Андрэй Сяргеевіч Раптуновіч — мастак, які выкладаў у цэнтры дадатковай адукацыі ў Мінску, сірата. Андрэя затрымалі 16 траўня 2022 года, тады праўладныя тэлеграм-каналы паведамлялі, што ён нібыта збіраўся паехаць ва Украіну і далучыцца да батальёна Каліноўскага.

Вядома, што хлопцу прысудзілі 14 сутак арышту паводле ч. 2 арт. 19.11 КаАП (распаўсюд экстрэмісцкіх матэрыялаў), ён павінен быў выйсці на волю 29 траўня, аднак на яго склалі новы пратакол. Тады Андрэю прысудзілі 15 сутак арышту па арт. 19.1 КаАП (дробнае хуліганства) — нібыта ён размахваў рукамі і нецэнзурна лаяўся.

На хлопца завялі справу паводле двух артыкулаў Крымінальнага кодэксу:

• ч. 3 арт. 361-1 (удзел у экстрэмісцкім фармаванні);
• ч. 1 арт. 13 арт. 361-3 (падрыхтоўка да ўдзелу грамадзяніна Рэспублікі Беларусь на тэрыторыі замежнай дзяржавы ў ваенных дзеяннях без упаўнаважання дзяржавы).

14 лістапада 2022 г. у Мінгарсудзе Андрэю прысудзілі чатыры гады зняволення. Да разгляду апеляцыйнай скаргі палітвязня перавялі з СІЗА-1 у віцебскі СІЗА-2.

У сакавіку 2023 г. МУС уключыла палітвязня ў "спіс экстрэмістаў".

Андрэй адбывае пакаранне ў ПК № 1 у Наваполацку з 3 сакавіка 2023 г.

Мастака асудзілі да 4 гадоў калоніі за жаданне далучыцца да "каліноўцаў" і рэгістрацыю ў плане "Перамога"

Суд праходзіў у закрытым рэжыме, таму падрабязнасці судовага пасяджэння і пазіцыя палітвязня па справе невядомыя. Пад вартай хлопец утрымліваецца ўжо больш за шэсць месяцаў.

За намер далучыцца да батальёна Каліноўскага і рэгістрацыю ў плане "Перамога" пачалі судзіць 20-гадовага мастака

Следчы камітэт сцвярджаў, што малады чалавек збіраўся паехаць ва Украіну і далучыцца да палка Каліноўскага. Для гэтага ён у адным з тэматычных тэлеграм-каналаў прайшоў рэгістрацыю і паведаміў адміністратару аб гатоўнасці "па першым сігнале ўзяць зброю ў рукі". Таксама ён нібыта ўступіў у "мабілізацыйны план "Перамога", звязваўся з яго адміністратарамі, "прапаноўваў свае паслугі і выказваў імкненне да здзяйснення супрацьпраўных дзеянняў".