Дзяніс Міхайлавіч Урад займаў пасаду спецсувязіста Генштаба Узброеных Сіл.

Паводле інфармацыі праўладных СМІ, 14 сакавіка 2021 года на дзяжурстве Дзяніс Урад сфатаграфаваў сакрэтны ліст ад міністра ўнутраных спраў міністру абароны і "адправіў польскаму тэлеграм-каналу". 

Дзяніс Урад жанаты, мае малога сына. Родам капітан з Расонаў Віцебскай вобласці. Вучыўся ў Ваеннай акадэміі на факультэце сувязі і аўтаматызаваных сістэм кіравання, які скончыў у 2014 годзе.

14 траўня 2021 года стала вядома, што Вярхоўны суд (суддзя Аляксандр Лупіновіч) асудзіў Дзяніса Урада да 18 гадоў пазбаўлення волі ва ўмовах узмоцненага рэжыму за "здраду дзяржаве" (ч. 2 арт. 356 КК). Таксама яго пазбавілі звання.

Разгляд справы праходзіў у закрытым рэжыме. Прысуд набыў моц у момант абвяшчэння. Абскарджанню, апратэставанню ў апеляцыйным парадку не падлягае.

22 жніўня 2022 года адбудзецца разгляд справы аб пераводзе палітзняволенага ў іншую папраўчую ўстанову і змене рэжыму. Паводле рашэння суддзі Вольгі Баліка яго могуць перавесці на турэмны рэжым.

21 верасня cтала вядома, што Дзяніс Урад быў пераведзены ў магілёўскую турму №4. 

"Не ўяўляе, як будзе жыць далей". Пагаварылі з жонкай вайскоўца, якому далі 18 гадоў калоніі за дзяржаўную здраду

14 траўня 2021 года Вярхоўны суд вынес суровы прысуд палітвязню: экс-капітан Генштаба Дзяніс Урад атрымаў 18 гадоў калоніі за дзяржаўную здраду. Мужчына сфатаграфаваў ліст міністра МУС да міністра абароны і адправіў яго аднаму з тэлеграм-каналаў. Жонка асуджанага распавяла TUT.BY, чаму ён пайшоў на такі крок.