Дзмітрый Уладзіміравіч Кубараў — UX/UI дызайнер, быў затрыманы ў межах крымінальнай справы аб масавых беспарадках. 

Спачатку быў падазраваным па ч. 2 арт. 293 Крымінальнага кодэкса — "Удзел у масавых беспарадках". Затым частку артыкула перакваліфікавалі на ч. 1 арт. 293 — Арганізацыя масавых беспарадкаў.

У судзе Фрунзенскага раёна Мінска 24 сакавіка 2021 года быў вынесены прысуд Дзмітрыю Кубараву. Суддзя Дзмітрый Лукашэвіч прызнаў яго вінаватым і пастанавіў пакараць сям'ю гадамі пазбаўлення волі з адбываннем у калоніі ўзмоцненага рэжыму. Менавіта такое пакаранне напярэдадні запрасіла памочніца пракурора Аліна Касьянчык.

27 верасня 2021 г. у судзе Заводскага раёна Мінска вынеслі прысуд па новай справе, распачатай у адносінах да Дзмітрыя Кубарава. Гэтым разам яго асудзілі на 3 гады калоніі за незаконныя дзеянні ў адносінах да прадметаў, паражальнае дзеянне якіх заснавана на выкарыстанні гаручых рэчываў (арт. 295-3 КК РБ), а менавіта за захоўванне ў кватэры сродку для вырабу "кактэйляў Молатава". Агульны тэрмін пакарання для Кубарава склаў 8 гадоў калоніі ўзмоцненага рэжыму.

У сярэдзіне студзеня 2022 стала вядома аб пераводзе Дзмітрыя з СІЗА-2 у наваполацкую ПК № 1.

5 жніўня 2022 г. палітзняволенага змясцілі ў памяшканне камернага тыпу на шэсць месяцаў. Пры гэтым вядома, што падчас адбыцця тэрміну ў ПКТ яго мінімум чатыры разы змяшчалі ў ШІЗА, тэрмін якога не залічваецца ў тэрмін ПКТ.

У кастрычніку падчас адбывання пакарання ў ШІЗА Кубараў захварэў — у яго пачаліся праблемы з лёгкімі. Адміністрацыя нават была вымушана перавесці яго ў санчастку на пяць дзён. Там яму збілі тэмпературу і зноў адправілі даседжваць "суткі" ў ШІЗА.

Адміністрацыя ПК № 1 выступіла ініцыятарам узмацнення пакарання Кубараву. Суд быў прызначаны на 6 сакавіка 2023 г. Суддзя Вольга Баліка прыняла рашэнне перавесці палітвязня на тры гады на турэмны рэжым.

Дзмітрыя перавялі з наваполацкай калоніі ў Турму № 1 у Гродне.

Вядома, што ў пачатку 2024 г. Дзмітрыя змяшчалі ў ШІЗА. 

"Боль у нырках, сутаргі". Дзмітрыю Кубараву ў калоніі не аказваюць неабходную медыцынскую дапамогу і працягваюць змяшчаць у ШІЗА

Увесь час адміністрацыя ўстановы цісне на палітвязня: начальнік Андрэй Пальчык асабіста ставіў Дзмітрыя на "расцяжку", яго рэгулярна змяшчаюць у ШІЗА, нядаўна адправілі ў ПКТ, а цяпер яго збіраюцца пераводзіць на турэмны рэжым. Праз жудасныя ўмовы ўтрымання ў палітвязня пачаліся сур'ёзныя праблемы са здароўем, але ў калоніі яму не аказваюць неабходную медыцынскую дапамогу.

Палітвязня Кубарава асудзілі яшчэ па адным артыкуле. Агульнае пакаранне — 8 гадоў узмоцненага рэжыму

У судзе Заводскага раёна Мінска 27 верасня вынеслі прысуд па новай справе, распачатай у адносінах да палітвязня Дзмітрыя Кубарава, раней асуджанага на сем гадоў калоніі ўзмоцненага рэжыму па артыкуле аб арганізацыі масавых беспарадкаў (ч. 1 арт. 293 КК РБ). Гэтым разам яго асудзілі на 3 гады калоніі за незаконныя дзеянні ў адносінах да прадметаў, паражальнае дзеянне якіх заснавана на выкарыстанні гаручых рэчываў (арт. 295-3 КК РБ), а менавіта за захоўванне ў кватэры сродку для вырабу "кактэйляў Молатава". Агульны тэрмін пакарання для Кубарава склаў 8 гадоў калоніі ўзмоцненага рэжыму.

Больш за 45 тысяч рублёў — столькі павінен выплаціць 25-гадовы палітвязень за "блакаванне дарог" на пратэстах у Мінску

На судзе адвакат палітвязня заўважыў, што ў матэрыялах справы маецца дакумент, згодна з якім Дзмітрыю «прыпісалі» 57 лішніх маршрутаў адносна таго акта, які быў прадстаўлены суду падчас разгляду крымінальнай справы супраць Кубарава. Пасля доўгіх спрэчак высветлілася, што пазоўны акт, па сцвярджэнні юрыстаў, быў не дакладны. Па новых дадзеных палітзняволены Дзмітрый Кубараў, на думку «Мінсктрансу», спыніў грамадскі транспарт на 107 маршрутах.

Палітвязня Кубарава пакаралі 7 гадамі калоніі ўзмоцненага рэжыму

Менавіта такое пакаранне напярэдадні запрасіла памочніца пракурора Аліна Касьянчык.

"Нават за гэтай клеткай лічу сябе больш свабодным, чым многія людзі, якія сядзяць тут". Палітвязню Кубараву запрасілі 7 гадоў узмоцненага рэжыму

У судзе Фрунзенскага раёна Мінска працягнуўся разгляд крымінальнай справы палітычнага зняволенага, дызайнера Дзмітрыя Кубарава, якога вінавацяць у арганізацыі масавых беспарадкаў (ч. 1 арт. 293 Крымінальнага кодэкса). Пад час спрэчак па справе, якія адбыліся 22 сакавіка, памочніца пракурора Аліна Касьянчык запрасіла для яго сем гадоў пазбаўлення волі ва ўмовах узмоцненага рэжыму.

Пачаўся суд над палітвязнем Дзмітрыем Кубаравым. Яго лічаць арганізатарам масавых беспарадкаў

12 сакавіка ў судзе Фрунзенскага раёна Мінска распачаўся разгляд крымінальнай справы супраць палітычнага зняволенага, дызайнера Дзмітрыя Кубарава. Яго вінавацяць у арганізацыі масавых беспарадкаў (ч. 1 арт. 293 Крымінальнага кодэкса). Першапачаткова справа была ўзбуджана па ч. 2 арт. 293 (Удзел у масавых беспарадках), аднак пазней справу перакваліфікавалі на ч. 1 гэтага артыкула. Паводле яго, палітвязню пагражае да 15 гадоў пазбаўлення волі.