з паловай месяцы — агулам прайшло 70 працэсаў па 158 тамах матэрыялаў крымінальнай справы. Пракурор Раман Бізюк запрасіў тэрміны фігурантам справы: ад пяці да 17 гадоў калоніі. Прысуды 6 верасня абвясціў суддзя Сяргей Хрыпач — ён прызначыў менавіта столькі, колькі запатрабавала дзяржабвінавачванне.

На "палітычных" судах ігнаравалі заявы пра катаванні. Што вядома пра суддзю і пракурора па справе над Марфай Рабковай і яшчэ 9 палітвязнямі

"Вясна" распавядае, што вядома пра крымінальныя справы супраць палітвязняў, якія вялі суддзя Сяргей Хрыпач і пракурор Раман Бізюк.

Суд над вясноўцамі Марфай Рабковай, Андрэем Чапюком і яшчэ 8 палітвязнямі зрабілі закрытым

На працэсе толькі Андрэй Чапюк заявіў адвод суддзі Сяргею Хрыпачу: "Я двойчы падаваў заяву ў суд аб тым, што па заканчэнні з папярэднім следствам я не змог азнаёміцца з часткай крымінальнай справы, а менавіта, з аўдыё- і відэазапісамі. Калі падаваў хадайніцтва, то мне было адмоўлена ў азнаямленні. У матэрыялах справы 160 тамоў. Пры гэтым, майму абаронцу не было прадастаўлена магчымасці фатаграфаваць. Гэтыя абставіны паказваюць на тое, што суддзя яшчэ да суда парушае маё права на абарону. Дадзеная сітуацыя дае мне права і падставу лічыць, што суддзя асабіста, прама і ўскосна зацікаўлены ў зыходзе гэтай крымінальнай справы". Гаеўскі-Ханада падтрымаў гэтае хадайніцтва.

У Акіхіры Гаеўскага-Ханада з'явілася "хросная"

Клаўдыя Мюлер, сябра Камітэта Бундэстага па справах Еўрапейскага Саюза, стала “хроснай” Акіхіра Гаеўскага-Ханада.

Новым палітвязнем стаў анархіст Акіхіра Гаеўскі-Ханада. Што пра яго вядома?

Акіхіру 20 гадоў. Ён скончыў мінскую гімназію №19. Быў лаўрэатам спецыяльнага фонда па падтрымцы адораных навучэнцаў і студэнтаў. Вучыўся ў БДУ, але пасля паступіў у ЕГУ.