Аляксандр Гурнік
Дата нараджэння: 16 верасня 1981
Дата затрымання: 29 чэрвеня 2022
Прад'яўленыя абвінавачванні:
арт. 342 Крымінальнага кодэкса — Арганізацыя і падрыхтоўка дзеянняў, што груба парушаюць грамадскі парадак, альбо актыўны ўдзел у іх
арт. 361 Крымінальнага кодэкса — Заклікі да дзеянняў, скіраваных на прычыненне шкоды нацыянальнай бяспецы Рэспублікі Беларусь
арт. 368 Крымінальнага кодэкса — Абраза прэзідэнта Рэспублікі Беларусь
Вынік суда: 5 гадоў
Від пакарання: пазбаўленне волі ў калоніі ва ўмовах узмоцненага рэжыму
Суддзя: Куроўскі Дзмітрый
Аляксандр Тадзівонавіч Гурнік — агент па нерухомасці, блогер, аўтар блога "Беларусь у акне". На ягоны TikTok-акаўнт быў падпісаны 431 чалавек. У роліках ён гумарыстычна каментуе беларускія навіны.
Мужчыну затрымаў ГУБАЗіК у чэрвені 2022 г., разбіўшы дзеля гэтага акно яго кватэры. Як паказана ў апублікаваным праўладным тэлеграм-каналам відэа, міліцыя грукала ў дзверы Гурніка кувалдай. Адчыніць іх такім чынам не атрымалася і сілавікі залезлі ў кватэру праз акно. Затым мужчыну збілі.
Аляксандра ўжо збівалі да гэтага — ён трапіў пад хвалю катаванняў на Акрэсціна падчас жнівеньскіх пратэстаў. Згодна з апублікаваным на ягонай старонцы медыцынскім заключэннем, яго жорстка збілі падчас затрымання на выхадзе з дома 12 жніўня і на Акрэсціна, на ягоным целе было 47 гематом. Мужчына падаў заяву ў СК з патрабаваннем правесці праверку па факце ягонага збіцця. У завядзенні крымінальнай справы, вядома, адмовілі.
Аляксандра вінавацяць паводле ч. 1 арт. 342 КК (Арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх), ч. 3 арт. 361 КК (Заклікі да мер абмежавальнага характару (санкцый), іншых дзеянняў, накіраваных на прычыненне шкоды нацыянальнай бяспецы Рэспублікі Беларусь) і ч. 1 арт. 368 КК (Абраза Лукашэнкі).
Справу палітвязня пачалі разглядаць у Брэсцкім абласным судзе 16 лютага 2023 г.
18 траўня 2023 г. суддзя Дзмітрый Куроўскі прызнаў палітвязня вінаватым і прызначыў пакаранне ў выглядзе пазбаўлення волі на тэрмін пяць гадоў з адбываннем у папраўчай калоніі ва ўмовах узмоцненага рэжыму.
18 ліпеня 2023 г. у Вярхоўным судзе будзе разглядацца апеляцыйная скарга палітвязня суддзёй Юрыем Руткоўскім.
21 ліпеня 2023 г. МУС унесла палітвязня ў "спіс экстрэмістаў".
Нумар калоніі, у якую перавялі Аляксандра, пакуль невядомы.
"Пісаў лісты ў МВФ з заклікамі да ўвядзення санкцый супраць Беларусі, абражаў Лукашэнку": пяць гадоў калоніі прысудзілі мінскаму блогеру
