Алег Анатольевіч Канавалаў — уладальнік YouTube-канала "Третий регион Беларусь" быў затрыманы 10 студзеня 2022 года, калі вярнуўся ў Беларусь на святы. 

Яго абвінавачваюць у тым, што ён дэананімізаваў сілавікоў і ўжо пасля ад'езду ва Украіну працягваў "размяшчаць у сацсетцы інфармацыю антыдзяржаўнага толку, прапагандаваць супраціў прадстаўнікам улады". Мужчына загружаў на свой канал відэа з акцый салідарнасці беларусаў у Кіеве. Таксама яму ў віну ставяць "цынічныя каментары" пра загінулага супрацоўніка КДБ Дзмітрыя Федасюка. 

Яго абвінавацілі па арт. 130 Крымінальнага кодэксу (Распальванне сацыяльнай варожасці), ч. 1 арт. 342 (Арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх), ч. 1 арт. 368 (Абраза прэзідэнта Рэспублікі Беларусь) і арт. 369 (Абраза прадстаўніка улады), ч. 1 арт. 361-1 (Стварэнне экстрэмісцкага фарміравання або ўдзел у ім).

У канцы лютага 2022 года на сем сутак быў змешчаны ў СІЗА № 3 у карцар.

У Гомельскім абласным судзе 7 верасня 2022 г. вынеслі прысуд Алегу: яму прызначылі пяць гадоў пазбаўлення волі ў калоніі ўзмоцненага рэжыму, штраф у памеры 3200 рублёў і кампенсацыю маральнай шкоды на карысць пацярпелага міліцыянта 5000 рублёў.

23 снежня 2022 г. КДБ уключыў палітвязня ў спіс "асоб, якія маюць дачыненне да тэрарыстычнай дзейнасці".

Палітвязня на пачатку студзеня 2023 г. этапавалі ў шклоўскую ПК № 17.

Пяць гадоў пазбаўлення волі ў калоніі ўзмоцненага рэжыму палітвязню Алегу Канавалаву

У выніку суд прызнаў маладога чалавека вінаватым у «кіраўніцтве экстрэмісцкім фарміраваннем, арганізацыі групавых дзеянняў, якія груба парушаюць грамадскі парадак, і актыўным удзеле ў такіх дзеяннях», а таксама ў публічнай абразе Лукашэнкі, прадстаўніка ўлады і распальванні сацыяльнай варожасці.