Сяргей Чарнецкі
Прад'яўленыя абвінавачванні:
арт. 391 Крымінальнага кодэкса — Абраза суддзі
Вынік суда: 2 гады
Від пакарання: абмежаванне волі без накіравання ў папраўчую ўстанову адкрытага тыпу ("хатняя хімія")
Суддзя: Аляхновіч Васіль
Памочнік машыніста, суддзя Філатаў і «Дошка ганьбы»
24 траўня суд Навагрудскага раёна вынес прысуд Сяргею Чарнецкому — жыхару горада Ліды, які працуе памочнікам машыніста дызель-цягніка. Яго прызналі вінаватым у абразе суддзі (арт. 391 КК) — Максіма Філатава, які працуе ў судзе горада Ліда.
- Суддзя Максім Філатаў
Суддзя Максім Філатаў вядомы тым, што вынес прысуд у пяць гадоў калоніі актывісту Вітольду Ашурку. 21 траўня 2021 года Вітольд памёр у калоніі пры нявысветленых акалічнасцях.
А паводле абвінавачвання ў дачыненні да Сяргея Чарнецкага, той пад допісам са здымкам Філатава ў Telegram-канале «Дошка ганьбы» пакінуў абразлівы каментар.
Падчас дасудовага следства было складзена не менш за шэсць пратаколаў агляду каментароў на адрас Філатава на «Дошцы ганьбы». Акрамя таго, сілавікі правялі следчы эксперымент, падчас якога Чарнецкі са свайго мабільнага тэлефона зайшоў у свой акаўнт у Telegram, а пасля ў Telegram-чат, дзе быў пакінуты каментар. Усё гэта лягло ў абвінаваўчы прысуд.
Падчас судовага пасяджэння Сяргей Чарнецкі прызнаў віну цалкам. У выніку суддзя Васіль Аляхновіч прызначыў яму пакаранне ў выглядзе абмежавання волі тэрмінам на два гады без накіравання ў ПУАТ («хатняя хімія»). А мабільны тэлефон, з якога Чарнецкі пісаў паведамленне, суд пастанавіў канфіскаваць.
