Юлія Аляксандраўна Лаптановіч — шматдзетная маці з Пружанаў, фігурантка "справы карагодаў", узбуджанай пасля акцыі пратэсту 13 верасня 2020 года ў Брэсце. Суддзя Вера Філонік прысудзіла Юліі тры гады абмежавання волі без накіравання ў папраўчую ўстанову адкрытага тыпу ("хатняя хімія"). Дзяржаўнае абвінавачанне падтрымлівалі Генадзь Буры і Вадзім Багатка.

Яе муж Ігар Лаптановіч таксама з'яўляецца палітвязнем — ён атрымаў два з паловай гады калоніі па "карагоднай справе".

Праз некалькі месяцаў пасля вынясення прысуду, 13 кастрычніка 2021 года, дома ў Юліі прайшоў ператрус, пасля якога яе затрымалі ў межах новай крымінальнай справы. Тады жанчыну абвінавацілі ў фінансаванні экстрэмісцкай дзейнасці (арт. 361-2 КК) і ў незаконных дзеяннях у дачыненні да інфармацыі аб прыватным жыцці і персанальных звестак (арт. 203-1 КК). Юлію змясцілі ў СІЗА-7. 

У сярэдзіне красавіка 2022 г. з'явілася інфармацыя, што Юліі выставілі абвінавачванні паводле шасці артыкулаў Крымінальнага кодэкса:

• арт. 188 (паклёп);
• ч. 1 арт. 13 арт. 369 (стварэнне ўмоваў для здзяйснення абразы прадстаўніка ўлады);
• ч. 1 арт. 1 арт. 389 (стварэнне ўмоваў для здзяйснення пагрозы ў дачыненні да суддзі);
• ч. 6 арт. 16 і ч. 1 арт. 366 (садзейнічанне да пагрозы гвалтам у дачыненні да службовай асобы);
• ч. 3 арт. 203-1 (незаконныя дзеянні ў дачыненні да персанальнай інфармацыі);
• ч. 1 арт. 361-4 (садзейнічанне экстрэмісцкай дзейнасці).

У палітзняволенай, пакуль яна ўтрымлівалася ў СІЗА-7, выявіўся апендыцыт. Жанчыне зрабілі аперацыю, яе стан добры. У сярэдзіне чэрвеня 2022 г. Юлію перавялі з СІЗА-7 у гродзенскую Турму № 1.

4 ліпеня 2022 г. у Гродзенскім абласным судзе распачаўся разгляд справы. 18 ліпеня суддзя Віктар Сянько прызнаў палітзняволеную вінаватай па шасці артыкулах Крымінальнага кодэкса і асудзіў да пяці гадоў пазбаўлення волі ва ўмовах агульнага рэжыму. Акрамя гэтага, суд прызначыў Лаптановіч штраф у памеры 2 650 рублёў, а таксама 5 000 рублёў маральнай кампенсацыі на карысць аднаго пацярпелага пракурора. Сваю віну Юлія прызнала часткова.

18 кастрычніка 2022 г. Вярхоўны суд разглядзеў апеляцыйную скаргу на прысуд Юліі. У выніку ёй скарацілі тэрмін на тры месяцы — з пяці гадоў зняволення да чатырох гадоў і дзевяці месяцаў, а таксама зменшылі суму штрафу амаль на тысячу рублёў.

У снежні жанчыну перавялі з Турмы № 1 у гомельскую папраўчую калонію № 4.

Палітзняволеную шматдзетную маці Юлію Лаптановіч асудзілі да 5 гадоў калоніі

Як паведамляў Следчы камітэт, падчас допыту Юлія распавяла, што ў ліпені мінулага года ў сацсетках з ёй звязаўся карыстальнік, які прапанаваў фінансавую падтрымку за прадастаўленне інфармацыі аб службовых асобах, якія ажыццяўлялі ў дачыненні да яе сям'і крымінальны пераслед.

Пракурор просіць прызначыць палітзняволенай Юліі Лаптановіч 5 гадоў калоніі

Год таму Юлію і яе мужа Ігара асудзілі па "справе карагодаў". Ігара адправілі ў калонію, а жанчыне прысудзілі "хатнюю хімію". Праз некалькі месяцаў Юлію затрымалі па новай крымінальнай справе. Цяпер палітзняволеную, якую ўтрымліваюць за кратамі ўжо дзевяць месяцаў, абвінавачваюць па шасці артыкулах Крымінальнага кодэкса.

Палітвязня па "справе карагодаў" Ігара Лаптановіча асудзілі да 2,5 гадоў калоніі, а ягоную жонку — да 3 гадоў "хатняй хіміі"

У судзе Маскоўскага раёна Брэста 4 жніўня вынеслі прысуды сёмай групе па "карагоднай" крымінальнай справе па ч. 1 арт. 342 Крымінальнага (удзел у дзеяннях, якія груба парушаюць грамадскі парадак). 13 верасня на Маршы герояў у Брэсце на скрыжаванні бульвара Касманаўтаў і праспекта Машэрава пратэстоўцы вадзілі карагод, спявалі песні «Муры» і «Тры чарапахі», танчылі. Пратэстоўцаў разагналі вадамётам.