Андрэй Аляксеевіч Кузнечык — журналіст-фрылансер "Радыё Свабода".

Яго затрымалі 25 лістапада 2021 года. У ягонай кватэры адбыўся ператрус. Пасля затрымання фрылансера сілавікі ненадоўга здолелі захапіць кантроль над тэлеграм-каналам "Радыё Свабода". На наступны дзень Андрэя Кузнечыка асудзілі судом Заводскага раёну Мінска на 10 сутак, аднак 5 снежня на волю не выйшаў і быў зноў асуджаны тым жа судом на 10 сутак. Але і 15 снежня яго не вызвалілі.

23 снежня сваякам Андрэя паведамілі, што на яго завялі крымінальную справу, але інфармацыі, паводле якога артыкула была распачатая крымінальная справа, не паведамлялася. Кузнечыка перавялі ў СІЗА-1 на вуліцы Валадарскага ў Мінску. Сваякам не паведамлялі сутнасць абвінавачванняў, адвакат знаходзіўся пад падпіскай аб неразгалошванні.

У сярэдзіне траўня 2022 г. стала вядома, што Андрэя перавялі з СІЗА-1 у магілёўскую турму.

Разгляд ягонай справы адбыўся 8 чэрвеня 2022 г. у Магілёўскім абласным судзе. Праваабаронцам стала вядома, што журналіста абвінавачвалі паводле ч. 1 арт. 361-1 КК (Стварэнне экстрэмісцкага фармавання або ўдзел у ім). Суддзя Ігар Шведаў прызнаў яго вінаватым і прызначыў пакаранне ў выглядзе зняволення ў калоніі ўзмоцненага рэжыму на тэрмін 6 гадоў.

1 верасня 2022 г. Андрэй быў этапаваны з турмы № 4 у наваполацкую калонію № 1. Таксама стала вядома, што МУС уключыў Андрэя ў спіс асобаў, датычных да "экстрэмісцкай" дзейнасці.

Палітвязень Андрэй Кузнечык з-за кратаў вучыць дзяцей новым беларускім словам — праз вершы

Журналіст Свабоды Андрэй Кузнечык рыхтуецца да этапавання з магілёўскай турмы № 4 у наваполацкую калонію № 1. Палітвязень працягвае пісаць кранальныя вершы сваім дзецям — 8-гадовай Яніне і 3-гадоваму Мацвею. Пасля разгляду апеляцыі Кузнечыка ў Вярхоўным судзе (які пакінуў прысуд у сіле) палітвязню дазволілі спатканне з жонкай Алесяй. Цягам дзвюх гадзінаў яны размаўлялі праз шкло.

Шэсць гадоў калоніі прысудзілі фрылансеру Андрэю Кузнечыку

Андрэю Кузнечыку 43 гады, нарадзіўся ў Віцебску, навучаўся спачатку ў Ліцэі БДУ, потым скончыў філалагічны факультэт БДУ, аспірантуру. Працаваў у "Камсамольскай праўдзе", "Нашай Ніве", супрацоўнічаў з "Радыё Свабода".