Ірына Аляксандраўна Слаўнікава — журналістка, была затрымана ў мінскім аэрапорце, калі з мужам вярталася з адпачынку.

Іх абаіх 1 лістапада суддзя Першамайскага раёна Максім Трусевіч асудзіў да 15 сутак арышту нібыта за захоўванне ў Facebook матэрыялаў, якія былі прызнаныя «экстрэмісцкімі». 15 лістапада другі раз запар журналістка атрымала 15 сутак па абвінавачванні ў «дробным хуліганстве».

26 лістапада стала вядома, што Ірына Слаўнікава стала падазраванай паводле ч. 1 арт. 342 Крымінальнага кодэксу («Арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх»). На пачатку снежня 2021 Ірыну перавялі з ЦІП на Акрэсціна ў СІЗА-1.

У канцы красавіка 2022 Следчы камітэт паведаміў, што Ірыну таксама абвінавацілі ў кіраванні экстрэмісцкім фармаваннем паводле ч. 1 арт. 361-1 КК. На пачатку чэрвеня Ірыну перавялі ў гомельскі СІЗА-3.

23 чэрвеня 2022 г. распачаўся судовы разгляд. Пасля двухтыднёвага перапынку ў Гомельскім абласным судзе 6 ліпеня працэс аднавіўся. 21 ліпеня ў працэсе быў абвешчаны перапынак да 2 жніўня. Дзяржабвінавачванне запрасіла для Ірыны 4 гады зняволення.

У Гомельскім абласным судзе 3 жніўня 2022 г. вынесены прысуд: прызнаць Ірыну Слаўнікаву вінаватай і прызначыць ёй па сукупнасці пакаранняў пяць гадоў пазбаўлення волі ў калоніі ва ўмовах агульнага рэжыму. 6 снежня Вярхоўны суд разгледзеў апеляцыйную скаргу: прысуд журналістцы пакінулі без зменаў. Неўзабаве яе перавялі ў гомельскую ПК № 4.

16 снежня 2022 г. палітзняволеную ўключылі ў Пералік грамадзян Беларусі, замежных грамадзян або асоб без грамадзянства, якія маюць дачыненне да экстрэмісцкай дзейнасці.

Вядома, што палітзняволеная журналістка шмат працуе ў швейным цэху гомельскай калоніі, праз што ў яе моцна пагоршыўся зрок. Таксама Ірына не атрымлівае лістоў ад сяброў і знаёмых — толькі ад самых блізкіх сваякоў.

Напрыканцы кастрычніка 2023 г. муж Ірыны распавёў "Радыё Свабода" апошнія звесткі пра яе:

"Сказала, што цяпер вельмі мала вольнага часу. Працуе на «швейцы», а гэта даволі цяжкая, напружаная праца. Стамляецца. У дзве змены працуе. Бывае, што і па суботах. У дадатак да гэтага яе рэгулярна ставяць на дзяжурствы: то «кубрык» (жылы пакой у калоніі) даводзіцца прыбіраць, то адпраўляюць працаваць на кухню і ад гэтага вольнага часу бракуе. Нават, каб напісаць ліст, не хапае часу.

Акрамя таго, што пагоршыўся зрок і мусіла заказаць новыя акуляры, дык адбіваецца ранейшая хвароба. Ёй патрэбна добрая тэрапія. Сваякі, што могуць, робяць, перадаюць ёй лекі. Добра, што лекі прымаюць. А пра астатняе… Будзем спадзявацца на лепшае".

"Засталася ў Беларусі, бо занадта верыла ў здаровы розум"

Гісторыю Ірыны распавядаюць ейныя муж і сябры.

Журналістку Ірыну Слаўнікаву асудзілі да пяці гадоў калоніі

Справу разглядаў суддзя Мікалай Доля, дзяржабвінаваўца — Ірына Падкавырава.

У Гомелі аднавіўся суд над палітзняволенай журналісткай Ірынай Слаўнікавай

Працэс ад самага пачатку праходзіць у закрытым рэжыме, адвакатам не дазваляюць яго каментаваць. Учора ў працэсе ў якасці сведкі быў дапытаны бацька журналісткі.

У Гомелі пачаўся суд над палітзняволенай журналісткай Ірынай Слаўнікавай

На думку следчых, у справе ёсць доказы, што Ірына Слаўнікава з'яўлялася кіраўніцай «Белсата», прызнанага ў Беларусі «экстрэмісцкім фарміраваннем».

Журналістку Ірыну Слаўнікаву абвінавачваюць у стварэнні экстрэмісцкага фармавання, ёй пагражае да 7 гадоў зняволення

Былая супрацоўніца «Белсату», а цяпер штатная супрацоўніца Польскага тэлебачання (TVP) з’яўляецца палітзняволенай і неўзабаве паўстане перад судом. Яе абвінавачваюць у здзяйсненні злачынстваў паводле двух артыкулаў Крымінальнага кодэксу. Бацька Ірыны Аляксандр сцвярджае, што ў рэжыму няма доказаў віны ягонай дачкі.