Сяргей Сяргеевіч Глебка быў затрыманы ў ноч з 1 на 2 сакавіка 2022 г. у Стоўбцах разам з жонкай за падпал бярвення з мэтай перашкоды руху цягнікоў на чыгуначных шляхах. Супраць Сяргея Глебкі распачата крымінальная справа паводле ч. 1 арт. 289 КК (акт тэрарызму) і ч. 4 арт. 309 КК (наўмыснае прывядзенне чыгуначных шляхоў зносін у непрыдатны для эксплуатацыі стан у мэтах учынення акту тэрарызму).

7 ліпеня 2022 г. КДБ увключыў Сяргея Глебку ў спіс "тэрарыстаў".

У Мінскім раённым судзе 17 кастрычніка 2022 г. вынеслі прысуд палітвязню: 11 гадоў калоніі ва ўмовах узмоцненага рэжыму і штраф у 300 базавых велічыняў (9600 рублёў). Справу два месяцы ў адкрытым рэжыме разглядаў суддзя Антон Колабаў. Неўзабаве Сяргея перавялі з СІЗА-1 у жодзінскую СТ № 8.

30 снежня 2022 г. МУС уключыў палітвязня ў "спіс экстрэмістаў".

У студзені 2023 г. стала вядома, што Сяргея перавялі з СТ № 8 у аршанскую папраўчую калонію № 8.

Хацеў перашкодзіць руху цягніку з тэхнікай расейскіх войскаў. "Рэйкавага партызана" са Стоўбцаў асудзілі да 11 гадоў калоніі

Як сцвярджала абвінавачванне, дзеянні Глебкі "стварылі рэальную пагрозу надыходу цяжкіх наступстваў у выглядзе аварыі, пашкоджанні рухомага складу, гібелі альбо траўміравання людзей".

З пачатку вайны затрымалі мінімум 8 "рэйкавых партызанаў": што вядома пра "рэйкавую вайну" ў Беларусі

Пасля пачатку вайны затрымалі мінімум восем беларусаў за падазрэнне ў зрыве графіку руху расейскіх цягнікоў са зброяй і датычных да фізічнага пашкоджання інфраструктуры чыгункі ў Беларусі. "Live. Сообщество железнодорожников Беларуси" 6 сакавіка пісала, што з-за дыверсій ("рэйкавай вайны") і кібер-нападаў на інфраструктуру Беларускай чыгункі, па Беларусі перасталі пераганяць арганізаваныя воінскія эшалоны з тэхнікай і боепрыпасамі расійскіх войскаў. Затрыманым інкрымінуюць падрыхтоўку да акту тэрарызму, ім пагражае да 15 гадоў пазбаўлення волі. "Вясна" распавядае ўсё, што вядома па гэтых справах.