Сяргей Сцяпанавіч Савіч з Пінску быў затрыманы 2 жніўня 2022 года. Сяргею прысудзілі 15 сутак за рэпост з "экстрэмісцкага" Telegram-каналу.

Пасля адміністрацыйнага арышту Сяргей не выйшаў з ІЧУ: спачатку яму прад'явілі ч. 1 арт. 130 КК (Распальванне іншай сацыяльнай варожасці), а потым дадалі яшчэ і абвінавачванні паводле ч. 3 арт. 361-1 КК (Уваходжанне ў склад экстрэмісцкага фармавання).

Яго змясцілі пад варту ў СІЗА-7.

28 лістапада 2022 г. Сяргея прызналі вінаватым паводле ч. 1 арт. 130 КК за каментар у тэлеграм-чаце "Пинск для жизни": такім чынам, згодна з пазіцыяй абвінавачання, мужчына заклікаў да гвалту ў дачыненні да супрацоўнікаў міліцыі. Суддзя Валянціна Куніцкая пагадзілася з пакараннем, якое запатрабаваў дзяржабвінаваўца Аляксей Ярошык, і прызначыла палітвязню тры гады зняволення ў калоніі ва ўмовах агульнага рэжыму.

У сярэдзіне студзеня 2023 г. палітвязня перавялі з брэсцкага следчага ізалятара ў баранавіцкі СІЗА-6.

Вярхоўны суд разгледзеў апеляцыйную скаргу 22 лютага 2023 г.: прысуд паводле ч. 1 арт. 130 КК Сяргею Савічу пакінулі без зменаў.

24 лютага 2023 года МУС уключыла палітвязня ў "спіс экстрэмістаў", а 14 сакавіка 2023 г. КДБ дадаў яго ў "спіс тэрарыстаў".

Палітзняволены адбывае пакаранне ў шклоўскай ПК № 17.

Палітвязня асудзілі на тры гады калоніі за паведамленне ў Telegram

Савіч заявіў, што шкадуе аб тым, што пакінуў такі некарэктны каментар, які супрацоўнікі органаў маглі прыняць на свой рахунак. Ён падкрэсліў, што сам каментар ніяк не звязаны з пратэстамі наогул.