Сяргей Эдуардавіч Канановіч — жыхар Пружанаў, затрыманы 24 сакавіка 2021 года па так званай "справе карагодаў", якая датычыцца акцыі пратэсту 13 верасня 2020 года ў Брэсце. 

У той дзень калона дэманстрантаў выйшла на скрыжаванне праспекта Машэрава і бульвара Касманаўтаў. Рух аўтамабіляў і грамадскага транспарту на ўчастку быў абцяжараны. Людзі спявалі песні, вадзілі карагоды да тых часоў, пакуль не прыехаў вадамёт. Услед за ім выбеглі сілавікі і сталі затрымліваць пратэстоўцаў.

Сяргею было прад'яўлена абвінавачванне па артыкуле 342 Крымінальнага кодэксу (Актыўны ўдзел у групавых дзеяннях, якія груба парушаюць грамадскі парадак). Ён утрымліваўся ў СІЗА-7 Брэста.

У судзе Ленінскага раёна Брэста 30 жніўня 2021 года суддзя Дзмітрый Куроўскі абвясціў прысуды шостай партыі абвінавачаных па "справе карагодаў". З 14 абвінавачаных чатыры ўтрымліваліся да суду пад вартай — іх вызвалілі ў зале суда. Былога тэлевядучага "Беларусь-4" Канстанціна Свідуновіча, Іллю Ягорава, пружанца Сяргея Канановіча і Аляксандра Жука пакаралі паўтара гадамі "хіміі", у СІЗА палітвязняў утрымлівалі з 24 сакавіка.

З 11 снежня 2021 палітвязень пачаў адбываць тэрмін у ПУАТ № 9.

Сяргей цалкам адбыў пакаранне і 25 ліпеня 2022 г. выйшаў на волю.

Новыя затрыманні па "карагоднай справе"

У сераду 24 сакавіка проста на вуліцы крымінальны вышук затрымаў маю малодшую сястру Кацярыну Бровач і яе хлопца Сяргея Канановіча, яны разам хадзілі на абед. Да паловы на дзевятую вечара сядзелі ў СК , у выніку сястра падазраваная па «карагоднай справе» (ч. 1 арт. 342 КК) і пад падпіскай аб нявыездзе, Сяргей Канановіч адпраўлены ў СІЗА на два месяцы (такую меру стрымання па гэтай справе ўжывалі да гэтага часу толькі да Марыны Глазавай, але чаму — ніхто не ведае, а цяпер многіх закрываюць), а з адваката ўзялі падпіску аб неразгалошванні (упершыню такое па гэтай справе).