Наталля Альбертаўна Малец асуджана паводле арт. 369 (Абраза прадстаўніка ўлады) Крымінальнага кодэкса. Яе справу разглядалі 30 снежня 2022 года і 3 студзеня 2023 года ў Маскоўскім судзе Брэста. Пад вартай Наталля знаходзілася з 8 па 10 лістапада 2022 года.

Суддзя Інна Клышпач прызначыла жанчыне год і шэсць месяцаў абмежавання волі без накіравання ў папраўчую ўстанову адкрытага тыпу (“хатнюю хімію”). 

У верасні 2023 года Наталля зноў была затрыманая і змешчаная ў СІЗА-7 паводле абвінавачвання ў "фінансаванні экстрэмісцкай дзейнасці" (арт. 361-2 Крымінальнага кодэксу).

Вядома, што сілавікоў зацікавіла "падазроная актыўнасць жанчыны ў ажыццяўленні грашовых пераводаў". Следчыя ўстанавілі, што яна ажыццявіла не менш за 125 пераводаў 114 беларусам на суму больш за 1,5 тысячы рублёў. Як піша СК, жанчына пераводзіла грошы выключна асобам, якія ўчынілі "злачынствы экстрэмісцкай накіраванасці".

Таксама следчыя ўстанавілі, што яна была ў закрытай суполцы ў Facebook, якая належыць "экстрэмісцкаму фармаванню". Верагодна, гаворка ідзе пра суполку "Письма Солидарности Беларусь 2020", якую ў снежні прызналі "экстрэмісцкім фармаваннем".

Жанчыне прад'яўлена абвінавачанне па ч.1 і ч. 2 арт. 361-4 КК (садзейнічанне экстрэмісцкай дзейнасці). 8 ліпеня 2024 года Брэсцкі абласны суд пачаў разглядаць справу Наталлі. 8 жніўня 2024 года суддзя Руслана Сянько прызначыла Наталлі тры гады і шэсць месяцаў пазбаўлення волі ў калоніі.

Утрымліваецца ў СІЗА № 6. 

18 кастрычніка 2024 г. адбыўся разгляд апеляцыйнай скаргі ў Вярхоўным судзе. Старшыня судовай калегіі Мікалай Грынцэвіч.

25 кастрычніка 2024 года была ўнесена ў пералік грамадзян Беларусі, замежных грамадзян і асоб без грамадзянства, якія маюць дачыненне да экстрэмісцкай дзейнасці.

Адбывае тэрмін у ПК № 4.

Палітзняволеную 68-гадовую пенсіянерку асудзілі на 3,5 гады калоніі за дапамогу палітвязням

У Брэсцкім абласным судзе 8 жніўня 2024 года асудзілі палітзняволеную Наталлю Малец паводле ч. 1 і 2 арт. 361-4 (садзейнічанне экстрэмісцкай дзейнасці) Крымінальнага кодэкса.

Пенсіянерку з Брэста асудзілі на паўтара года “хатняй хіміі” за каментар у Тэлеграме

У Маскоўскім судзе Брэста 3 студзеня асудзілі Наталлю Малец паводле арт. 369 (Абраза прадстаўніка ўлады) Крымінальнага кодэкса. Суддзя Інна Клышпач прызначыла жанчыне год і шэсць месяцаў абмежавання волі без накіравання ў папраўчую ўстанову адкрытага тыпу (“хатнюю хімію”).