Мікіта Уладзіміравіч Емяльянаў — актывіст анархісцкага руху, асуджаны 12 лютага 2020 года судом Савецкага раёна г. Мінска да 7 гадоў пазбаўлення волі ў калоніі ўзмоцненага рэжыму. Абодвух прызналі вінаватымі па трох артыкулах Крымінальнага кодэкса: арт. 341, ч. 1 арт. і 14 ч. 2 арт. 218, ч. 2 арт. 295-3. 27 сакавіка Мінгарсуд па апеляцыйнай скарзе зменшыў тэрмін Мікіту Емяльянаву да 4 гадоў калоніі ўзмоцненага рэжыму.

29 траўня 2021 пераведзены на строгі рэжым турэмнага ўтрымання, а 9 чэрвеня этапаваны ў магілёўскую Турму № 4. 

Адміністрацыя турмы часта накладала на палітзняволенага анархіста спагнанні і карала суткамі ў ШІЗА. Так, Мікіта Емяльянаў знаходзіўся ў карцары з 11 кастрычніка па 10 лістапада 2021 нібыта за парушэнні правілаў унутранага распарадку. Там ён трымаў 20-дзённую галадоўку.

Да гэтага палітвязень утрымліваўся 42 сутак у ШІЗА: адміністрацыя турмы склала тады на яго шэсць пратаколаў. Хлопца ўжо пазбавілі кароткатэрміновага спаткання з роднымі, якое на строгім турэмным рэжыме прадугледжанае раз на год. Яго таксама абмяжоўваюць у атрыманні лістоў ад родных, сяброў і нават вымаюць малюнкі малодшага брата. 

17 лістапада 2021 (праз тыдзень пасля выхаду з ШІЗА) палітвязню зноў вынеслі спагнанне ў 10 сутак за тое, што ён адмовіўся выканаць патрабаванне адміністрацыі прыбраць дворык для шпацыру. Пасля гэтага на палітзняволенага было накладзенае яшчэ адно спагнанне ў выглядзе 10 сутак ШІЗА за тое, што ён ляжаў на падлозе ў камеры ізалятара. А 7 снежня Мікіту Емяльянаву прызначылі яшчэ 10 сутак утрымання ў ШІЗА за міжкамерную сувязь. 17 снежня яго не выпусцілі з ШІЗА. Агулам у карцары ён правёў 38 дзён і выйшаў толькі 25 снежня. Па выхадзе з карцару яму аддалі дадатковую пасылку з садавінай, гароднінай і кніжную бандэроль, якія сваякі адправілі яшчэ 12 лістапада. Акрамя гэтага, з 25 снежня адміністрацыя турмы трымала Мікіту ў адзіночнай камеры. 

Напрыканцы лістапада 2021 года Магілёўскі міжраённы аддзел следчага камітэту ўзбудзіў у адносінах да палітвязня крымінальную справу па ч. 2 арт. 411 Крымінальнага кодэкса — “Злоснае непадпарадкаванне патрабаванням адміністрацыі папраўчай установы, якая выконвае пакаранне ў выглядзе пазбаўлення волі, здзейсненае асобай, асуджанай за цяжкае злачынства”. 24 снежня палітвязню было пра’яўлена канчатковае абвінавачванне ў злосным непадпарадкаванні адміністрацыі турмы. Цяпер яму пагражае да двух гадоў зняволення. Мікіта азнаёміўся з матэрыяламі справы, а падчас допыту адмовіўся ад дачы паказанняў.

17 студзеня 2022 хлопцу прызначылі сем сутак ШІЗА, адразу пасля — яшчэ сем сутак, а затым 10 сутак. 13 лютага Емяльянаву зноў вынеслі спагнанне ў выглядзе 10 сутак ШІЗА. Двойчы Мікіту выносілі спагнанні за тое, што ён адмаўляўся прыбіраць прагулачны дворык. Яшчэ адзін раз — за тое, што не зрабіў даклад падчас праверкі. Хлопец кажа, што сапраўды адмаўляўся прыбіраць дворык, бо на прагулку яго прыводзілі ва ўжо брудны двор, дзе было наплявана іншымі вязнямі, накідана цыгарэтных недакуркаў. Палітвязень не адмаўляецца прыбіраць за сабой, ён сочыць за чысцінёй у камеры, але не разумее, чаму, на думку адміністрацыі турмы, прыбіраць за астатнімі таксама мусіць менавіта ён.

27 студзеня 2022 на тэрыторыі Турмы № 4 пачаўся разгляд крымінальнай справы ў дачыненні да Мікіты Емяльянава за злоснае непадпарадкаванне патрабаванням адміністрацыі папраўчай установы (ч. 2 арт. 411 КК). Вядома, што сваімі дзеяннямі Мікіта выказваў свой пратэст супраць адміністрацыі турмы, якая адмаўляецца ўручаць яму лісты па надуманых прычынах. На працэсе дазволілі прысутнічаць толькі бацькам палітвязня, самога Мікіту Емяльянава неўзабаве выдалілі з залы з-за "непавагі да суду": хлопец не палічыў патрэбным уставаць перад суддзёй суда Ленінскага раёна г. Магілёва Аксанай Ратнікавай, "бо ў нашай краіне справядлівага і незалежнага суду не існуе”. Прызначаны на 16 лютага працяг судовага пасяджэння не адбыўся праз хваробу суддзі Ратнікавай. 

Да 23 лютага Мікіта быў змешчаны ў карцар. Там ён знаходзіўся 38 сутак запар. Са жніўня 2021 года гэта ўжо пяты раз, калі палітвязня караюць суткамі ў карцары: у жніўні-верасні 2021 ён адбыў у карцары 42 дні, у кастрычніку-лістападзе 2021 — 30 дзён, у снежні-студзені 2022 — 13 дзён, а цяпер — яшчэ 38 дзён. Агулам без пасцельнай бялізны і штодзённага шпацыру ў нечалавечых умовах Мікіта адседзеў больш за пяць месяцаў.

Вядома, што супрацоўнікі адміністрацыі не прымаюць скаргі і заявы ад Мікіты, таму ён на знак пратэсту аб'явіў сухую галадоўку з 3 лютага і трымаў яе 10 дзён. Пасля ён пачаў піць ваду праз дрэннае самаадчуванне, але працягнуў галадоўку. 25 лютага Мікіта спыніў галадоўку. Да 4 сакавіка хлопец змешчаны ў СІЗА.

9 сакавіка 2022 года на тэрыторыі Турмы № 4 г. Магілёва працягнуўся судовы працэс над Мікітам Емяльянавым. Пракурор прасіў прызнаць Емяльянава вінаватым паводле ч. 2 арт. 411 Крымінальнага кодэкса і пакараць яго пазбаўленнем волі тэрмінам на два гады. Менавіта столькі 11 сакавіка суддзя Аксана Ратнікава і прызначыла Мікіту, а па сукупнасці пакаранняў — тры гады і шэсць месяцаў калоніі ва ўмовах строгага рэжыму. Адразу пасля суда, 12 сакавіка, Мікіту ізноў змясцілі ў карцар, дзе ён правёў 46 сутак запар.

13 чэрвеня 2022 года Мікіту этапавалі з Турмы № 4 у ваўкавыскую ПК № 11. Адразу па прыбыцці ў калонію яго закінулі ў ШІЗА на 18 сутак, у жніўні — на 7 сутак. Прычыны пакуль невядомыя. Акрамя гэтага, палітвязня пазбавілі кароткатэрміновага спаткання. З 25 кастрычніка яго змясцілі ў памяшканне камернага тыпу (ПКТ). Але на наступны дзень яго закінулі ў ШІЗА на 10 сутак, пры тым, што тэрмін у ШІЗА не залічваецца ў тэрмін ПКТ. 

Напярэдадні Новага году Мікіту ізноў змясцілі на 10 сутак у ШІЗА, у лютым — яшчэ на 15. Таксама паведамлялася, што Мікіту блакуюць ліставанне і 8 месяцаў не перадавалі са складу кнігі.

У судзе Ваўкавыскага раёна 23 сакавіка 2023 г. суддзя Мікалай Сяргейка прыняў рашэнне аб пераводзе Мікіты Емяльянава на турэмны рэжым. Палітвязня змясцілі ў гродзенскую Турму № 1.

"Я малявала смайлік і пісала, што гэта азначае жарт". Маці анархіста Мікіты Емяльянава — пра перапіску з сынам, у якой турэмная цэнзура шукае шыфр

У мінчанкі Анастасіі Емяльянавай і яе мужа чацвёра сыноў. Старэйшы — Мікіта — вучыўся ў БНТУ на трэцім курсе па спецыяльнасці "Караблебудаванне і тэхнічная эксплуатацыя воднага транспарту". У канцы кастрычніка 2019 года яго затрымалі, а праз некалькі месяцаў — перад пачаткам судовага працэсу — адлічылі з ВНУ.

Праз два месяцы суд дазволіў бацькам Емяльянава забраць яго рэчы са склада. Палітвязень дагэтуль у карцары

За час зняволення ў палітвязня Мікіты Емяльянава назапасілася вялікая колькасць непатрэбных яму рэчаў, якія знаходзяцца на складзе турмы № 4 г. Магілёва. Родныя хлопца звярнуліся да адміністрацыі папраўчай установы з заявай на выдачу асабістых рэчаў, аднак там ім сказалі, што дазвол трэба прасіць у суда, бо Мікіта ўжо знаходзіўся пад вартай па абвінавачванні паводле ч. 2 арт. 411 Крымінальнага кодэкса.

Пракурор запрасіў для Мікіты Емяльянава два гады пазбаўлення волі па 411 артыкуле

Мікіта прысутнічаў на пасяджэнні, хаця да гэтага яго выдалялі з залы за непадпарадкаванне суду.

Мікіта Емяльянаў спыніў галадоўку, але яго працягваюць утрымліваць у ШІЗА

24 лютага стала вядома, што палітзняволенаму анархісту Мікіту Емяльянаву дадалі яшчэ 10 сутак штрафнога ізалятара. Цяпер ён прабудзе там да 4 сакавіка. Вядома, што хлопец спыніў галадоўку, якую трымаў з 3 лютага.

Да двух гадоў зняволення: пачаўся суд над Мікітам Емяльянавым за парушэнні рэжыму ў турме

На пасяджэнні дазволілі прысутнічаць толькі бацькам Мікіты, а сяброў і непаўналетніх братоў не дапусцілі. Мікіта Емяльянаў прысутнічаў у зале, аднак адмовіўся ўставаць пры адказе на пытанні суда. Аксана Ратнікава патрабавала, каб абвінавачаны ўставаў і папярэдзіла яго, што за непавагу да суду палітвязня могуць выдаліць з пасяджэння. Мікіта Емяльянаў патлумачыў, што не лічыць патрэбным уставаць: “Гэта не суд, а судзілішча, бо ў нашай краіне справядлівага і незалежнага суду не існуе”.

На Мікіту Емяльянава ўзбудзілі новую справу за злоснае непадпарадкаванне адміністрацыі турмы

У межах дадзенай крымінальнай справы Мікіта Емяльянаў ужо адмовіўся ад дачы паказанняў у якасці падазраванага. Вядома, што супрацоўнікі турмы склалі на палітвязня больш за 60 рапартаў за парушэнні рэжыму ўтрымання. Але сам Мікіта раней тлумачыў, што рэжым парушаў на знак пратэсту пастаяннага парушэння яго правоў адміністрацыяй турмы.

Мікіту Емяльянава зноў кінулі ў ШІЗА. Агулам ён прабудзе там 30 сутак

Як стала вядома праваабаронцам “Вясны”, адміністрацыя турмы № 4 ізноў тройчы пакарала палітзняволенага анархіста Мікіту Емяльянава суткамі ў штрафным ізалятары.

 

 

Як палітвязень Мікіта Емяльянаў спрабаваў набыць кнігі і што з гэтага атрымалася

Палітзняволены Мікіта Емяльянаў з 9 чэрвеня 2020 года быў пераведзены на строгі турэмны рэжым у Магілёўскую турму № 4. Там ён вырашыў набываць кнігі ў гандлёвай сетцы, як гэта прадугледжана Крымінальна-выканаўчым кодэксам. Аднак тое, што напісана ў законе, даволі складана працуе на практыцы.

Суд прызначыў вялікія тэрміны зняволення актывістам анархісцкага руху Емяльянаву і Комару

У судзе Савецкага раёна Мінска 12 лютага абвешчаны прысуд па справе актывістаў анархісцкага руху Мікіты Емяльянава і Івана Комара.

Прававое абгрунтаванне пазіцыі "Вясны" па крымінальнай справе Мікіты Емяльянава і Івана Комара

Праваабарончы цэнтр "Вясна" прааналізаваў прысуд суда Савецкага раёна Мінска ад 12 лютага 2020 года, якім былі асуджаныя 19-гадовыя анархісты Мікіта Емяльянаў і Іван Комар.

Пяць фактаў пра новых палітвязняў Беларусі

"Вясна" сабрала пяць цікавых фактаў па кейсу Мікіты Емяльянава і Івана Комара: пра суд, палітычны складнік і іншыя.

На сям’ю Мікіты Емяльянава па-ранейшаму аказваецца ціск

Маці палітзняволенага Мікіты Емяльянава паведаміла праваабаронцам “Вясны”, што працяглы час на яе сям’ю аказваецца ціск з боку праваахоўных органаў.

Праблемы з карэспандэнцыяй, недахоп ежы і ШІЗА. Як сядзіць у турме палітвязень Мікіта Емяльянаў

Палітзняволены Мікіта Емяльянаў з 9 чэрвеня быў пераведзены на строгі турэмны рэжым у Магілёўскую турму № 4. Пачынаючы са студзеня ў сваіх лістах да родных ён скардзіцца на праблемы з карэспандэнцыяй і немагчымасць наесціся той ежай, што яму даюць.