Яўген Барысавіч Лівянт — вядомы беларускі педагог, рэпетытар па фізіцы і матэматыцы, кіраўнік рэпетытарскага цэнтра "100 балаў". Відэа з ім з'явілася на адным з праўладных каналаў. Сілавікі абвінавачваюць яго ў пратэстах-2020, перакрыцці дарог і нават спробе дзяржперавароту, бо Лівянт уваходзіў у склад Каардынацыйнай рады. 

Разам з ім была затрыманая ягоная жонка Юлія. Іх дачку Ганну затрымалі на судзе над бацькамі ў снежні 2022 года, калі яна разам з мужам вярнулася з Польшчы. У "пакаяльным відэа" дзяўчына кажа, што ў 2020 годзе ўдзельнічала ў "несанкцыянаваных масавых мерапрыемствах".

19 траўня 2023 г. у судзе Маскоўскага раёна Мінска пачаўся судовы працэс па справе педагога-рэпетытара Яўгена Лівянта. Па крымінальнай справе разам з Лівянтам праходзяць яшчэ шэсць чалавек, у тым ліку яго жонка Юлія, старэйшая дачка Ганна, зяць Мікіта Дрозд і суўладальнік цэнтру Аляксей Іваноў.

Палітзняволены цалкам прызнаў сваю віну.

25 траўня 2023 г. суддзя Кацярына Мурашка асудзіла Яўгена на тры гады абмежавання волі без накіравання ў папраўчую ўстанову адкрытага тыпу ("хатняй хіміі").

Палітвязень быў вызвалены з-пад варты ў зале суда і выйшаў на волю з СІЗА-1.

25 жніўня 2023 года быў унесены ў пералік грамадзян Беларусі, замежных грамадзян і асоб без грамадзянства, якія маюць дачыненне да экстрэмісцкай дзейнасці.

Вынесеныя прысуды рэпетытару Яўгену Лівянту, ягонай сям'і і калегу

Яўгену Лівянту, старэйшай дачцэ Ганне і зяцю Мікіце Дразду прысудзілі па 3 гады "хатняй хіміі". Жонку Яўгена Юлію Лівянт, ягоную малодшую дачку-студэнтку Галіну Лівянт і суўладальніка цэнтру "100 балаў" Аляксея Іванова асудзілі да 2,5 гадоў "хатняй хіміі" кожнага, а Аляксандру Энсайн (Вільчыцкую) — на 1,5 года "хатняй хіміі".