Аляксей Ігаравіч Санчук быў затрыманы 4 лістапада 2020 г. на рэпетыцыйнай кропцы ў Мінску з барабаншчыкамі. Тады затрымалі не менш за 10 музыкаў. Пры затрыманні Аляксея збілі, прымусілі паказаць змесціва тэлефону. Пасля гэтага хлопца асудзілі на 15 сутак нібыта за ўдзел у несанкцыянаванай акцыі, але пасля арышту ён на волю не выйшаў.

26 лістапада яму выставілі абвінавачванне паводле ч. 1 арт. 342 Крымінальнага кодэкса (Арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх).

У лютым 2021-га стала вядома, што Аляксею дадалі арт. 293 Крымінальнага кодэкса (масавыя беспарадкі).

Жонка палітзняволенага барабаншчыка Аляксея Санчука: Дачка лічыць яго Героем

"Вясна" паразмаўляла з жонкай Аляксея, сабрала храналогію яго пераследу і распавядае, як барабаншчык стаў фігурантам крымінальнай справы па "пратэсным" артыкуле 342 Крымінальнага кодэкса.

У судзе Маскоўскага раёна Мінска 13 траўня 2021 года асудзілі 30-гадовага палітзняволенага барабаншчыка. Аляксея Санчука абвінавацілі па некалькіх артыкулах Крымінальнага кодэкса: ч. 1 і ч. 2 арт. 342 (арганізацыя, падрыхтоўка дзеянняў, актыўны ўдзел у дзеяннях, якія груба парушаюць грамадскі парадак), ч. 3 арт. 293 (навучанне ці іншая падрыхтоўка асоб для ўдзелу ў масавых беспарадках) і арт. 13 ч. 2 арт. 293 (падрыхтоўка да ўдзелу ў масавых беспарадках). Суддзя Таццяна Пірожнікава асудзіла палітвязня на шэсць гадоў пазбаўлення волі ва ўмовах узмоцненага рэжыму — менавіта такое пакаранне і прасіў пракурор Яўген Серакоў.