Андрэй Сяргеевіч Чапюк — валанцёр Праваабарончага цэнтру "Вясна". Быў затрыманы 2 кастрычніка 2020 года ў Мінску супрацоўнікамі ГУБАЗіК.

Уся дзейнасць Андрэя Чапюка насіла выключна мірны, праваабарончы характар і была накіраваная на дапамогу людзям, якія пакутуюць за свае палітычныя погляды і перакананні, за абарону сваіх правоў.

9 кастрычніка 2020 года Андрэю было прад'яўленае абвінавачванне па ч. 2 арт. 293 Крымінальнага кодэкса — "Удзел у масавых беспарадках". 28 студзеня 2021 стала вядома, што супраць яго, а таксама супраць палітвязняў Акіхіра Гаеўскага-Ханады, Аляксандра Францкевіча і яшчэ некалькіх чалавек узбуджана крымінальная справа па ч. 2 арт. 285 Крымінальнага кодэксу — "Удзел у злачыннай арганізацыі ў любой іншай форме".

У выніку Андрэю выставілі абвінавачванне паводле наступных артыкулаў Крымінальнага кодэксу: ч. 1 арт. 13 ч. 2 арт. 293 (падрыхтоўка да ўдзелу ў масавых беспарадках); ч. 2 арт. 285 (удзел у злачыннай арганізацыі); ч. 1 арт. 130 (распальванне іншай сацыяльнай варожасці); арт. 341 (апаганьванне збудаванняў і псаванне маёмасці — за графіці супраць Еўрапейскіх гульняў у 2019 годзе).

11 студзеня 2022 справу, матэрыялы якой складаюць 160 тамоў, перадалі ў пракуратуру.

25 красавіка 2022 года ў Мінскім гарадскім судзе пачаўся разгляд справы. Паводле хадайніцтва пракурора Рамана Бізюка суддзя Сяргей Хрыпач закрыў працэс. Прычына — "у матэрыялах крымінальнай справы ёсць матэрыялы экстрэмісцкай скіраванасці".

Праз 4,5 месяцы, 6 верасня 2022 г., быў вынесены прысуд Андрэю: 6 гадоў калоніі ва ўмовах узмоцненага рэжыму і штраф у памеры 500 базавых велічыняў (16 000 беларускіх рублёў ці больш за 6 300 даляраў).

28 лютага 2023 г. у Вярхоўным судзе ў закрытым рэжыме адбыўся разгляд апеляцыйных скаргаў. Судовая калегія пад старшынствам суддзі Аляксея Рыбакова пакінула без задавальнення скаргі шасці фігурантаў, а тэрміны вясноўцаў Марфы Рабковай і Андрэя Чапюка, а таксама актывістаў анархісцкага руху Акіхіры Гаеўскага-Ханады і Аляксандра Францкевіча былі скарочаныя на тры месяцы. Такім чынам, канчатковы тэрмін зняволення Андрэя — 5 гадоў і 9 месяцаў калоніі ва ўмовах узмоцненага рэжыму.

У сярэдзіне сакавіка 2023 г. Андрэя этапавалі ў івацэвіцкую ПК № 22.

16 сакавіка 2023 г. КДБ уключыў палітзняволенага ў "тэрарыстычны спіс".

26 траўня 2023 г. МУС унесла палітзняволенага ў "экстрэмісцкі спіс".

16 жніўня 2024 году ў Андрэя мусіла адбыцца спатканне з бацькамі ў калоніі, але 14 жніўня яго на 10 дзён змясцілі ў штрафны ізалятар. Прычынай стала "парушэнне формы адзення". 

Валанцёра "Вясны" Андрэя Чапюка змясцілі ў ШІЗА за дзень да спаткання з бацькамі

Палітвязень Андрэй Чапюк з сакавіка 2023 года адбывае тэрмін у івацэвіцкай калоніі № 22.

Міжнародная супольнасць адрэагавала на прысуд Марфы Рабковай і Андрэя Чапюка

Міжнародная супольнасць адрэагавала на прысуд праваабаронцы Марфы Рабковай, валанцёра "Вясны" Андрэя Чапюка і яшчэ васьмі палітвязняў, якіх 6 верасня агулам пакаралі 94 гадамі пазбаўлення волі.

Андрэй Чапюк у апошнім слове: "Праўда, аб'ектыўнасць і справядлівасць мацнейшыя за бандыцкія метады МУС і КДБ"

"Я ведаю, што кожны ў хуткім часе адкажа за свае дзеянні, за свае рашэнні перад грамадствам. Не трэба гэта расцэньваць як пагрозу. Рэальнасць паказвае, што праўда, аб'ектыўнасць і справядлівасць мацнейшыя за бандыцкія метады МУС і КДБ. Людзі не палохаюцца ўстаць на шлях барацьбы за правы! Бо законы, працэсуальныя нормы можна трактаваць у сабе зручны бок. А можна і зусім на іх не звяртаць увагі, бо «высокі суд» сам дае ацэнку чаму-небудзь".

Вясноўцам Марфе — 15 гадоў калоніі, Андрэю — 6: агучаны прысуды адразу дзесяці палітзняволеным

Суд у закрытым рэжыме цягнуўся чатыры з паловай месяцы — агулам прайшло 70 працэсаў па 158 тамах матэрыялаў крымінальнай справы. Пракурор Раман Бізюк запрасіў тэрміны фігурантам справы: ад пяці да 17 гадоў калоніі. Прысуды 6 верасня абвясціў суддзя Сяргей Хрыпач — ён прызначыў менавіта столькі, колькі запатрабавала дзяржабвінавачванне.

Спорт, рэжым і бабуліны “шкарпэтоны”. Як жыве Андрэй Чапюк на Валадарцы?

На пачатку лютага 2021 г. у СІЗА-1 трапіў і праваабаронца Алег Граблеўскі. Ён правёў там амаль паўгода, і большую частку — у адной камеры з Андрэем Чапюком. Як жыве Андрэй Чапюк на Валадарцы? Успамінамі пра гэта Алег Граблеўскі падзяліўся з “Вясной”.

На "палітычных" судах ігнаравалі заявы пра катаванні. Што вядома пра суддзю і пракурора па справе над Марфай Рабковай і яшчэ 9 палітвязнямі

"Вясна" распавядае, што вядома пра крымінальныя справы супраць палітвязняў, якія вялі суддзя Сяргей Хрыпач і пракурор Раман Бізюк.

Суд над вясноўцамі Марфай Рабковай, Андрэем Чапюком і яшчэ 8 палітвязнямі зрабілі закрытым

На працэсе толькі Андрэй Чапюк заявіў адвод суддзі Сяргею Хрыпачу: "Я двойчы падаваў заяву ў суд аб тым, што па заканчэнні з папярэднім следствам я не змог азнаёміцца з часткай крымінальнай справы, а менавіта, з аўдыё- і відэазапісамі. Калі падаваў хадайніцтва, то мне было адмоўлена ў азнаямленні. У матэрыялах справы 160 тамоў. Пры гэтым, майму абаронцу не было прадастаўлена магчымасці фатаграфаваць. Гэтыя абставіны паказваюць на тое, што суддзя яшчэ да суда парушае маё права на абарону. Дадзеная сітуацыя дае мне права і падставу лічыць, што суддзя асабіста, прама і ўскосна зацікаўлены ў зыходзе гэтай крымінальнай справы".

Урад Беларусі адказаў ААН па "справе Вясны": "Крымінальная пераслед не звязаны з іх працай па прасоўванні правоў чалавека"

На сайце Упраўлення Вярхоўнага камісара ААН з’явіўся афіцыйны адказ урада Беларусі на запыт чатырох Спецыяльных дакладчыкаў па факце вобшукаў і затрыманняў праваабаронцаў, прадстаўнікоў НДА і незалежных СМІ, здзейсненых у ліпені 2021 года.

Прачытаў 55 кніг і навучыўся адціскацца на адной руцэ. Чаго за год у СІЗА дасягнуў Андрэй Чапюк

Больш за год валанцёр “Вясны” Андрэй Чапюк утрымліваецца ў СІЗА. За гэты час ён прачытаў 55 кніг, заканспектаваў тры агульныя сшыткі па кнізе па праграмаванні і навучыўся адціскацца на адной руцэ. Ягоная дзяўчына Алена распавядае: прага да ведаў і ўседлівасць заўсёды былі моцнымі бакамі хлопца. Але першае, што яна адзначае, калі просіш яе распавесці пра Андрэя, – ягоную дабрыню і гатоўнасць прыйсці на дапамогу.

Склалі рапарт за сушку ручніка. У СІЗА-1 на валанцёра «Вясны» Андрэя Чапюка працягваецца ціск

Як паведамляюць яго родныя, на мінулым тыдні на "Валадарцы" на яго склалі рапарт аб парушэнні парадку за тое, што ён сушыў ручнік на дужцы нары. Пры гэтым, месцаў для сушкі ў камеры, акрамя адной маленькай батарэі, на усіх арыштантаў няма і яны вымушаныя сушыць свае рэчы, як атрымаецца. Такім чынам ствараюцца ўмовы для таго, каб у патрэбны час можна было пакараць патрэбнага чалавека.

У Стакгольме прайшла фотаакцыя ў падтрымку палітзняволеных сябраў “Вясны”

17 лістапада праваабаронцы з “Ostgruppen — Шведскай ініцыятывы за дэмакратыю і правы чалавека” сфатаграфаваліся з банерам і фотаплакатамі палітзняволеных “вясноўцаў” у знак салідарнасці і іх падтрымкі.