Яўген Міхайлавіч Пугач — прадстаўнік мінскага стартап-хаба "Імагуру". Выпускнік магістарскай праграмы ЕГУ "Еўрапейскія даследаванні", пасля гэтага працаваў у шэрагу НДА і прыватным сектары з бізнесам. Ствараў і развіваў стартап-экасістэмы Беларусі.

У Мінскім гарадскім судзе прызначылі разгляд крымінальнай справы супраць Таццяны Марыніч, Анастасіі Хамянковай, а таксама Яўгена Пугача. Іх абвінавачваюць агулам паводле дзесяці артыкулаў Крымінальнага кодэксу, Таццяну Марыніч і Анастасію Хамянкову будуць судзіць завочна, а Яўген Пугач утрымліваецца пад вартай з ліпеня 2023 года. Справу прызначаны весці Любоў Сімахіна. 

Агулам у віну фігурантам справы ставіцца 10 артыкулаў Крымінальнага кодэкса:

• "змова ці іншыя дзеянні, учыненыя з мэтай захопу дзяржаўнай улады" (ч. 1 арт. 357 КК);
• "заклікі да мер абмежавальнага характару (санкцый) , іншых дзеянняў, накіраваных на прычыненне шкоды нацыянальнай бяспецы Рэспублікі Беларусь" (ч. 3 арт. 361 КК);
• "ухіленне ад выплаты падаткаў, збораў" (ч. 2 арт. 243 КК);
• "злоўжыванне ўладай або службовымі паўнамоцтвамі" (ч. 2 арт. 424 КК);
• "дыскрэдытацыя Рэспублікі Беларусь" (арт. 369-1 КК)
• "садзейнічанне экстрэмісцкай дзейнасці" (ч. 2 арт. 361-4 КК);
• "распальванне расавай, нацыянальнай, рэлігійнай альбо іншай сацыяльнай варожасці або варожасці" (ч. 3 арт. 130 КК);
• "удзел на тэрыторыі замежнай дзяржавы ва ўзброеным фарміраванні або ўзброеным канфлікце, ваенных дзеяннях, вярбоўка альбо падрыхтоўка асоб да такога ўдзелу" (ч. 2 арт. 361-3 КК);
• "фінансаванне экстрэмісцкай дзейнасці" (ч. 2 арт. 361-2 КК);
• "стварэнне экстрэмісцкага фарміравання альбо ўдзел у ім" (ч. 2 і 3 арт. 361-1 КК).