Ларыса Фёдараўна Шчыракова — былая журналістка, была затрымана ўвечары 6 снежня 2022 г. пасля ператрусу ў доме.

Сына Ларысы ў той жа дзень забралі ў прытулак. Былы муж палітзняволенай, які апошнія гады жыў у Навасібірску, сабраў неабходныя дакументы і 23 снежня забраў Святаслава. Іншым сваякам хлопчыка не аддавалі. Пакуль сын з бацькам будуць жыць у Гомелі.

На Ларысу завялі крымінальную справу паводле арт. 369-1 КК (дыскрэдытацыя Рэспублікі Беларусь). Жанчыну змясцілі ў гомельскі СІЗА. 

16 студзеня 2023 г. у судзе Навабеліцкага раёна Гомеля ў закрытым рэжыме адбыўся разгляд скаргі журналісткі на затрыманне і змяшчэнне пад варту. Суддзя Аляксандр Зінчук скаргу не задаволіў.

23 чэрвеня 2023 г. стала вядома, што пракуратура Гомельскай вобласці накіравала ў Гомельскі абласны суд крымінальную справу ў дачыненні палітзняволенай журналісткі.

Паводле матэрыялаў следства, Ларыса “са жніўня 2020 года па снежань 2022 года, выкарыстоўваючы напружаную грамадскую сітуацыю і імкнучыся дэстабілізаваць абстаноўку ў краіне, праз розныя месенджары і ўліковыя запісы ў сацсетках прадаставіла для размяшчэння і размясціла ў сетцы Інтэрнэт, у тым ліку на дэструктыўных рэсурсах, інфармацыйныя матэрыялы з загадзя ілжывымі звесткамі, якія дыскрэдытавалі Рэспубліку Беларусь”.

Ларысе Шчыраковай канчаткова прад'яўленыя абвінавачванні паводле арт. 369-1 Крымінальнага кодэкса (дыскрэдытацыя Рэспублікі Беларусь), ч. 1 і ч. 2 арт. 361-4 (садзейнічанне экстрэмісцкай дзейнасці і тое ж дзеянне, якое ажыццяўляецца паўторна).

Яна ж, па меркаванні пракуратуры, "ажыццяўляла збор, стварэнне, апрацоўку, захоўванне і перадачу аўдыё -, відэа -, фота - і тэкставай інфармацыі, для далейшага выкарыстання ў мэтах забеспячэння экстрэмісцкай дзейнасці інфармацыйнага рэсурсу «Вясна» і экстрэмісцкага фарміравання «Белсат»".

Па складзе прад’яўленых абвінавачанняў журналістцы можа пагражаць да сямі гадоў зняволення. Суд над жанчынай пройдзе ў Гомельскім абласным судзе меркавана напрыканцы ліпеня 2023 г.

7 чэрвеня 2023 г. у палітзняволенай журналістцы памерла маці. Ларысу не адпусцілі на пахаванне.

Гомельскі абласны суд 27 ліпеня 2023 г. пачынае разгляд крымінальнай справы Ларысы Шчыраковай. Судовы працэс будзе праходзіць у закрытым рэжыме. Справу прызначаны разглядаць суддзя Мікалай Доля.

31 жніўня 2023 г. Ларысу асудзілі на тры з паловай гады пазбаўлення волі ў калоніі ва ўмовах агульнага рэжыму. Часткова канфіскавана маёмасць. Таксама ёй трэба сплаціць штраф у памеры 100 б.в.

Ларыса Шчыракова не будзе падаваць апеляцыйную скаргу ў Вярхоўны суд на вырак, вынесены ёй Гомельскім абласным судом. Напрыканцы верасня 2023 г. Шчыракову этапавалі з СІЗА ў жаночую папраўчую калонію № 4.

22 верасня 2023 г. МУС унесла Ларысу ў "спіс экстрэмістаў".

Ларысу Шчыракову асудзілі за садзейнічанне экстрэмісцкай дзейнасці і дыскрэдытацыю Беларусі

Палітзняволеную Ларысу Шчыракову затрымалі ўвечары 6 снежня 2022 года пасля ператрусу ў яе прыватным доме. Яе непаўнагадовага сына змясцілі ў прытулак.

Найбуйнейшае аб’яднанне журналістаў у Еўропе назвала суд над Шчыраковай непрымальным

Учора пачаўся суд над былой журналісткай з Гомеля Ларысай Шчыраковай. У Twitter Еўрапейская федэрацыя журналістаў (European Federation of Journalists) назвала яе затрыманне і працэс непрымальнымі.

У Гомелі пачынаецца закрыты суд над журналісткай Ларысай Шчыраковай

Справу прызначаны разглядаць суддзя Мікалай Доля. Ён вядомы тым, што ўжо адправіў за краты на пяць гадоў журналістку Ірыну Слаўнікаву.

Справа палітзняволенай журналісткі Ларысы Шчыраковай перададзеная ў суд

Па складзе прад’яўленых абвінавачанняў журналістцы можа пагражаць да сямі гадоў зняволення.

Як пачуваецца за кратамі палітзняволеная былая журналістка Ларыса Шчыракова

Праваабаронцам стала вядомая некаторая інфармацыя пра Ларысу Шчыракову. Але да гэтага часу невядома, чаму менавіта яна знаходзіцца ў СІЗА.