Анастасія Сяргееўна Кухта — сацыяльная актывістка з Мінску. Яна была затрымана 17 лютага 2022 года па месцы жыхарства. Дома ў яе быў праведзены вобшук.

Спачатку ёй прысудзілі адміністрацыйны арышт, але пасля яго на волю Анастасія не выйшла. Яе перазатрымалі ў межах крымінальнай справы аб групавых дзеяннях, што груба парушаюць грамадскі парадак (арт. 342 Крымінальнага кодэксу). Пасля ёй таксама выставілі абвінавачванні паводле ч. 3 арт. 361 (Заклікі да мер абмежавальнага характару (санкцый), іншых дзеянняў, накіраваных на прычыненне шкоды нацыянальнай бяспецы Рэспублікі Беларусь) і ч. 1 арт. 361-1 (Стварэнне экстрэмісцкага фарміравання або ўдзел у ім). 

З 12 сакавіка 2022 г. утрымлівалася ў СІЗА-1.

Мінскі гарадскі суд 10 кастрычніка 2022 пачаў разглядаць справу палітзняволенай. 11 лістапада дзяўчыну прызналі вінаватай і асудзілі да пяці гадоў зняволення ў калоніі ва ўмовах агульнага рэжыму.

У снежні 2022 г. КДБ уключыў палітзняволеную ў "спіс тэрарыстаў", а ў сакавіку 2023 г. МУС — у "спіс экстрэмістаў".

На 14 лютага 2023 г. быў прызначаны разгляд апеляцыйнай скаргі. Прысуд Анастасіі пакінулі без зменаў.

Палітзняволеную этапавалі ў гомельскую жаночую ПК № 4 у пачатку сакавіка 2023 г.

10 сакавіка 2023 года была ўнесеная ў пералік грамадзян Беларусі, замежных грамадзян і асоб без грамадзянства, якія маюць дачыненне да экстрэмісцкай дзейнасці.

31 траўня 2023 г. палітзняволенай памерла маці, але дзяўчыну на яе пахаванне не адпусцілі.

Актывістку Анастасію Кухту асудзілі да пяці гадоў калоніі

Справу разглядалі больш за месяц — з 10 кастрычніка.