Андрэй Віктаравіч Кудзік — актывіст з Вілейкі, якога неаднаразова пераследавалі за пікетаванне і выказванне сваёй грамадзянскай пазіцыі на працягу 2020 і 2021 года: затрымлівалі, штрафавалі, арыштоўвалі. 9 жніўня 2021 года яго зноў затрымалі і агулам асудзілі на 90 сутак адміністрацыйнага арышту, якія ён адбываў у невыносных умовах ізалятарах Вілейкі і Смалявічаў. Пасля адбывання арышту Андрэй на волю так і не выйшаў. Яго перавезлі ў ІЧУ на Акрэсціна, а потым змясцілі ў СІЗА-1 на Валадарскага.

20 кастрычніка 2021 стала вядома, што яго абвінавачваюць паводле ч. 1 арт. 342 Крымінальнага кодэкса.

У судзе Заводскага раёна Мінска 16 лютага 2022 агучылі прысуд: суддзя Алег Каляда прызначыў Андрэю два гады калоніі ва ўмовах агульнага рэжыму — менавіта такое пакаранне прасіў пракурор. На судзе актывіст не прызнаў віну і адмовіўся ад дачы паказанняў.

У сярэдзіне красавіка 2022 года быў этапаваны з СІЗА-1 у турму №4, з 21 траўня 2022 г. Андрэй адбывае пакаранне ў магілёўскай ПК № 15.

У кастрычніку МУС уключыў палітвязня ў спіс "асобаў, датычных да экстрэмісцкай дзейнасці".

18 ліпеня 2023 г. палітвязень выйшаў на волю, цалкам адбыўшы тэрмін.

У кастрычніку 2023 г. Андрэю прызначылі 15 сутак арышту за віншаванне Украіны з Днём Незалежнасці ў TikTok. Яго справу 19 кастрычніка ў судзе Вілейскага раёну разглядала суддзя Алена Ахметава. Андрэя абвінавацілі ў тым, што 24 жніўня ён размясціў у TikTok свае фотаздымкі з подпісам "З Днём Незалежнасці, Украіна". Гэта палічылі "несанкцыянаваным пікетаваннем". Кудзік на судзе віну не прызнаў і распавёў, што ўбачыў 24 жніўня віншаванне Лукашэнкі з Днём Незалежнасці Украіны і таксама вырашыў павіншаваць суседні народ.

15 лютага 2024 г. актывіст перастаў выходзіць на сувязь. Пазней стала вядома, што Кудзік знаходзіцца ў мясцовым ІЧУ, дзе адбывае 15 сутак адміністрацыйнага арышту. Але на волю па сканчэнні тэрміна ён не выйшаў. Яго накіравалі у турму № 8. 

Вядома, што Андрэя будуць судзіць па артыкуле 369-1 КК (дыскрэдытацыя Рэспублікі Беларусь). Суд па справе прызначаны на 15 ліпеня 2024 г. у судзе Маладзечанскага раёна. Суддзя Аляксей Іршын прызначыў палітвязню чатыры гады калоніі ва ўмовах строгага рэжыму.

Актывіста з Вілейкі асудзілі за відэа да чатырох гадоў калоніі

Напачатку 2022 года Андрэя ўжо асудзілі за ўдзел у акцыях пратэсту. У сярэдзіне ліпеня 2023 года палітвязень выйшаў на волю, цалкам адбыўшы тэрмін у магілёўскай калоніі, але праз паўгода зноўку быў затрыманы.

Актывіста з Вілейкі асудзілі да 2 гадоў калоніі за ўдзел у акцыях пратэсту

У судзе Заводскага раёна Мінска 16 лютага агучылі прысуд па крымінальнай справе па ч. 1 арт. 342 КК (удзел у дзеяннях, якія груба парушаюць грамадскі парадак) супраць палітзняволенага актывіста з Вілейкі, сябра Аб'яднанай грамадзянскай партыі Андрэя Кудзіка.