Людміла Юр'еўна Чэкіна — былая генеральная дырэктарка TUT.BY.

Працуе ў TUT.BY з 2008 года. Спачатку яна была юрысконсультам, а затым стала дырэктарам. У 2017 годзе Людміла ўзначаліла "ТУТ Бай медыя". Калегі кажуць, што яна вельмі цярплівы і добры чалавек, шануе людзей, заўсёды гатовая дапамагчы і шукае выйсце з любой сітуацыі.

Акрамя таго Людміла любіць чытаць, кветкі і жывёл — у яе двое катоў.

Людміла была затрыманая 18 траўня 2021 года ў межах крымінальнай справы, распачатай супраць TUT.BY за ўхіленне ад выплаты падаткаў у асабліва буйным памеры (ч. 2 арт. 243 Крымінальнага кодэксу).

У кастрычніку 2022 г. КДБ уключыў Людмілу ў спіс "асобаў, датычных да тэрарыстычнай дзейнасці".

Людмілу Чэкіну абвінавачвалі паводле трох артыкулаў Крымінальнага кодэксу:

• ч. 2 арт. 243 (ухіленне ад выплаты сумаў падаткаў, збораў у асабліва буйным памеры);
• ч. 4 арт. 16, ч. 3 арт. 130 (арганізацыя наўмысных дзеянняў, скіраваных на распальванне расавай, нацыянальнай, рэлігійнай альбо іншай сацыяльнай варожасці па прыкмеце расавай, нацыянальнай, рэлігійнай, моўнай ці іншай сацыяльнай прыналежнасці, якія ўчыненыя групай асобаў або пацягнулі цяжкія наступствы);
• ч. 4 арт. 16, ч. 3 арт. 361 (кіраўніцтва заклікамі да дзеянняў, скіраваных на нанясенне шкоды нацыянальнай бяспецы Рэспублікі Беларусь, учыненае з выкарыстаннем сродкаў масавай інфармацыі або глабальнай камп’ютарнай сеткі Інтэрнэт).

9 студзеня 2023 г. у Мінскім гарадскім судзе пачаўся разгляд справы супраць найбуйнейшага беларускага незалежнага парталу TUT.BY. Судовы працэс ад самага пачатку зрабілі закрытым. 17 сакавіка 2023 г. суддзя Валянціна Зянькевіч прызначыла былой галоўнай рэдактарцы парталу Марыне Золатавай і былой генеральнай дырэктарцы Людміле Чэкінай па 12 гадоў калоніі ва ўмовах агульнага рэжыму кожнай. Людміле таксама прызначылі штраф у памеры 1 000 базавых велічыняў (37 000 рублёў).

31 ліпеня 2023 г. Вярхоўны суд разглядзеў апеляцыю па "справе TUT.ВY" — прысуд пакінуты без зменаў, а апеляцыя без задавальнення. Рашэнне прымаў суддзя Ігар Любавіцкі.

8 жніўня 2023 г. палітзняволеную перавялі ў ПК № 4 з СІЗА-1.

18 жніўня 2023 г. МУС унёс палітзняволеную ў "Пералік грамадзян Беларусі, замежных грамадзян або асоб без грамадзянства, якія маюць дачыненне да экстрэмісцкай дзейнасці".

Па 12 гадоў калоніі: абвешчаны прысуд па "справе TUT.BY"

Увечары 16 сакавіка па БТ паказалі "расследаванне" пра працу TUT.ВY. Прапагандыстка Ксенія Лебедзева хацела распавесці гледачам, у чым вінаватыя супрацоўніцы парталу. Але, у сутнасці, іх абвінавацілі ў тым, што ў 2013-2014 гг. журналісты асвятлялі падзеі ва Украіне падчас Майдану, у 2010 годзе пісалі пра паслявыбарчыя акцыі пратэстаў у Беларусі, пра дэвальвацыі ў краіне, а таксама пра рэпрэсіі супраць мірных беларускіх пратэстоўцаў у 2020 годзе. Але сутнасць выстаўленых абвінавачванняў Золатавай і Чэкінай невядомая.

«Міла ніколі не была такой "бос", яна – мяккая, ціхая сіла»

Гісторыю Людмілы Чэкінай расказваюць ейныя калегі, для якіх яна заўжды – Міла.

Сёння ў закрытым рэжыме пачынаецца суд па "справе TUT.ВY"

Цяпер пад вартай утрымліваюцца былая галоўная рэдактарка Марына Золатава і былая генеральная дырэктарка Людміла Чэкіна. Вользе Лойцы, Алене Талкачовай і Кацярыне Ткачэнцы раней змянілі меру стрымання. "Вясна" распавядае, у чым абвінавачваюць супрацоўніц парталу TUT.BY, і што цяпер вядома па справе.

«Сын і дачка трымаюцца бадзёра». Пагутарылі з блізкімі калегаў, якія праз трое сутак не выйшлі на волю

Мы вельмі чакалі, што праз 72 гадзіны затрыманых супрацоўнікаў TUT.BY адпусцяць на волю, але гэтага не здарылася. Вядома, што большасць нашых калегаў накіравалі ў СІЗА № 1, некаторыя застаюцца ў СІЗА КДБ. Гэта значыць, што цяпер яны знаходзяцца ў статусе падазраваных паводле крымінальнай справы. Абвінавачванне пакуль не прад'яўлена, блізкія людзі разгублены і не ведаюць, чаго чакаць. Пагаварылі з некаторымі са сваякоў.