Вікторыя Аляксандраўна Кульша да затрымання працавала інжынеркай па ахове працы. Паводле адукацыі яна юрыстка, таксама скончыла курсы манікюру і масажу.

Была адміністратаркай тэлеграм-канала і чата "Кіроўцы 97%", за што і была затрыманая 4 лістапада 2020 года супрацоўнікамі ГУБАЗіК. Жанчыну змясцілі ў СІЗА-1 у Мінску.

Першапачаткова ёй было прад'яўленае абвінавачванне паводле арт. 361 Крымінальнага кодэкса (заклікі да дзеянняў, накіраваных на прычыненне шкоды нацыянальнай бяспецы Рэспублікі Беларусь). У лютым 2021 года стала вядома, што абвінавачванне перакваліфікавалі на ч. 1 і ч. 2 арт. 342 Крымінальнага кодэкса (Арганізацыя і падрыхтоўка дзеянняў, якія груба парушаюць грамадскі парадак).

У судзе Заводскага раёна 4 чэрвеня 2021 года быў абвешчаны прысуд па крымінальнай справе супраць чатырох адміністратараў тэлеграм-канала і чата “Кіроўцы 97”. Слуханні па справе праходзілі ў закрытым рэжыме. Падчас спрэчак пракурор запрасіў пакараць палітвязняў Гуціна, Кульшу і Вішняк, якія сваёй віны не прызналі, двума гадамі і шасцю месяцамі пазбаўлення волі ў калоніі агульнага рэжыму, Таццяну Шкробат, якая супрацоўнічала са следствам і прызнала віну, — трыма гадамі абмежавання волі без накіравання ў папраўчую ўстанову адкрытага тыпу ("хатняя хімія"). Менавіта такі прысуд і вынесла суддзя Жанна Хвайніцкая.

У гомельскай жаночай калоніі № 4 на выязным пасяджэнні 13 чэрвеня 2022 г. разглядзелі крымінальную справу Вікторыі Кульшы паводле ч. 1 арт. 411 Крымінальнага кодэкса (злоснае непадпарадкаванне законным патрабаванням адміністрацыі папраўчай установы). Працэс праходзіў у будынку папраўчай калоніі, таму сваякоў на пасяджэнне не пусцілі. Суддзя суда Чыгуначнага раёну Гомеля Сяргей Мальцаў прысудзіў палітзняволенай у дадатак да двух гадоў і шасці месяцаў зняволення яшчэ адзін год у калоніі.

Вікторыю судзілі за непадпарадкаванне адміністрацыі гомельскай калоніі № 4. Так, сярод "парушэнняў" у яе былі: "знішчэнне ліста, напісанага да дачкі"; "выйшла ў туалет, не папярэдзіўшы"; "была няветлівая з супрацоўнікамі папраўчай установы"; "знаходзілася з расшпіленым гузікам на паліто", "пры адкрыцці дзвярэй камеры не ўстала, не прывіталася, не назвалася". У калоніі палітзняволеную прызналі "злоснай парушальніцай рэжыму". У адносінах да Вікторыі агулам было выпісана 34 спагнанні. Паводле матэрыялаў справы, Вікторыя прыехала ў калонію ўжо з 24 спагнаннямі. На судзе яна заявіла, што "ад самага пачатку да яе было пільнае і староннае стаўленне з боку адміністрацыі". Яна ўпэўнена, што "абвінавачанне з'яўляецца цалкам надуманым", а вінаватай сябе не лічыць.

Да разгляду апеляцыйнай скаргі Вікторыю змясцілі ў гомельскі СІЗА-3. Гомельскі абласны суд 10 жніўня 2022 г. разглядзеў апеляцыйную скаргу палітзняволенай на прысуд суда Чыгуначнага раёна Гомеля. Прысуд пакінулі без зменаў.

22 жніўня 2022 г. палітзняволеную этапавалі ў папраўчую калонію № 24.

Па інфармацыі праваабаронцаў, супрацоўнікі жаночай калоніі № 24 у Зарэччы ўжывалі супраць Вікторыі псіхалагічны і фізічны ціск. Паведамляецца, што адзін з наглядчыкаў душыў Вікторыю локцем, стоячы ззаду, а таксама цягаў яе па камеры. Апроч гэтага, яе часта абражалі і прыніжалі перад іншымі наглядчыкамі.

Вікторыю Кульшу зноў судзілі паводле ч. 1 арт. 411 КК, але гэтым разам — за непадпарадкаванне адміністрацыі калоніі ў Зарэччы. Вядома, што па прыбыцці ў калонію палітзняволеную змяшчалі ў ШІЗА, а потым перавялі ў ПКТ на шэсць месяцаў. Чарговы суд над жанчынай распачаўся 6 красавіка 2023 г. у Рэчыцы. На наступны дзень, 7 красавіка 2023 года, суддзя Станіслаў Іванюценка прызнаў Вікторыю вінаватай і прысудзіў ёй яшчэ адзін год пазбаўлення волі (цяпер канчатковы тэрмін складае чатыры з паловай гады калоніі ва ўмовах агульнага рэжыму).

З 14 красавіка 2023 г. Вікторыя ўтрымліваецца ў гомельскім СІЗА-3.

Гомельскі абласны суд 14 чэрвеня 2023 г. разглядзіць апеляцыйную скаргу Вікторыі.

З 22 чэрвеня 2023 г. адбывае пакаранне ў ПК № 24.

У кастрычніку 2023 г. Вікторыю чарговы раз змяшчалі ў ШІЗА на 30 сутак. А ў лістападзе палітзняволеную змясцілі ў памяшканне камернага тыпу. Тэрмін і прычыны спагнання пакуль невядомыя.

Палітзняволенай Вікторыі Кульшы ў трэці раз дадалі тэрмін па крымінальнай справе

За паўгода ў рэчыцкай калоніі Вікторыя адбыла мінімум 92 дні ў ШІЗА, а нядаўна яе змясцілі ў ПКТ на шэсць месяцаў.

Палітзняволеную Вікторыю Кульшу ў зарэчанскай калоніі збіваў і душыў наглядчык

"Вясна" распавядае, як на жанчыну ціснулі ў папраўчай калоніі, і ў якім цяпер стане знаходзіцца Вікторыя.

"Лісты знішчаюць па акце, бо яны нібыта напісаны тайнапісам". Як у жаночай калоніі ў Зарэччы здзекуюцца з палітзняволеных

"Вясна" распавядае, у якіх умовах утрымліваюць палізняволеных жанчын у калоніі для "рэцыдывістак", хто адказвае за ціск на іх, і як улады працягваюць пераследаваць ужо асуджаных жанчын.

Палітзняволенай Вікторыі Кульшы пакінулі прысуд у сіле. Ёй пагражаюць ціскам у новай жаночай калоніі для "рэцыдывістак"

Пакуль палітзняволеная чакала апеляцыю, на яе ціснула адміністрацыя гомельскага СІЗА-3, таму яна на знак пратэсту два тыдні трымала галадоўку. Нядаўна ў яе пачаўся крывацёк, але турэмныя лекары пра гэта нібыта не ведалі, таму і не аказвалі ёй медыцынскую дапамогу. "Вясна" распавядае, што цяпер вядома пра стан здароўя Вікторыі Кульшы і як на яе ціснуць у месцах зняволення.

«Падкінулі таблеткі і сказалі, што павесяць на яе артыкул за "абарот наркатычных сродкаў"»: як улады пераследуюць палітзняволеную Вікторыю Кульшу

Пра тое, як праходзіў суд над Вікторыяй, пра ейную «змову» з Марыяй Калеснікавай, пра пагрозы адміністрацыі калоніі і пра тое, як жанчына пачуваецца цяпер, пасля 20 месяцаў у зняволенні, — дачка Вікторыі распавяла «Вясне».

Палітзняволеную Вікторыю Кульшу ў калоніі асудзілі да яшчэ аднаго году зняволення

Справу Вікторыі разглядалі на выязным пасяджэнні на тэрыторыі калоніі, таму сваякоў не прапусцілі на суд. Пракурор запрасіў для Вікторыі год зняволення — менавіта такое пакаранне і прызначыў суддзя Сяргей Мальцаў.

У Мінску трох адміністратараў каналу "Кіроўцы 97%" адправілі ў калонію

У судзе Заводскага раёна чацвёртага чэрвеня быў абвешчаны прысуд па крымінальнай справе супраць чатырох адміністратараў тэлеграм-канала і чата “Кіроўцы 97”.

Адміністратараў тэлеграм-каналу "Кіроўцы 97" судзяць у закрытым рэжыме

У судзе Заводскага раёна 5 траўня распачаўся суд над чатырма адміністратарамі тэлеграм-канала і чата “Кіроўцы 97”. Абвінавачаныя па справе – палітзняволеныя Дзяніс Гуцін, Ганна Вішняк, Вікторыя Кульша, а таксама Таццяна Ш. якая не знаходзіцца пад вартай.

Палітзняволенай Вікторыі Кульша далі 10 сутак карцару за бчб-заколку

Палітзняволеная Вікторыя Кульша, адміністратарка тэлеграм-канала «Кіроўцы 97%», якая з лістапада знаходзіцца ў СІЗА на Валадарскага, перадала «Новаму Часу» інфармацыю пра рэпрэсіі ў ізалятары.