Уладзіслаў Сяргеевіч Барысаў скончыў юрыдычны каледж, вучыўся на юрфаку БДУ (сышоў на трэцім курсе з фінансавых прычынаў), захапляецца роварамі і фотаздымкамі.

Быў затрыманы 13 верасня 2020 года. Пры затрыманні яго збілі, у доме адбыўся ператрус. Яму прысудзілі адміністрацыйны арышт 13 сутак, аднак пасля іх адбыцця на волю ён не выйшаў. 

Паводле адваката, яму інкрымінавалі першую і другую часткі 293 артыкулу (Арганізацыя і ўдзел у масавых беспарадках), а таксама 342 артыкул Крымінальнага кодэксу (Актыўны ўдзел у групавых дзеяннях, якія груба парушаюць грамадскі парадак). 

Паводле матэрыялаў справы, Уладзіслаў Барысаў, а таксама палітвязні Ян Фалькін, Уладзімір Мацюх і Мікіта Літвіненка, уступіўшы ў змову, планавалі ўдзел у акцыях пратэсту, вызначалі маршрут, узгаднялі дзеянні ў выпадку затрымання. Абвінавачаныя знаходзіліся ў тэлеграм-чаце пад назвай "Гадзіна X", дзе і вялося абмеркаванне. У гэтым чаце, на думку следства, рыхтаваўся напад на супрацоўнікаў міліцыі.

Уладзіслаў Барысаў прызнаны вінаватым паводле ч. 2 арт. 293 КК (Удзел у масавых непарадках), ч. 1 арт. 13 ч. 2 арт. 293 КК (Падрыхтоўка да ўдзелу ў масавых беспарадках), ч. 1 арт. 342 КК (Арганізацыя або актыўны ўдзел у групавых дзеяннях, якія груба парушаюць грамадскі парадак), ч. 1 арт. 14 ч. 1 арт. 342 КК (Падрыхтоўка да групавых дзеянняў, якія груба парушаюць грамадскі парадак). Яму прысудзілі пяць гадоў пазбаўлення волі ў калоніі ўзмоцненага рэжыму.

Знаходзіўся ў Турме № 4, пасля быў пераведзены ў ПК № 15, дзе, як стала вядома ў кастрычніку 2022-га, яго пазбавілі спаткання.

За дым, падшыпнікі, шарыкі з фарбай чацвёра мінчан атрымалі ад трох з паловай да пяці гадоў калоніі

19 ліпеня ў судзе Цэнтральнага раёна Мінска вынесены прысуд чатыром менчукам, абвінавачаным па артыкуле 293 Крымінальнага кодэкса (Масавыя беспарадкі) і па артыкуле 342 КК (Арганізацыя ці актыўны ўдзел у групавых дзеяннях, якія груба парушаюць грамадскі парадак). Палітвязні Ян Фалькін, Уладзіслаў Барысаў, Мікіта Літвіненка, а таксама Уладзімір Мацюх атрымалі ад трох з паловай да пяці гадоў калоніі ўзмоцненага рэжыму. Справу разглядала суддзя Вікторыя Шабуня. Бок дзяржабвінавачання прадстаўляў памочнік пракурора Арцём Цвяткоў.

Размаўлялі ў чаце, узгаднялі маршрут і дзеянні пры затрыманні. Новы суд над палітвязнямі ў Мінску

Першага ліпеня ў судзе Цэнтральнага раёна Мінска пачаўся разгляд крымінальнай справы чатырох менчукоў, абвінавачаных па артыкуле 293 Крымінальнага кодэкса (Масавыя беспарадкі) і па артыкуле 342 КК (Арганізацыя ці актыўны ўдзел у групавых дзеяннях, якія груба парушаюць грамадскі парадак). Абвінавачаныя - палітвязні Ян Фалькін, Уладзіслаў Барысаў, Мікіта Літвіненка, а таксама Уладзімір Мацюх. Усе яны знаходзяцца пад вартай і былі дастаўленыя ў суд з СІЗА. Справу разглядае суддзя Вікторыя Шабуня. Бок дзяржабвінавачання прадстаўляе памочнік пракурора Арцём Цвяткоў. "Вясна" з дапамогай валанцёраў вядзе маніторынг судовага працэсу.

«Народу ў вочы глядзець будзе не сорамна!» Гісторыя Уладзіслава Барысава

13 верасня 2020 года – дзень, калі Алена Барысава апошні раз бачыла свайго сына Уладзіслава. Мы паразмаўлялі з маці, якая ўжо 8 месяцаў то з адчаем, то з надзеяй і аптымізмам спрабуе чым-кольвек дапамагчы свайму зняволенаму сыну.