Аляксандр Данілевіч

адвакат

Дата нараджэння: 30 лістапада 1974

Дата затрымання: 20 траўня 2022

Прад'яўленыя абвінавачванні:

арт. 361 Крымінальнага кодэкса — Заклікі да дзеянняў, скіраваных на прычыненне шкоды нацыянальнай бяспецы Рэспублікі Беларусь
арт. 361-4 Крымінальнага кодэкса — Садзейнічанне экстрэмісцкай дзейнасці

Вынік суда: 10 гадоў

Від пакарання: пазбаўленне волі ў калоніі ва ўмовах узмоцненага рэжыму

Дата пачатку адбыцця пакарання: 11 ліпеня 2023

Суддзя: Фалькоўская Таццяна

Пракурор: Цыбуля Таццяна

Месца зняволення: ПК № 17

Сімвалічны/ая хросны/ая: Філіп Крэмер, дэпутат нямецкага Бундэстагу

Аляксандр Станіслававіч Данілевіч — адвакат, кандыдат юрыдычных навук, дацэнт. Быў затрыманы 20 траўня 2022 года ў межах крымінальнай справы. Некаторы час сутнасць справы не была вядомая, аднак пазней высветлілася, што Данілевіча абвінавачваюць паводле ч. 3 арт. 361 КК (заклікі да мер абмежавальнага характару (санкцый), іншых дзеянняў, накіраваных на прычыненне шкоды нацыянальнай бяспецы Беларусі).

Аляксандр валодае беларускай, рускай, ангельскай, італьянскай і французскай мовамі. З 2010 г. з'яўляўся намеснікам старшыні Дысцыплінарнай камісіі Нацыянальнага антыдопінгавага агенцтва Рэспублікі Беларусь, у 2012 г. уключаны ў Апеляцыйны антыдопінгавы савет пры Міністэрстве спорту і турызму Рэспублікі Беларусь. З'яўляўся старшынёй Беларускай федэрацыі рэгбі і сябрам юрыдычнага камітэта міжнароднай асацыяцыі "Рэгбі Еўропа".

Прайшоў навуковую стажыроўку ва універсітэце La Sapienza (г. Рым, Італія), Міжнародным інстытуце па ўніфікацыі прыватнага права (UNIDROIT) (г. Рым, Італія) і Швейцарскім інстытуце параўнальнага правазнаўства (г. Лазана, Швейцарыя) і Цэнтры спартовага права Інстытута ім. Т.М.К. Асэра (г. Гаага, Нідэрланды).

Аляксандр Данілевіч — шматдзетны бацька. Незадоўга да затрымання ён падпісаў антываенны зварот адвакатаў і юрыстаў датычна дзеянняў ва Украіне. Адразу пасля падпісання ліста супраць вайны ў Данілевіча пачаліся праблемы ў адвакатуры — завялі дысцыплінарную вытворчасць. Таксама яго звольнілі з БДУ, дзе ён больш за 20 гадоў выкладаў на факультэце міжнародных адносін.

Данілевіч любіць спорт. Адно з яго захапленняў — веславанне, на якое ён падсаджваў усіх знаёмых. Аляксандр мае некалькі каякоў.

Адваката затрымлівалі супрацоўнікі КДБ на працоўным месцы. Першы час яго ўтрымлівалі ў СІЗА КДБ, а пазней перавялі на "Валадарку".

Спачатку Аляксандра абвінавачвалі толькі паводле ч. 6 арт. 16 і ч. 3 арт. 361 Крымінальнага кодэкса, а ўжо пазней яму дадалі ч. 1 арт. 361-4 КК.

На пачатку студзеня 2023 г. матэрыялы справы перадалі пракурору для накіравання ў суд. Паводле следства, Данілевіч заклікаў да санкцый у дачыненні да беларускага спорту і займаўся "дыскрэдытацыяй айчынных прадпрыемстваў перад замежнымі партнёрамі". Дзеянні палітзняволенага адваката кваліфікавалі паводле ч. 6 арт. 16 і ч. 3 арт. 361 КК (дапамаганне ў закліках да мер абмежавальнага характару) і ч. 1 арт. 361-4 КК (садзейнічанне экстрэмісцкай дзейнасці).

Згодна з матэрыяламі справы, Аляксандр з 9 жніўня 2020 года па 20 траўня 2022 года "шляхам дачы парадаў, указанняў, прадастаўлення інфармацыі, аказання іншай дапамогі садзейнічаў Аляксандры Герасімені і Аляксандру Апейкіну ў закліках да дзеянняў, накіраваных на прычыненне шкоды нацыянальнай бяспецы краіны". Ён жа "падрыхтаваў і адрэдагаваў тэкст не менш як трох зваротаў ад прадстаўнікоў "стачачных камітэтаў", у якіх выклаў свядома ілжывыя звесткі аб палітычнай, эканамічнай, сацыяльнай сітуацыі ў Беларусі, заклікаў кіраўніцтва замежнай кампаніі спыніць дамоўныя адносіны з беларускім контрагентам". Акрамя таго, Данілевіч даў інтэрв'ю "экстрэмісцкаму" інтэрнэт-рэсурсу "Трыбуна".

Працэс над ім распачаўся 10 сакавіка 2023 г. у Мінгарсудзе. Аляксандр віну не прызнаў і настойваў, што выконваў свае прафесійныя абавязкі.  Пракурорка Таццяна Цыбуля запатрабавала для адваката 10 гадоў зняволення ў калоніі ва ўмовах узмоцненага рэжыму. Менавіта такое пакаранне 10 красавіка 2023 г. прызначыла Аляксандру Данілевічу суддзя Таццяна Фалькоўская.

11 ліпеня 2023 г. у закрытым судовым пасяджэнні ў Вярхоўным судзе разглядалася апеляцыйная скарга палітвязня суддзёй Таццянай Васілевіч.

У верасні 2023 г. Аляксандра перавялі з СІЗА-1 спачатку ў ПК № 3, але пасля перавялі яшчэ раз, у ПК № 17

"Я дапамагаю людзям, не маю права ім адмаўляць". Што казаў на працэсе асуджаны да 10 гадоў калоніі адвакат Данілевіч

Аляксандр Данілевіч неаднаразова выказваўся, што яму не зразумела сутнасць абвінавачванняў паводле ч. 3 арт. 361 КК. Таксама абвінавачаны адвакат настойваў на тым, што даванне інтэрв'ю не з'яўляецца садзейнічаннем экстрэмісцкай дзейнасці. "Вясна" распавядае, што казаў адвакат на працэсе.

Адваката Аляксандра Данілевіча асудзілі да 10 гадоў калоніі

Адваката абвінавацілі ў "пасобніцтве ў закліках да санкцый" спартоўцам Аляксандры Герасімені і Аляксандру Апейкіну, якіх завочна асудзілі да 12 гадоў калоніі (ч. 6 арт. 16 і ч. 3 арт. 361 Крымінальнага кодэкса) і "садзейнічанне экстрэмісцкай дзейнасці" (ч. 1 арт. 361-4 КК). Так кваліфікавалі яго адвакацкія парады, падрыхтоўку стачкамам зваротаў, а таксама інтэрв'ю "экстрэмісцкаму інтэрнэт-рэсурсу". Аляксандр віну не прызнаў і настойваў, што выконваў свае прафесійныя абавязкі.

"Аказаў падтрымку экстрэмістам і прыхільнікам прававога нігілізму". Пачалі судзіць адваката Аляксандра Данілевіча

Яго абвінавачваюць у "пасобніцтве ў закліках да санкцый" спартоўцам Аляксандры Герасімені і Аляксандру Апейкіну, якіх завочна асудзілі да 12 гадоў калоніі (ч. 6 арт. 16 і ч. 3 арт. 361 Крымінальнага кодэкса), і "садзейнічанні экстрэмісцкай дзейнасці" (ч. 1 арт. 361-4 КК). Так кваліфікавалі яго адвакацкія парады, падрыхтоўку стачкамам зваротаў, а таксама інтэрв'ю "экстрэмісцкаму інтэрнэт-рэсурсу".

"Помста за смеласць". Што вядома пра адваката Данілевіча, якога забралі ў КДБ?

Адвакат Аляксандр Данілевіч перастаў выходзіць на сувязь 20 мая. Пазней стала вядома, што ён знаходзіцца ў СІЗА КДБ. Сабралі, што вядома пра яго на гэты момант.

Адрас для лістоў: ПК № 17. 213004, г. Шклоў, вул. 1-я Заводская, 8

Палітвязні знаходзяцца па адрасах:

Падтрымаць «Вясну»