Аляксандр Капшуль

былы юрысконсульт ААТ "Нафтан"

Палітвязень

Дата нараджэння: 24 верасня 1978

Дата затрымання: 24 верасня 2021

Прад'яўленыя абвінавачванні:

арт. 295 Крымінальнага кодэкса — Незаконныя дзеянні ў дачыненні да агнястрэльнай зброі, боепрыпасаў і выбуховых рэчываў
арт. 361-1 Крымінальнага кодэкса — Стварэнне экстрэмісцкага фармавання або ўдзел у ім
арт. 356 Крымінальнага кодэкса — Здрада дзяржаве

Вынік суда: 15 гадоў

Від пакарання: пазбаўленне волі ў калоніі ва ўмовах узмоцненага рэжыму

Суддзя: Піскуноў Аляксандр

Месца зняволення: ПК № 2

Сімвалічны/ая хросны/ая: Кірсці Бергстэ, дэпутатка нарвежскага парламента і лідарка Сацыялістычнай Левай партыі Нарвегіі

Аляксандр Сяргеевіч Капшуль былы юрысконсульт ААТ "Нафтан" заводу "Палімір". Мае жонку і дваіх непаўнагадовых дзяцей.

25 верасня 2021 г. стала вядома, што мужчыну затрымалі ў Расійскай Федэрацыі, дзе ён быў па прыватных справах. Калі пачаліся затрыманні, Капшуль паехаў у Маскву, каб адтуль выехаць у Варшаву. Але проста па дарозе ў цягніку "Варонеж-Масква" ў Аляксандра праверылі дакументы супрацоўнікі ФСБ. Ён зразумеў, што па прыездзе ў расійскую сталіцу яго затрымаюць, і на хаду выскачыў з цягніка. Капшуль зламаў нагу і вывіхнуў руку, але змог дабрацца да мяжы з Украінай. Расійска-ўкраінскую мяжу Капшуль вырашыў прайсці легальна. На памежным пункце яго затрымалі, пасля супрацоўнікі ФСБ вывезлі мужчыну ў Беларусь і перадалі супрацоўнікам КДБ. Пасля мужчыну змясцілі ў СІЗА КДБ.

Аляксандр праходзіць па крымінальнай справе, узбуджанай паводле артыкулу аб здрадзе дзяржаве (ч. 1 арт. 356 Крымінальнага кодэксу) супраць супрацоўнікаў беларускіх заводаў, якія падтрымалі стачку і ўваходзілі ў "Рабочы рух". Гэтая ініцыятыва 21 верасня 2021 г. была прызнаная экстрэмісцкай, і адначасова па краіне прайшлі затрыманні рабочых. 

Таксама яму ставяць у віну ч. 2 арт. 295 КК (незаконныя дзеянні ў адносінах да агнястрэльнай зброі) і ч. 3 арт. 361-1 КК (удзел у экстрэмісцкім фарміраванні).

Вядома, што 24 траўня 2022 г. у Аляксандра памерла маці, аднак на пахаванне яго не адпусцілі.

9 лістапада 2022 г. у Гомельскім абласным судзе распачаўся разгляд "справы Рабочага Руху", фігурантамі якой праходзяць адразу дзесяць палітзняволеных. На другі дзень працэсу ўсе фігуранты справы заявілі суду, што сваю віну ў дзяржаўнай здрадзе і стварэнні экстрэмісцкага фармавання не прызнаюць. Усе фігуранты "справы Рабочага Руху" на судзе адмовіліся даваць паказанні.

27 снежня працэс закрылі да вынясення прысуду, хаця да гэтага ён праходзіў у адкрытым рэжыме. Прычына невядомая.

Вядома, што 31 снежня Аляксандр абвясціў галадоўку супраць парушэння заканадаўства падчас яго ўтрымання ў гомельскім СІЗА. Пры гэтым першыя некалькі дзён ён нават не піў вады. 10 лютага яго змясцілі ў карцар СІЗА-3.

У Гомельскім абласным судзе 17 лютага 2023 г. вынеслі прысуд па "справе Рабочага Руху". Суддзя Аляксандр Піскуноў прызнаў Аляксандра вінаватым паводле ч. 2 арт. 295 КК (Незаконныя дзеянні ў адносінах да агнястрэльнай зброі), ч. 1 арт. 356 КК (здрада дзяржаве), ч. 3 арт. 361-1 КК (стварэнне экстрэмісцкага фармавання і ўдзел у ім) і прызначыў яму 15 гадоў зняволення ў калоніі ва ўмовах узмоцненага рэжыму і штраф у памеры 200 базавых велічыняў.

Аляксандр спыніў галадоўку 20 лютага 2023 г.: пасля 51 дня адмовы ад ежы ягоны стан здароўя ацэньваецца як задавальняльны, але мужчына дужа схуднеў.

Палітвязень Аляксандр Капшуль у красавіку 2023 г. увайшоў у тройку фіналістаў прэстыжнай міжнароднай праваабарончай Прэміі за глабальную абарону (Global Advocacy Award).

11 жніўня 2023 г. МУС унёс палітзняволенага ў "Пералік грамадзян Беларусі, замежных грамадзян або асоб без грамадзянства, якія маюць дачыненне да экстрэмісцкай дзейнасці".

Адбывае пакаранне ў папраўчай калоніі № 15 (Магілёў). 

У пачатку 2024 г. пераведзены ў ПК № 2

Ад 11 да 15 гадоў калоніі: дзесяць палітвязняў асудзілі па "справе Рабочага Руху"

На працэсе стала вядома, што Zoom-канфэрэнцыі запісваў супрацоўнік ад спецслужб — гэта з'яўляецца адным з галоўным доказам па справе. На працэсе агучылі падрабязнасці таго, як і хто ствараў і распаўсюджваў розныя ўлёткі ў пэрыяд 2020–2021 гадоў. Таксама зачыталі пратаколы допытаў абвінавачаных і сведак. На гэтым тыдні суд перайшоў да прагляду запісаў zoom-канфэрэнцыяў. На іх у тым ліку прысутнічалі Святлана Ціханоўская і прадстаўнікі яе штабу.

Гісторыя супрацоўніка новаполацкага "Нафтана", якога судзяць за "здраду дзяржаве"

Калісьці былы юрысконсульт "Нафтана" Аляксандр Капшуль дапамагаў прадпрыемству выйграваць спрэчкі з іншымі кампаніямі, цяпер жа ён абвінавачваецца ў здрадзе дзяржаве — за дапамогу завадчанам. Паўтара месяца таму ён абвясціў галадоўку ў ізалятары. Расказваем гісторыю актывіста, якога пасля ўцёкаў "вяртаў" КДБ.

Палітвязні абскардзяць рашэнне КДБ аб прызнанні "Рабочага руху" "экстрэмісцкім фармаваннем"

У судзе Цэнтральнага раёна Мінска 9 лютага разгледзяць скаргу на рашэнне Камітэта дзяржаўнай бяспекі Рэспублікі Беларусь аб прызнанні групы грамадзян экстрэмісцкім фарміраваннем, забароне яго дзейнасці. КДБ прыняў такое рашэнне 21 верасня 2021 года — пасля і падчас затрыманняў фігурантаў справы. Разгляд скаргі будзе праходзіць у закрытым рэжыме.

Другі дзень суда па "справе Рабочага Руху": усе 10 палітвязняў не прызналі віну ў здрадзе дзяржаве

10 лістапада ўсе дзесяць палітвязняў не прызналі сваю віну ў здрадзе дзяржавы і стварэнні і ўдзеле ў экстрэмісцкім фарміраванні. Толькі адзін Андрэй Пагерыла прызнаў віну паводле арт. 188 КК (паклёп).

У Гомелі сёння распачаўся суд па рэзананснай "справе Рабочага Руху" — судзяць адразу 10 палітвязняў

Была агучаная інфармацыя, што Сяргей Шэлест збіраў інфармацыю аб прадпрыемстве "Гродна Азот", перадаваў яе замежным спецслужбам, а таксама штабу Ціханоўскай, і атрымліваў грашовыя ўзнагароды ад адной з беларускіх дыяспар у ЗША.

13 затрыманых па "справе Рабочага руху". Што пра іх вядома і ў чым іх вінавацяць?

На працягу трох дзён — 21-23 верасня — пракацілася хваля затрыманняў завадчанаў і стачкамаўцаў з «Гродна Азот», Беларускага металургічнага заводу, Беларускай Чыгункі і «Нафтана». Некалькі чалавек з «Гродна Азот» выпусцілі, астатнія 13 чалавек былі затрыманыя і змешчаныя ў СІЗА КДБ і гомельскае СІЗА №3. Па папярэдняй інфармацыі праваабаронцаў, іх затрымалі ў межах артыкула 356 Крымінальнага кодэкса (здрада дзяржаве). Санкцыя па гэтым артыкуле прадугледжвае да 15 гадоў пазбаўлення волі. «Вясна» распавядае, хто знаходзіцца ў статусе затрыманых і што вядома па «справе Рабочага руху».

Адрас для лістоў: ПК № 2. 213800, г. Бабруйск, вул. Сікорскага, 1

Палітвязні знаходзяцца па адрасах:

Падтрымаць «Вясну»