Дзмітрый Леанідавіч Каханоўскі — супрацоўнік "Белтэлекам" з Магілёва, быў затрыманы на працоўным месцы 28 кастрычніка 2021 года. Мае дзіця.

Згодна з абвінавачваннем, ён нібыта здабываў з базы асабістыя дадзеныя сілавікоў, дзяржслужачых, суддзяў. Следства сцвярджае, што ўсяго было 46 падобных эпізодаў. Вядома, што яму прад'яўлена абвінавачванне па арт. 130 Крымінальнага кодэксу (Распальванне сацыяльнай варожасці).

Дзмітрый быў змешчаны ў СІЗА-1, на пачатку лістапада 2022 г. пераведзены ў віцебскі СІЗА-2.

21 лістапада 2022 г. у Віцебскім абласным судзе распачаўся разгляд справы ў закрытым рэжыме. Падчас следства Дзмітрыю выставілі абвінавачванне паводле ч. 3 арт. 352 КК (Неправамернае завалоданне камп'ютарнай інфармацыяй), ч. 1 арт. 130 КК (Распальванне расавай, нацыянальнай, рэлігійнай або іншай сацыяльнай варожасці і варажнечы), ч. 3 арт. 203-1 КК (Незаконныя дзеянні ў дачыненні да інфармацыі пра прыватнае жыццё і персанальных дадзеных). Суддзя Яўген Буруноў прызнаў палітвязня вінаватым і прызначыў яму шэсць з паловай гадоў зняволення ва ўмовах агульнага рэжыму.

3 студзеня 2023 г. КДБ уключыў палітвязня ў спіс "асоб, якія маюць дачыненне да тэрарыстычнай дзейнасці".

На пачатку студзеня 2023 г. Дзмітрыя этапавалі ў наваполацкую ПК № 1.

Супрацоўніка "Белтэлекама" асудзілі на шэсць з паловай гадоў калоніі за завалоданне персанальнымі дадзенымі сілавікоў

Згодна з абвінавачваннем, мужчына нібыта “здабываў з базы асабістыя дадзеныя сілавікоў, дзяржслужбоўцаў, суддзяў”. Следства сцвярджае, што ўсяго было 46 падобных эпізодаў.