Дзмітрый Васільевіч Сушчык з Навагрудку быў затрыманы расійскімі памежнікамі, калі спрабаваў выехаць з Беларусі.

Яго перадалі беларускім сілавікам, змясцілі ў СІЗА па абвінавачванні па крымінальных справах аб абразе прэзідэнта (арт. 368 Крымінальнага кодэксу) і абразе дзяржаўнай сімволікі (арт. 370 Крымінальнага кодэксу).

2 сакавіка 2022 года суд Навагрудскага раёна прызнаў Дзмітрыя вінаватым у здзяйсненні злачынства паводле ч. 1 арт. 368 "Абраза прэзідэнта Рэспублікі Беларусь" і прысудзіў яму 1,5 года пазбаўлення волі. Таксама суд прызнаў яго вінаватым у апаганьванні сцяга і герба Беларусі, прысудзіўшы па гэтым артыкуле 1 год пазбаўлення волі. Па сукупнасці пакаранняў шляхам паглынання менш строгага пакарання больш строгім у канчатковым выніку Дзмітрыю прысудзілі 1,5 года калоніі агульнага рэжыму. У тэрмін прызначанага пакарання суд пастанавіў залічыць знаходжанне Сушчыка пад хатнім арыштам і пад вартай.

У красавіку 2022 года Дзмітрыя перавялі з СІЗА-3 у аршанскую калонію № 8, адміністрацыя якой цісне на палітвязня, ён мае праблемы з ліставаннем. У чэрвені 2022-га яго змясцілі ў ПКТ і на дзевяць месяцаў пазбавілі спатканняў і тэлефанаванняў. Таксама вядома, што Дзмітрыя рэгулярна змяшчаюць у штрафны ізалятар за "парушэнне парадку". Пры гэтым тэрмін ШІЗА не залічваецца ў тэрмін ПКТ. 

На пачатку верасня 2022 г. стала вядома, што ў Оршы адбыўся суд па ўзмацненні рэжыму палітвязню. Паводле рашэння суддзі Дзмітрыя перавялі на турэмны рэжым і накіравалі ў гродзенскую турму № 1. Па прыбыцці туды яму адразу былі выпісаныя два парушэнні і яго зноў збіраліся змясціць у ШІЗА.

У Дзмітрыя 13 красавіка 2023 г. памерла маці.

У Оршы 1 верасня 2023 года адбыўся суд паводле ч. 1 арт. 411 КК (Злоснае непадпарадкаванне патрабаванням адміністрацыі турмы). Справу Дзмітрыя разглядала суддзя Наталля Козел. Дзмітрыю дадалі да тэрміну зняволення яшчэ 1 год і 15 дзён. То-бок, тэрмін зняволення палітвязня мусіў скончыцца 18 жніўня, і ён ужо павінен быў выйсці на волю, але гэтага не адбылося праз перазатрыманне і суд па новай крымінальнай справе. 

Напрыканцы снежня стала вядома, што палітвязень ужо знаходзіцца ў аршанскай калоніі № 8. Адміністрацыя ўстановы змясціла Сушчыка ў ШІЗА, але тэрмін і прычыны — невядомыя.

Жыхару Навагрудка, які перажыў "допыт" у лесе, запіс "пакаяльнага" відэа і экстрадыцыю, прысудзілі 1,5 гады калоніі за абразу Лукашэнкі і апаганьванне герба і сцяга

17 лютага падчас спробы выехаць за межы Беларусі мужчыну спынілі расійскія памежнікі, вывезлі ў Беларусь і перадалі сілавікам. Вядома таксама, што з 28 студзеня па 16 лютага Дзмітрый Сушчык лічыўся пад хатнім арыштам. А з 17 лютага да суда па сваёй справе ўтрымліваўся пад вартай у гомельскім СІЗА.