Аляксей Кузьмін
Саліст музычнага гурта "Закон гуку", асуджаны да 7 гадоў калоніі
Дата нараджэння: 15 чэрвеня 1980
Дата затрымання: 26 кастрычніка 2022
Прад'яўленыя абвінавачванні:
арт. 342 Крымінальнага кодэкса — Арганізацыя і падрыхтоўка дзеянняў, што груба парушаюць грамадскі парадак, альбо актыўны ўдзел у іх
арт. 130 Крымінальнага кодэкса — Распальванне варожасці ці варажнечы
Вынік суда: 7 гадоў
Від пакарання: пазбаўленне волі ў калоніі ва ўмовах узмоцненага рэжыму
Суддзя: Хрыпач Сяргей
Месца зняволення: ПК № 15
Заява аб прызнанні палітвязнем
Аляксей Уладзіміравіч Кузьмін — начальнік аддзелу МТС, саліст музычнага гурта "Закон гуку". Ён быў затрыманы 26 кастрычніка 2022 года за тое, што нібыта перадаваў асабістыя дадзеныя сілавікоў і "высокапастаўленых асобаў" "Чорнай кнізе Беларусі".
Галоўным следчым упраўленнем яму прад'яўлена абвінавачанне па ч. 6 арт. 16 і ч. 3 арт. 130 (Дапамаганне ў распальванні варожасці і варажнечы, учыненае групай асоб) Крымінальнага кодэкса. А таксама па арт. 342 (Арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх).
Аляксея ўзялі пад варту ў СІЗА-1.
Вядома, што ў Кузьміна трое дзяцей, адзін з іх з інваліднасцю.
Суд над ім пачаўся 11 верасня 2023 г. ў Мінскім гарадскім судзе, пад пільнай увагай прапагандыстаў.
Згодна версіі абвінавачвання, Аляксей Кузьмін, з 9 жніўня 2020 года да 8 красавіка 2021 года, займаючы пасаду начальніка аддзела сістэм прадбілінга і тарыфікацыі кіравання тэлекам-рашэнняў Дэпартамента інфармацыйных тэхналогій СТАА "МТС" і маючы доступ да асабістай інфармацыі кліентаў аператара мабільнай сувязі, "зліваў" у Telegram-каналы "Чорная кніга Беларусі", "Карнікі Беларусі", "Все нарушения!". Па справе праходзіла не менш за 57 пацярпелых: сілавікі, праўладныя журналісты, чыноўнікі, суддзі, пракуроры і члены іх сем'яў.
Таксама палітвязня судзілі за ўдзел у акцыі пратэсту, доказам якога з'яўляўся яго фотаздымак на дарозе. На судзе Аляксей віну прызнаў цалкам і раскаяўся ў здзейсненым. Ён хадайнічаў аб правядзенні працэсу ў закрытым рэжыме, але хадайніцтва не задаволілі.
Прысуд палітвязню вынес Сяргей Хрыпач. 18 верасня 2023 г. ён асудзіў Аляксея да 7 гадоў калоніі ва ўмовах узмоцненага рэжыму. Да пераводу ў калонію Аляксея ўтрымлівалі ў СІЗА № 1.
12 кастрычніка 2023 г. КДБ унёс Аляксея ў "спіс тэрарыстаў".
13 кастрычніка 2023 г. МУС дадала Аляксея ў "спіс экстрэмістаў".
На 8 снежня 2023 г. у Аляксея прызначаны разгляд апеляцыйнай скаргі ў Вярхоўным судзе. Старшыня судовай камісіі Святлана Бандарэнка.
З канца кастрычніка 2023 г. Аляксей адбывае тэрмін у ПК № 22.
Напрыканцы 2023 г. пераведзены ў ПК № 15.
Экс-мэнэджэра МТС і музыку Аляксея Кузьміна асудзілі да 7 гадоў калоніі
