Алена Уладзіміраўна Маўшук была затрыманая ўначы 10 жніўня 2020 г. у Пінску, у межах крымінальнай справы аб масавых беспарадках. Са слоў міліцыянтаў, жанчына нібыта з палкай замахваліся на супрацоўнікаў міліцыі (АМАП). Яе абвінавацілі ва ўдзеле ў масавых беспарадках па ч. 2 арт. 293 Крымінальнага кодэкса. Муж Алены не ведаў пра яе месцазнаходжанне і стан жонкі на працягу чатырох сутак з моманта затрымання. Пазней з ім звязалася сукамерніца жанчыны і распавяла, што Алена знаходзіцца ў камеры "голая, босая, збітая". Са словаў гэтай жанчыны Алена ў камеру патрапіла ўся ў сіняках. У Алены Маўшук трое дачок: адна — паўнагадовая, дзве — малалетнія. 10-гадовую Ангеліну 17 верасня са школы забралі ў сацыяльны прытулак, таму што муж Алены з'яўляецца яе айчымам. Як паведаміла Алена ў сваіх лістах, палітзняволеную ў СІЗА паставілі на ўлік як "схільную да захопу адміністрацыі з захопам закладнікаў і праявы агрэсіі".

Суд Маскоўскага раёна Брэста 30 красавіка 2021 года вынес прысуд па крымінальнай справе па ч. 2 арт. 293 Крымінальнага кодэкса супраць 14 пінскіх палітвязняў, якіх абвінавацілі ва ўдзеле ў масавых беспарадках у ноч з 9 на 10 жніўня 2020 года ў Пінску. Алену Маўшук асудзілі да 6 гадоў калоніі агульнага рэжыму. Па гэтай жа справе разам з Аленай асудзілі і яе мужа Сяргея Маўшука на 6,5 гадоў калоніі ўзмоцненага рэжыма.

У тэлефанаванні з калоніі на пачатку студзеня 2022 года Алена Маўшук паведаміла блізкім, што да яе ўжываюць фізічны і псіхалагічны гвалт, яе пазбавілі ўсіх перадач і спаткання з блізкімі, яна рэгулярна атрымлівае пакаранні і знаходзіцца ў прыгнечаным псіхалагічным стане. Вядома, што Алену пазбавілі бацькоўскіх правоў.

"З-за гэтага відэа сядзяць вашыя дзеці і мая жонка!"

Як распавядае Сяргей Маўшук, муж палітвязніцы Алены, многіх фігурантаў "Пінскай справы" затрымалі з-за аднаго відэа. На многіх пасля затрымання прыносілі раздрукоўкі скрыншотаў з гэтага відэа.

"Мая мама — у турме". Гісторыі палітвязняў шматдзетных маці

"Мама працавала ў Пінскай бальніцы санітаркай і памочнікам кухара на харчаблоку, яна любіць чысціню і парадак. Калі маму затрымалі, мне заставалася тыдзень да родаў. У мамы ўжо ёсць унукі, яна вельмі мяне падтрымлівала і чакала нараджэння маёй дачкі".