Арсеній Аляксандравіч Дзядок — моладзевы актывіст, былы актывіст Моладзі БНФ. Арсеній быў затрыманы 20 красавіка 2022 года.

На праўладных тэлеграм-каналах з’явілася «пакаяльнае відэа» з хлопцам, дзе ён кажа, што нібыта «браў удзел у акцыях пратэсту ў жніўні 2020 году», а таксама «праходзіў рэгістрацыю ў чат-боце "Перамога"». 

Арсенію прад'явілі абвінавачванне паводле арт. 342 Крымінальнага кодэксу (Групавыя дзеянні, што груба парушаюць грамадскі парадак).

15 верасня ў судзе Савецкага раёна Мінска распачаўся разгляд справы. На наступны дзень Арсенія асудзілі да трох гадоў абмежавання волі з накіраваннем у папраўчую ўстанову адкрытага тыпу. Палітвязня адпусцілі ў зале суда да накіравання ў месца адбывання пакарання.

23 снежня 2022 г. МУС уключыла яго ў "спіс экстрэмістаў".

У канцы траўня 2023 г. стала вядома, што Арсеній адбывае пакаранне ў ПУАТ № 9. Там ён адбыў 5 сутак у ШІЗА.

Былому актывісту Моладзі БНФ Арсенію Дзядку прысудзілі тры гады "хіміі"

Арсеній Дзядок неаднаразова затрымліваўся, апошні раз яго схапілі пад час акцыі пратэсту ў Мінску 14 ліпеня 2020 года. А крыху раней, тады яшчэ 17-гадовы Арсеній, зазнаў пераслед з боку Камісіі па справах непаўналетніх за ўдзел у акцыях пратэсту.

Камісія па справах непаўналетніх учыніла расправу над удзельнікам акцый пратэсту

23 студзеня 2020 года прайшло чарговае пасяджэнне камісіі па справах непаўналетніх Савецкага раёна г. Мінска ў дачыненні да Арсенія Дзядка – 17-гадовага моладзевага актывіста. Ён мае 4 пратаколы, складзеныя па артыкуле 23.34 КаАП (парушэнне парадку арганізацыі і правядзення масавых мерапрыемстваў) і чакае яшчэ некалькі. Арсеній паведаміў “Вясне”, што сам трохі заблытаўся, як адзін з пратаколаў вынікае з іншага і як яны звязаны паміж сабой. Паспрабуем разабрацца.