Аляксей Храловіч — былы падпалкоўнік КДБ. У Мінскім гарадскім судзе 30 сакавіка 2022 г. яго асудзілі да 10 гадоў калоніі ва ўмовах узмоцненага рэжыму і штрафу ў памеры 500 базавых велічыняў па ч. 2 арт. 356 Крымінальнага кодэкса (здрада дзяржаве, здзейсненая службовай асобай, якая займае адказнае становішча). Пад вартай да суда ён утрымліваўся каля году.

Згодна з інфармацыяй, агучанай у фільме на дзяржтэлебачанні, Храловіч меў дачыненне да перадачы Сцяпану Пуцілу ў лістападзе 2020 аўдыя размоваў прэс-сакратаркі Лукашэнкі Наталлі Эйсмант з рознымі службовымі асобамі. Менавіта ў гэтых запісах вялася размова пра абставіны гібелі Рамана Бандарэнкі.

У сярэдзіне чэрвеня 2022 г. Аляксея этапавалі з СІЗА-1 у наваполацкую калонію № 1.

За "зліў" тэлефонных размоваў Эйсмант экс-падпалкоўніка КДБ асудзілі да 10 гадоў калоніі

У Мінскім гарадскім судзе 30 сакавіка асудзілі да 10 гадоў калоніі ва ўмовах узмоцненага рэжыму і штрафу ў памеры 500 базавых велічыняў па ч. 2 арт. 356 Крымінальнага кодэкса (здрада дзяржаве, здзейсненая службовай асобай, якая займае адказнае становішча) 38-гадовага экс-падпалкоўніка КДБ Аляксея Храловіча. Пад вартай ён утрымліваецца каля году. Справу разглядала суддзя Дзіна Кучук тыдзень у закрытым рэжыме. Храловіч пазбаўлены вайсковага звання "падпалкоўнік".

Каго і за што ў Беларусі пераследуюць па артыкуле "здрада дзяржаве"

У Беларусі паводле асабліва цяжкага артыкулу "здрада дзяржаве" ў следчых ізалятарах і калоніі ўтрымліваюцца 12 палітвязняў. Гэта асуджаны да 18 гадоў калоніі капітан Генштаба Дзяніс Урад, дзевяць фігурантаў справы "Рабочага руху", журналісты Дзяніс Івашын і Андрэй Аляксандраў. Здымак сакрэтнага ліста ў Генштабе і перадача яго тэлеграм-каналу Nexta, падрыхтоўка журналісцкіх расследаванняў для замежных СМІ, дзейнасць стачкамаў і незалежных прафсаюзаў на заводах — усё гэта ў Беларусі можа кваліфікавацца як здрада дзяржаве. Артыкул 356 Крымінальнага кодэкса, які перайшоў па спадчыне з савецкіх часоў, прадугледжвае пазбаўленне волі ад 7 да 15 гадоў, а вайскоўцу — да 20 гадоў калоніі. Гэтыя справы ў Беларусі вядуць органы дзяржаўнай бяспекі. "Вясна" распавядае, што ў Беларусі лічыцца здрадай дзяржаве, узгадвае кейсы палітвязняў па гэтым артыкуле, а юрыст Павел Сапелка разважае, як "здрада дзяржаве" зрабілася зброяй улады ў барацьбе з апанентамі, і прагназуе пашырэнне артыкула.

Як дзяржава пераследуе экс-сілавікоў і вайскоўцаў, якія выступілі супраць рэжыму Лукашэнкі

Беларусь можна назваць міліцэйскай дзяржавай. Асноўнай функцыяй сілавога апарату апошнія два гады стала недапушчэнне і спыненне ўсіх пратэсных актыўнасцяў і праяваў у краіне. Пры гэтым, кантроль за сілавікамі таксама ўзмацніўся, каб не дапусціць падтрымкі імі дэмакратычнага руху Беларусі. У траўні мінулага года Лукашэнка пазбавіў воінскіх і спецыяльных званняў больш за 80 экс-сілавікоў, якія ўступілі ў незалежнае аб’яднанне сілавікоў ByPOL ці падтрымлівалі акцыі пратэсту: удзельнічалі ў Маршах, выказваліся ў сацсетках пра прадстаўнікоў улады, "злівалі" службовыя дакументы, праслухоўкі апазіцыйным тэлеграм-каналам і іншае. Падпалкоўнік КДБ, падпалкоўнік ваеннай разведкі, спецсувязіст Генштаба Узброеных сіл, былыя міліцыянты, пракуроры, следчыя – праваабаронцам вядомыя мінімум 17 фактаў іх пераследу. Іх судзяць за ўдзел у акцыях пратэсту, распальванне сацыяльнай варожасці, здраду дзяржаве, абразу прадстаўнікоў улады і па іншых артыкулах Крымінальнага кодэкса. У большасці выпадкаў іх пераслед носіць яўна палітычна матываваны характар, а пра некаторыя вядома толькі з дзяржаўных медыя. "Вясна" распавядае, як дзяржава пераследуе былых сілавікоў і вайскоўцаў, якія выступілі супраць рэжыму Лукашэнкі.

У Мінску за "зліў" тэлефонных размоваў Эйсмант пачалі судзіць падпалкоўніка КДБ

Сёння, 21 сакавіка, у Мінскім гарадскім судзе ў закрытым рэжыме распачаўся судовы працэс па крымінальнай справе супраць 38-гадовага падпалкоўніка КДБ Аляксея Храловіча, які меў доступ да сакрэтнай інфармацыі ў ведамстве. Пад вартай ён утрымліваецца каля году. Храловіча абвінавачваюць па ч. 2 арт. 356 Крымінальнага кодэкса (здрада дзяржаве, здзейсненая службовай асобай, якая займае адказнае становішча). Справу разглядае суддзя Дзіяна Кучук. Храловічу пагражае ад 10 да 20 гадоў пазбаўлення волі.